મહિલાઓને ઘરમાં કેદ રાખવાની ‘ગ્રાન્ડ મુફ્તી’ની ટિપ્પણીની ટીવી એન્કરે કરી ટીકા તો મલયાલમ ન્યુઝ ચેનલે માંગી માફી, ડિબેટનો વિડીયો પણ હટાવ્યો

તાજેતરમાં જ મલયાલમ ન્યુઝ ચેનલ BIGTV24*7એ જાહેરમાં માફી માંગી છે. આ માફી કેરલમના ‘ગ્રાન્ડ મુફ્તી’નું ટાઇટલ ધરાવતા સુન્ની મુસ્લિમ નેતા મુફ્તી કન્થાપુરમ A.P. શેખ અબુબકર અહમદે આપેલી મહિલાવિરોધી ટિપ્પણીની ટીકા કરવા બદલ માંગવામાં આવી છે. ટીવી એન્કર અપર્ણા કુરુપે ચાલુ કાર્યક્રમમાં ઓન એર મુફતીની ટિપ્પણીઓની ટીકા કરી હતી.

અહેવાલ અનુસાર મુફ્તીએ કોચિનમાં આયોજિત ‘હબ્બુલ રસૂલ’ પરિષદ દરમિયાન એવું કહ્યું હતું કે ઇસ્લામમાં મહિલાઓને જાહેર જીવનથી દૂર રાખીને ઘરમાં જ સીમિત રાખવાનો આદેશ આપવામાં આવ્યો છે. પોતાના ભાષણમાં તેમણે મહિલાઓની તુલના તિજોરીમાં બંધ સોનાના દાગીના સાથે કરી હતી અને કહ્યું હતું કે જે રીતે કિંમતી ઘરેણાંને બહાર ખુલ્લામાં રાખવાથી તેનું મૂલ્ય ઘટે છે, તેવી જ રીતે મહિલાઓને જાહેર જીવનમાં લાવવાથી ‘મોટો વિનાશ’ સર્જાઈ શકે છે. ઘણા મુસ્લિમ નેતાઓએ પણ આ ટિપ્પણીનું સમર્થન કર્યું હતું.

નિવેદન બાદ વિવાદ સર્જાતાં ઑલ ઇન્ડિયા સુન્ની જમિય્યાતુલ ઉલેમાના જનરલ સેક્રેટરી કન્થાપુરમે બચાવ પણ કર્યો હતો. દરમિયાન મલયાલમ ન્યુઝ ચેનલ BIG TVના ‘BIG DIALOGUE’ કાર્યક્રમમાં એન્કર અપર્ણા કુરુપે આ વિવાદાસ્પદ ટિપ્પણીઓ સામે સખત વિરોધ નોંધાવ્યો હતો. તેમણે કટ્ટરપંથી વિચારસરણી સામે અવાજ ઉઠાવીને સ્ત્રીઓ પ્રત્યેના આ પ્રકારના નિવેદનની ટીકા કરી હતી.

અપર્ણા કુરુપે ટીકા કર્યા બાદ પણ ચેનલ વિરુદ્ધ વિવાદ સર્જાયો હતો. પરિણામે BIG TV ચેનલે તેના તમામ સોશિયલ મીડિયા પ્લેટફોર્મ પરથી આ ડિબેટનો વિડીયો હટાવી લીધો હતો અને જાહેરમાં માફી માંગી હતી.

ચેનલની માફીમાં અપર્ણા કુરુપના નામે સ્પષ્ટતા કરવામાં આવી હતી કે, “જો આ ચર્ચાથી કોઈની મજહબી ભાવનાઓ કે વિશ્વાસને ઠેસ પહોંચી હોય તો ખેદ વ્યક્ત કરવામાં આવે છે.” ચેનલે ઉમેર્યું કે સ્ત્રીઓ માટે સમાન દરજ્જો અને સામાજિક ન્યાયની માંગ કરતી વખતે અન્ય ગેરસમજો ન ફેલાય તે માટે વિડીયો હટાવવામાં આવ્યો છે.