ગત 19 એપ્રિલના રોજ લોકસભા ચૂંટણી માટે પ્રથમ તબક્કાનું મતદાન પૂર્ણ થયું. રાજસ્થાનની પણ અમુક બેઠકો પણ પહેલા તબક્કામાં સમાવવામાં આવી હતી. આવી જ એક સિકર લોકસભા બેઠકના એક ગામમાં મતદાન દરમિયાન એક મહિલાએ મતદાન મથક માથે લઇ લીધું હતું. કારણ એ હતું કે તેને EVM મશીનમાં PM મોદીનો ફોટો નહતો દેખાયો. પછીથી તેને સમજાવવામાં આવી અને મતદાન કરાવવામાં આવ્યું. વડાપ્રધાન મોદીએ પણ આ અંગે પ્રતિક્રિયા આપી છે.
આ સમગ્ર ઘટનાની જાણકારી રાજસ્થાનના ભાજપ પ્રવક્તા લક્ષ્મીકાંત ભારદ્વાજે આપી. તેમણે X પર એક ન્યૂઝપેપર કટિંગની તસવીર મૂકીને લખ્યું કે, “ગામની ભણેલી ન હોય તેવી એક મહિલા EVM પર મોદીજીનો ફોટો શોધી રહી છે. અને એક પેલો બદમિજાજ છે, જે વિચારે છે કે અસભ્ય ભાષાનો ઉપયોગ કરીને મોદીને હરાવી દેશે. મોદીજી જનતાના હૃદય પર રાજ કરે છે. સમજાતું નથી કે આ ભ્રષ્ટ પરિવારને ક્યારે સમજાશે.”
माताओं-बहनों के इस स्नेह को देखकर मेरी आंखों में आंसू हैं, संकल्प भी है इस कर्ज को उतारने का 🙏🙏
— Narendra Modi (@narendramodi) April 25, 2024
लेकिन लक्ष्मीकांत जी, यह हम कार्यकर्ताओं की जिम्मेदारी है कि हम इन बारीकियों पर ध्यान दें। घर-घर जाकर लोगों को जागरूक करें। https://t.co/E8XtzAyS0u
તેમણે જે પેપર કટિંગ મૂક્યું, તેમાં જણાવવમાં આવ્યું છે કે, સિકરના પીપરાલી વિસ્તારમાં મતદાન ચાલી રહ્યું હતું અને મતદારોની ભીડ પણ એકઠી થઈ હતી. દરમિયાન ગીત ગાતી મહિલાઓનું એક જૂથ મતદાન કરવા માટે કેન્દ્ર પર પહોંચ્યું. ત્યારે જ કેન્દ્રમાંથી ઘોંઘાટ સાંભળવા મળ્યો. જઈને જોયું તો જાણવા મળ્યું કે ગ્રામીણ મહિલાની ફરિયાદ હતી કે મશીનમાં મોદીનો ફોટો નથી. પછી તેમને સમજાવવામાં આવ્યાં કે વડાપ્રધાન મોદીને સીધો મત ન આપી શકાય અને તેમનું પ્રતિનિધિત્વ કરતા ઉમેદવારનો ફોટો લગાવવામાં આવ્યો છે. ત્યારબાદ તેમણે મતદાન કર્યું.
પછીથી વડાપ્રધાન મોદીએ પણ આ ટ્વિટ ધ્યાને લીધું. તેમણે ઘટનાને લઈને લખ્યું કે, “માતાઓ-બહેનોના આ સ્નેહને જોઈને મારી આંખોમાં આંસુ છે અને સાથે આ ઋણ ઉતારવાનો એક સંકલ્પ પણ છે.” તેમણે આગળ લખ્યું કે, “દરેક કાર્યકર્તાની જવાબદારી છે કે આ નાની-નાની બાબતો પર ધ્યાન આપીએ અને ઘરે-ઘરે જઈને લોકોને જાગૃત કરીએ.”
નોંધવું જોઈએ કે ભાજપ અને ખાસ કરીને વડાપ્રધાન નરેન્દ્ર મોદીના સમર્થકોમાં એક મોટો વર્ગ નારીશક્તિનો પણ છે. છેલ્લાં વર્ષોમાં સરકારે સ્ત્રી સશક્તિકરણ ક્ષેત્રે કરેલાં કામોના પરિણામે કૉર વૉટર જૂથમાં મહિલાઓનો હિસ્સો પણ વધતો જ રહ્યો છે.
