ભારતના વડા પ્રધાન પીએમ મોદીની આગામી ઑસ્ટ્રેલિયા મુલાકાત પહેલા ફેસબુક પર તેમને જાનથી મારી નાખવાની ધમકી મળતા ઑસ્ટ્રેલિયન સત્તાવાળાઓએ તપાસ શરૂ કરી છે. આ ધમકી મેલબોર્નમાં યોજાનારા એક સામુદાયિક કાર્યક્રમના પ્રમોશનલ વિડીયોની કોમેન્ટ સેક્શનમાં આપવામાં આવી હતી.
આ ધમકી ‘અબુ મુસ્તફા’ (Abu Mustafa) નામનાં ફેસબુક એકાઉન્ટ પરથી આપવામાં આવી હતી. કોમેન્ટમાં લખવામાં આવ્યું હતું કે, “કાર્યક્રમ દરમિયાન સ્ટેડિયમની છત બંધ રાખવી વધુ સારું રહેશે, નહીં તો તેઓ પોતાના મોત તરફ આવી રહ્યા છે.” આ બાબત સામે આવતા જ સિક્યોરિટી એજન્સીઓ એલર્ટ થઈ ગઈ છે.
આ ધમકીભરી કોમેન્ટ મેલબોર્નના માર્વેલ સ્ટેડિયમમાં 9 જુલાઈએ યોજાનારા ‘મેલબોર્ન મીટ્સ મોદી’ (Melbourne Meets Modi) કાર્યક્રમની પોસ્ટ પર કરવામાં આવી હતી. અહેવાલો અનુસાર આ મામલો ફેડરલ પોલીસને સોંપવામાં આવ્યો હતો.
તપાસકર્તાઓએ આ ધમકીભરી પોસ્ટ કરનાર એકાઉન્ટનું IP એડ્રેસ શોધી કાઢ્યું છે અને આગળની તપાસ હાથ ધરી છે. જોકે, ઑસ્ટ્રેલિયન ફેડરલ પોલીસે આ મામલે સત્તાવાર રીતે વધુ ટિપ્પણી કરવાનો ઇનકાર કર્યો છે અને હજુ સુધી કોઈની ધરપકડની પુષ્ટિ થઈ નથી.
કોઈપણ દેશના વડા પ્રધાનની સુરક્ષાનો મામલો હોવાથી ઑસ્ટ્રેલિયન સુરક્ષા એજન્સીઓ આ ધમકીને ખૂબ જ ગંભીરતાથી લઈ રહી છે. વડા પ્રધાન મોદીની સુરક્ષા સુનિશ્ચિત કરવા માટે ઑસ્ટ્રેલિયન ફેડરલ પોલીસ, સ્ટેટ પોલીસ અને સ્પેશિયલ પ્રોટેક્ટિવ સિક્યોરિટી યુનિટ સહિતની અનેક એજન્સીઓ સાથે મળીને કામ કરી રહી છે.
વડા પ્રધાન નરેન્દ્ર મોદી 8થી 10 જુલાઈ દરમિયાન ઑસ્ટ્રેલિયા-ભારત વાર્ષિક લીડર્સ સમિટમાં ભાગ લેવા માટે મેલબોર્નની મુલાકાતે જવાના છે. આ મુલાકાત દરમિયાન તેઓ ઑસ્ટ્રેલિયાના વડા પ્રધાન એન્થોની અલ્બેનીઝ સાથે દ્વિપક્ષીય બેઠકો કરશે અને ભારતીય સમુદાયના લોકોને પણ સંબોધિત કરશે.
