દિલ્હી હાઇકોર્ટે શુક્રવારે ફેબ્રુઆરી 2020ના ઉત્તર-પૂર્વી દિલ્હીના હિંદુવિરોધી રમખાણોના કેસમાં કોંગ્રેસની પૂર્વ કાઉન્સિલર ઈશરત જહાંને આપવામાં આવેલા જામીનને પડકારતી દિલ્હી પોલીસની અરજી ફગાવી દીધી છે. જસ્ટિસ નવીન ચાવલા અને જસ્ટિસ રવિન્દર દુડેજાની ડિવિઝન બેન્ચે ટ્રાયલ કોર્ટના 2022ના જામીન આદેશમાં દખલ કરવાનો ઇનકાર કરી દીધો છે.
હાઇકોર્ટે પોતાના આદેશમાં નોંધ્યું હતું કે ઈશરત જહાંને જામીન મળ્યાને ચાર વર્ષથી વધુ સમય વીતી ગયો છે અને અત્યાર સુધી એવા કોઈ પુરાવા સામે આવ્યા નથી કે જેમાં તેણે જામીનની શરતોનું ઉલ્લંઘન કર્યું હોય.
ઈશરત જહાંની માર્ચ 2020માં રમખાણોના કાવતરામાં સંડોવણી બદલ ધરપકડ કરવામાં આવી હતી. તેના પર ગેરકાયદેસર પ્રવૃત્તિઓ નિવારણ અધિનિયમ (UAPA), ભારતીય દંડ સંહિતા (IPC), જાહેર મિલકતને નુકસાન અટકાવવા માટેનો કાયદો અને આર્મ્સ એક્ટ હેઠળ ગંભીર આરોપો મૂકવામાં આવ્યા હતા. બે વર્ષ જેલમાં વિતાવ્યા બાદ માર્ચ 2022માં સ્પેશિયલ કોર્ટે તેને જામીન આપ્યા હતા.
આતંકી કૃત્યને પ્રોત્સાહન આપવાનો આરોપ
દિલ્હી પોલીસે પોતાની અપીલમાં દલીલ કરી હતી કે ટ્રાયલ કોર્ટે પુરાવાઓ અને સાક્ષીઓના નિવેદનોની અવગણના કરી છે. પોલીસના મતે આ રમખાણો અચાનક થયેલી હિંસા નહોતી, પરંતુ અમેરિકી રાષ્ટ્રપતિની મુલાકાત સમયે આંતરરાષ્ટ્રીય મીડિયાનું ધ્યાન ખેંચવા માટે ઘડાયેલું એક સુનિયોજિત અને બહુસ્તરીય કાવતરું હતું. પોલીસે ઈશરત જહાં પર રમખાણો માટે આર્થિક મદદ પૂરી પાડવાનો અને આતંકવાદી કૃત્યને પ્રોત્સાહન આપવાનો પણ ગંભીર આરોપ લગાવ્યો હતો.
આ કેસમાં જામીનની શરતોમાં પણ સમય જતાં ફેરફાર કરવામાં આવ્યા હતા. 2022માં જ્યારે જામીન મળ્યા ત્યારે ઈશરત જહાંને કોર્ટની પરવાનગી વગર દિલ્હીની બહાર જવા પર પ્રતિબંધ હતો. જોકે, 2024માં આ શરતમાં સુધારો કરવામાં આવ્યો હતો અને તેને પૂર્વ પરવાનગી વગર સમગ્ર ભારતમાં પ્રવાસ કરવાની મંજૂરી આપવામાં આવી હતી. દિલ્હી પોલીસે આ હળવી કરાયેલી શરતો અને જામીનના મૂળ આદેશ બંને સામે વાંધો ઉઠાવ્યો હતો.
હાલમાં ઈશરત જહાં સામે હત્યાના પ્રયાસ અને રમખાણો કરવા જેવા આરોપો હેઠળ ટ્રાયલ કોર્ટમાં કેસની કાર્યવાહી ચાલી રહી છે. હાઇકોર્ટના આ તાજેતરના ચુકાદા બાદ હવે સ્પષ્ટ થયું છે કે ટ્રાયલ દરમિયાન તે જેલની બહાર રહી શકશે. જોકે, દિલ્હી હાઇકોર્ટના આદેશ છતાં રમખાણોના મુખ્ય કાવતરાના કેસમાં તપાસ અને કાયદાકીય પ્રક્રિયા ચાલુ રહેશે, જેમાં અન્ય ઘણા સહ-આરોપીઓ પણ સંડોવાયેલા છે.
