કોંગ્રેસ નેતા અને લોકસભામાં વિપક્ષના નેતા રાહુલ ગાંધીને ભારતના મુખ્ય ન્યાયાધીશ (CJI) સૂર્યકાંત તરફથી મુલાકાત માટે સમય આપવામાં આવ્યો નથી. ન રાહુલ ગાંધી તથા રાજ્યસભામાં વિપક્ષના નેતા મલ્લિકાર્જુન ખડગેએ મતદાર યાદીઓની સ્પેશિયલ ઇન્ટેન્સિવ રિવિઝન (SIR) પ્રક્રિયા, કથિત ‘વોટચોરી’ અને મુખ્ય ચૂંટણી કમિશનર જ્ઞાનેશ કુમારનાં રાજીનામાંની માગ સહિતના મુદ્દાઓ પર ચર્ચા કરવા CJIને મળવાનો સમય માગ્યો હતો.
બંને નેતાઓએ 12 ઑક્ટોબરે સાંજે 4થી 5 વાગ્યાની વચ્ચે મુલાકાત માટે વિનંતી કરી હતી, જેથી તેઓ CJIને આવેદનપત્ર સુપરત કરી શકે. જોકે, સૂત્રોના જણાવ્યા અનુસાર CJIએ આ વિનંતીનો અસ્વીકાર કર્યો છે અને તેમને આ નિર્ણયનાં કારણો સમજાવતો જવાબ ઈમેઇલ દ્વારા મોકલવામાં આવ્યો છે.
CJI સૂર્યકાંતે જણાવ્યું છે કે વિપક્ષી નેતાઓ જે મુદ્દાઓ ઉઠાવવા માગે છે, તે પહેલેથી જ સુપ્રીમ કોર્ટમાં ન્યાયિક વિચારણા હેઠળ છે. આવી સ્થિતિમાં રાજકીય પક્ષોના પ્રતિનિધિમંડળને અલગથી મળવું યોગ્ય નહીં ગણાય. સૂત્રોને ટાંકીને કહેવાયું છે કે CJIએ એ પણ સ્પષ્ટ કર્યું છે કે વહીવટી ભૂમિકા હેઠળ સુપ્રીમ કોર્ટ સરકારની કામગીરીમાં હસ્તક્ષેપ કરી શકે નહીં.
જોકે, કોઈના મૂળભૂત અધિકારોનું ઉલ્લંઘન થતું હોવાની ફરિયાદ હોય તો કાયદાકીય માર્ગ અપનાવીને ન્યાયિક પક્ષે અરજી દાખલ કરી શકાય છે. SIR સંબંધિત મુદ્દાઓ પર પહેલેથી જ સુપ્રીમ કોર્ટમાં ચાલી રહેલી અરજીઓની સુનાવણી મંગળવારે થવાની છે અને નવી અરજી દાખલ થાય તો તેની સુનાવણી પણ સંબંધિત કેસો સાથે થઈ શકે છે.
CJI તરફથી મુલાકાત નકારવામાં આવી હોવા છતાં કોંગ્રેસના નેતૃત્વમાં ઇન્ડી ગઠબંધને સોમવાર, 12 ઑક્ટોબરે સુપ્રીમ કોર્ટ સુધી માર્ચ કરવાનું આયોજન કર્યું છે. કોંગ્રેસે આ કાર્યક્રમને ‘ચલો દિલ્હી – માર્ચ ફોર ડેમોક્રસી’ નામ આપ્યું છે. આયોજકોના કાર્યક્રમ મુજબ, બપોરે 1:30 વાગ્યે કનૉટ પ્લેસ-બરખંબા રોડ જંક્શન પરથી માર્ચ શરૂ થવાની છે.
ઇન્ડી ગઠબંધનના નેતાઓ સુપ્રીમ કોર્ટના મુખ્ય ન્યાયાધીશને આવેદનપત્ર આપીને SIR પ્રક્રિયા અટકાવવાની, કથિત ‘વોટચોરી’ મુદ્દે કાર્યવાહી કરવાની અને મુખ્ય ચૂંટણી કમિશનર જ્ઞાનેશ કુમારનાં રાજીનામાંની માગ રજૂ કરવા માગે છે.
રાહુલ ગાંધીએ માર્ચની જાહેરાત કરતા કહ્યું હતું કે વિવિધ પક્ષો, જાતિ, સમુદાય અને રાજ્યોના લોકો લોકશાહી તથા બંધારણના સમર્થનમાં એકસાથે આગળ આવશે. તેમણે અગાઉના દિલ્હીમાં કોકરોચો દ્વારા કરવામાં આવેલા પ્રદર્શનનો ઉલ્લેખ કરીને એવો ખોટો દાવો કર્યો હતો કે શાંતિપૂર્ણ રીતે વિરોધ કરી રહેલા લોકો સાથે ‘મારપીટ કરવામાં આવી હતી’.
માર્ચને ધ્યાનમાં રાખીને દિલ્હીમાં સુરક્ષા વ્યવસ્થા પણ કડક કરવામાં આવી છે. દિલ્હી મેટ્રો રેલ કોર્પોરેશન અનુસાર 12 ઑક્ટોબરે સવારે 6 વાગ્યાથી સાંજે 4 વાગ્યા સુધી છ મેટ્રો સ્ટેશનો, જનપથ, મંડી હાઉસ, બરખંબા રોડ, સેન્ટ્રલ સેક્રેટરિયેટ, રાજીવ ચોક અને પટેલ ચોક પર પ્રવેશ અને બહાર નીકળવાના દ્વાર બંધ રાખવામાં આવશે.
જોકે, આ સ્ટેશનો પર ઇન્ટરચેન્જની સુવિધા ચાલુ રહેશે. સુરક્ષા એજન્સીઓ પરિસ્થિતિની સમીક્ષા કરશે અને જરૂરિયાત મુજબ આગળની સૂચનાઓ જાહેર કરી શકે છે. માર્ચ દરમિયાન મધ્ય દિલ્હીના માર્ગો પર ટ્રાફિકની અવરજવર પણ પ્રભાવિત થવાની શક્યતા છે.
