ઓડિશાના બાલાસોરમાં એક કોલેજના કેમ્પસમાં એક વિદ્યાર્થિનીએ આત્મદાહનો પ્રયાસ કરતાં ચકચાર મચી ગઈ. વાસ્તવમાં તેણે એક શિક્ષક વિરુદ્ધ યૌનશોષણની ફરિયાદ કરી હતી. સંભવતઃ કાર્યવાહી ન થવાના કારણે તેણે આ પગલું ભર્યું હોય શકે.
આત્મદાહ કરવા જતાં વિદ્યાર્થિની 90% જેટલી દાઝી ગઈ હોવાનું મીડિયા અહેવાલોમાં જણાવવામાં આવી રહ્યું છે. તેને બચાવવા જતાં એક વિદ્યાર્થી પણ દાઝી ગયો હતો. બંનેને સારવાર માટે હોસ્પિટલ ખસેડવામાં આવ્યાં છે. યુવતીની હાલત ગંભીર છે.
#WATCH | Odisha | Balasore SP Raj Prasad says, "In the case of a female student who attempted self-immolation, prima facie evidence has been established against a teacher. He has been arrested and forwarded to the court. This student had lodged a complaint with the Internal… pic.twitter.com/ZvcmRHQ45u
— ANI (@ANI) July 12, 2025
મામલો ફકીર મોહન કોલેજનો છે. વિદ્યાર્થિની અહીં બીએડનો અભ્યાસ કરી રહી હતી. સહપાઠીઓનું કહેવું છે કે તે ઘણા સમયથી માનસિક તણાવમાં હતી. કારણ એ હતું કે HoD દ્વારા સતત હેરાન કરવામાં આવી રહી હતી. તે અઘટિત માંગણીઓ કરતો હતો અને જો નહીં માને તો અભ્યાસમાં નુકસાન કરવાની ધમકીઓ આપતો હતો.
આ મામલે વિદ્યાર્થિનીએ કોલેજ પ્રિન્સિપાલ અને સ્થાનિક પોલીસ બંનેને ફરિયાદ કરી હોવાનું કહેવાય છે, પરંતુ કોઈ કાર્યવાહી થઈ ન હતી. આ મામલે એક આંતરિક સમિતિ પણ બનાવવામાં આવી હતી, પણ તેનો પણ કોઈ વધુ ફેર ન પડ્યો.
ઘટનાના દિવસે પીડિત કોલેજ પ્રિન્સિપાલને મળવા માટે જ ગઈ હતી. ત્યારબાદ તેણે આ પગલું ભર્યું. ઘટનાને પગલે ઓડિશાના શિક્ષણ વિભાગે કાર્યવાહીના આદેશ આપ્યા હતા અને આરોપી HoDની ધરપકડ કરી લેવામાં આવી હતી. પ્રિન્સિપાલને સસ્પેન્ડ કરી દેવામાં આવ્યો છે. આ માટે સરકારે એક ટીમ પણ બનાવી છે, જે તપાસ કરીને રિપોર્ટ સોંપશે.
