પશ્ચિમ બંગાળમાં BJP-NDAની ઐતિહાસિક જીત બાદ પ્રથમ વખત રાજ્યની મુલાકાતે પહોંચેલા વડા પ્રધાન નરેન્દ્ર મોદીએ કહ્યું છે કે બંગાળ આખરે વર્ષો જૂના બંધનોમાંથી મુક્ત થયું છે. પશ્ચિમ બંગાળ દિવસ (પશ્ચિમ બંગા દિવસ) નિમિત્તે આયોજિત જાહેર કાર્યક્રમને સંબોધતા તેમણે રાજ્યમાં નવી ઉર્જા અને નવી શરૂઆતનો માહોલ સર્જાયો હોવાનું જણાવ્યું હતું.
પીએમ મોદીએ કહ્યું, “ચૂંટણી અને શપથવિધિ બાદ બંગાળની આ મારી પ્રથમ મુલાકાત છે. આજે બંગાળની હવામાં એક નવી તાજગી અનુભવાય છે. એવું લાગે છે કે બંગાળ આખરે પોતાના બંધનોમાંથી મુક્ત થયું છે.”
તારકેશ્વરમાં આયોજિત કાર્યક્રમ દરમિયાન વડા પ્રધાને જણાવ્યું હતું કે લોકોના ચહેરા પર જોવા મળતો ઉત્સાહ અને આનંદ બદલાતા બંગાળનું પ્રતિબિંબ છે. તેમણે દાવો કર્યો હતો કે અગાઉની ડાબેરી સરકારો અને TMCના શાસનકાળ દરમિયાન જે વિકાસનો અભાવ રહ્યો હતો, તેને દૂર કરવા BJP-NDA સરકારે વિકાસની ગતિ વધુ તેજ કરી છે.
પીએમ મોદીએ વધુમાં કહ્યું કે કેન્દ્રની ‘ડબલ એન્જિન સરકાર’ની કાર્યશૈલીના કારણે પશ્ચિમ બંગાળમાં હજારો કરોડ રૂપિયાના વિકાસકાર્યો શરૂ કરવામાં આવ્યા છે. તેમના મતે આ પ્રોજેક્ટ્સ રાજ્યમાં ઈન્ફ્રાસ્ટ્રક્ચર, કનેક્ટિવિટી અને જનકલ્યાણને નવી દિશા આપશે.
તેમણે પશ્ચિમ બંગાળ દિવસને ઐતિહાસિક ગણાવતા કહ્યું કે, “આ દિવસ રાજ્યના વિકાસ માટે પ્રેરણારૂપ બનવો જોઈએ. આપણે સૌ મળીને બંગાળના ઈતિહાસમાં એક નવું અને ગૌરવશાળી પ્રકરણ લખીએ. આજે BJP-NDA સરકારના નેતૃત્વમાં આ સ્વપ્નને સાકાર કરવા માટે વિકાસનું એક વિશાળ અભિયાન શરૂ કરવામાં આવી રહ્યું છે.”
ઉલ્લેખનીય છે કે પશ્ચિમ બંગાળ વિધાનસભા ચૂંટણીમાં BJP-NDAને મળેલી મોટી જીત બાદ PM મોદીની આ પ્રથમ બંગાળ મુલાકાત હતી. તેમના આ નિવેદનોને રાજ્યમાં બદલાયેલા રાજકીય સમીકરણો અને નવી સરકારના વિકાસ એજન્ડા સાથે જોડીને જોવામાં આવી રહ્યા છે.
