અયોધ્યા રામ મંદિરમાં દાન ચોરીના આરોપી લવકુશ મિશ્રા સામે હવે તંત્ર કડક કાર્યવાહી કરવાની તૈયારીમાં છે. અયોધ્યા ડેવલપમેન્ટ ઓથોરિટીએ લવકુશ મિશ્રાની પત્નીના નામે બની રહેલા ₹1 કરોડથી વધુની કિંમતના આલીશાન મકાનને તોડી પાડવા માટે નોટિસ ફટકારી છે.
પરિવારને આ અંગે જવાબ આપવા માટે માત્ર એક અઠવાડિયાનો સમય આપવામાં આવ્યો છે. સમયમર્યાદા પૂર્ણ થાય ત્યાં સુધીમાં સંતોષકારક જવાબ ન અપાયો તો મકાન પર બુલડોઝર ફેરવી દેવામાં આવશે.
20 હજારની નોકરી અને દોઢ કરોડનું રોકાણ
ચોરીના આરોપી લવકુશ મિશ્રાની અસલિયત જોઈને દરેક વ્યક્તિ હેરાન છે. તે માત્ર ₹20,000ની માસિક નોકરી કરતો હતો, પરંતુ તેણે અયોધ્યાના શહાદતગંજ વિસ્તારમાં જયપુરિયા સ્કૂલ પાસે આશરે ₹1.5 કરોડનું રોકાણ કરી નાખ્યું હતું. તેણે ઑક્ટોબર 2025માં પોતાની પત્ની સુપ્રિયા મિશ્રાના નામે ₹25 લાખની જમીન ખરીદી હતી. ત્યારબાદ તેણે ત્યાં ખૂબ જ ઝડપથી એક આલીશાન મકાન બનાવવાનું શરૂ કરી દીધું હતું.
આજુબાજુના પાડોશીઓના જણાવ્યા પ્રમાણે, લવકુશ આ મકાન બનાવવા પાછળ અત્યાર સુધીમાં ₹80-90 લાખ પાણીની જેમ વહાવી ચૂક્યો છે. આ ત્રણ માળનું મકાન આગામી 3-4 મહિનામાં બનીને તૈયાર થઈ જવાનું હતું. આ મકાનના પહેલા માળ પર એક મોટું રસોડું, ચાર રૂમ અને લિફ્ટ લગાવવા માટે ખાસ જગ્યા છોડવામાં આવી હતી. જ્યારે બીજા માળ પર પાંચ રૂમ બનાવવામાં આવી રહ્યા હતા અને ત્રીજો માળ પણ ઊભો કરવાની પૂરેપૂરી તૈયારી હતી.
પોલીસ દરોડા બાદથી આખો પરિવાર ફરાર
રામ મંદિરમાં દાનની ચોરીનો ખુલાસો થયા બાદ પોલીસે લવકુશના ઘરે દરોડો પાડ્યો હતો. પોલીસે ત્યાંથી ₹14,25,000 રોકડા જપ્ત કર્યા હતા. લવકુશની ધરપકડ થતાં જ તેનો આખો પરિવાર ઘરને તાળું મારીને ફરાર થઈ ગયો છે. હાલમાં ત્યાં ચાલી રહેલું મકાનનું બાંધકામ સંપૂર્ણપણે બંધ છે અને તંત્ર હવે તેની આખી સંપત્તિની વિગતો ખોળી રહ્યું છે.
