કોંગ્રેસ નેતા રાહુલ ગાંધી દિવસેને દિવસે કાયદાકીય ભીંસમાં આવતા જોવા મળી રહ્યા છે. હજુ મોદી સમાજ વિશે કરેલી ટિપ્પણીના મામલામાં નિવેડો આવે તે પહેલાં જ રાષ્ટ્રીય સ્વયંસેવક સંઘને કૌરવ કહેવાના મામલે હરિદ્વારમાં રાહુલ ગાંધી વિરુદ્ધ માનહાનિનો દાવો દખલ કરવામાં આવ્યો હોવાના અહેવાલો મળી રહ્યા છે. રાહુલ વિરુદ્ધ સંઘના એક કાર્યકર્તા દ્વારા હરિદ્વારના દ્વિતીય ન્યાયિકની કોર્ટમાં માનહાનિનો દાવો માંડવામાં આવ્યો છે. જેના પર ન્યાયાલય દ્વારા અગામી 12 એપ્રિલ 2023ના રોજ સુનાવણી કરવા માટેની તારીખ મુકરર કરવામાં આવી છે.
અહેવાલો અનુસાર જગજીતપુર કનખલના રહેવાસી અને સંઘના કાર્યકર્તા કમલ ભદૌરિયા દ્વારા RSSને કૌરવ કહેવાના મામલે હરિદ્વારમાં રાહુલ ગાંધી વિરુદ્ધ માનહાનિનો દાવો દાખલ કરવામાં આવ્યો છે. ભદોરિયાએ પોતાની અરજીમાં જણાવ્યું છે કે, વડાપ્રધાન નરેન્દ્ર મોદીના કાર્યકાળમાં કલમ 370 હટાવવી, મુસ્લિમ મહિલાઓને અધિકાર આપતો ત્રણ તલાક પર કાયદો બનાવવો ઉપરાંત રામ મંદિરનો પાયો નાંખવા સહિત ઘણાં કામો થયાં અને આ દરમિયાન રાષ્ટ્રીય સ્વયંસેવક સંઘે પૂરતો સહયોગ આપ્યો અને સતત ખડેપગે રહ્યું.
તેમણે કહ્યું કે, દેશમાં ક્યાંય પણ કોઈ પણ આપત્તિના સમયે સંઘની મહત્વની ભૂમિકા હોય છે. તેમ છતાં રાહુલ ગાંધીએ 9 જાન્યુઆરી 2023ના રોજ કુરુક્ષેત્ર અંબાલામાં સંઘને 21મી સદીના કૌરવ ગણાવ્યા હતા. તેમણે કહ્યું હતું, “આજના કૌરવો ખાખી હાફ પેન્ટ પહેરે છે અને હાથમાં લાકડીઓ રાખે છે.” તેમણે આગળ કહ્યું કે, રાહુલ ગાંધીને કૌરવો વિશે જાણકારી હોવા છતાં તેમણે RSS જેવા કર્મઠ, મહેનતુ અને દેશને સમર્પિત સંગઠનને કૌરવો સાથે સરખાવ્યું અને સાથે એમ પણ કહ્યું કે તેઓ ‘હર-હર મહાદેવ’ કે ‘જય શ્રીરામ’ નથી કહેતા, જે તેમની નબળી માનસિકતા પ્રદર્શિત કરે છે.
राहुल गांधी के खिलाफ हरिद्वार में मानहानि का केस दर्ज
— News24 (@news24tvchannel) March 31, 2023
आरएसएस की तुलना 21वीं सदी के कौरवों से करने का आरोप, 12 अप्रैल को होगी सुनवाई #RahulGandhi #RSS pic.twitter.com/f4jsPl74a0
પોતાની અરજીમાં કમલ ભદૌરિયાએ આગળ જણાવ્યું છે કે, રાહુલ ગાંધીએ કહ્યું હતું કે આ દેશ પૂજારીઓનો નથી, પરંતુ તપસ્વીઓનો છે. તેમણે રાહુલના આ નિવેદનને લાગણીઓને ઠેસ પહોંચાડનારું ગણાવ્યું હતું. ફરિયાદ દાખલ કર્યા બાદ કોર્ટે રાહુલ ગાંધીને 12 એપ્રિલે હાજર થવા માટે નોટિસ પણ ફટકારી છે.
