અમદાવાદની સેશન્સ કોર્ટે ગૌમાંસ વેચાણ કેસમાં ત્રણ દોષિતોને 8 વર્ષની સખત કેદ અને ₹2 લાખનો દંડ ફટકાર્યો છે. દોષિતોમાં સમીર શેખ, ઝફરખાન પઠાણ અને મોહમ્મદ અઝમલ શેખનો સમાવેશ થાય છે. કોર્ટે પોતાના આદેશમાં નોંધ્યું હતું કે આ ગુનો ‘સમાજવિરોધી’ પ્રકૃતિનો છે અને આરોપીઓએ આ કૃત્ય કોઈ ઉશ્કેરણી કે ભાવનાત્મક સ્થિતિમાં નહીં, પરંતુ આર્થિક લાભ માટે જાણીજોઈને કર્યું હતું.
કેસની વિગતો અનુસાર 4 મે, 2019ના રોજ અમદાવાદના રખિયાલ વિસ્તારમાં પોલીસે કાર્યવાહી દરમિયાન આરોપીઓને ગૌમાંસ વેચતા ઝડપ્યા હતા. આ દરમિયાન તેમના કબજામાંથી અંદાજે 250 કિલો ગૌમાંસ પણ જપ્ત કરવામાં આવ્યું હતું. કેસમાં કલામ હુસૈન કુરેશી અને ઝીશાન કુરેશી નામના અન્ય બે આરોપીઓ સામે પણ ગુનામાં મદદ કરવાનો આરોપ લગાવવામાં આવ્યો હતો.
આરોપીઓ સામે ગુજરાત એનિમલ પ્રિઝર્વેશન (સુધારા) અધિનિયમ, ગુજરાત પ્રોવિન્શિયલ મ્યુનિસિપલ કોર્પોરેશન્સ (GPMC) એક્ટ અને IPCની સંબંધિત કલમો હેઠળ કાર્યવાહી કરવામાં આવી હતી. સેશન્સ કોર્ટે પોતાના ચુકાદામાં સ્પષ્ટ કર્યું હતું કે આવા ગુનામાં આરોપીઓને રાહત આપી શકાય નહીં. કોર્ટે નોંધ્યું હતું કે ગુનો પૂર્વનિયોજિત રીતે અને નફો કમાવવાના હેતુથી કરવામાં આવ્યો હતો.
