NEET પેપર લીક વિવાદ બાદ કેન્દ્ર સરકારે નેશનલ ટેસ્ટિંગ એજન્સી (NTA) સામે અત્યાર સુધીની સૌથી મોટી આંતરિક કાર્યવાહી કરી છે. NTAના કુલ 47 અધિકારીઓને સેવામાંથી હટાવવામાં આવ્યા છે, જ્યારે કેટલાક અધિકારીઓ સામે ફોજદારી કાર્યવાહી પણ શરૂ કરવામાં આવશે તેવી માહિતી સામે આવી છે. આ પગલું પરીક્ષા વ્યવસ્થામાં પારદર્શિતા વધારવા અને વિશ્વસનીયતા પુનઃસ્થાપિત કરવા માટે લેવામાં આવ્યું હોવાનું જણાવવામાં આવી રહ્યું છે.
અહેવાલો અનુસાર કેન્દ્ર સરકાર NTAમાં વ્યાપક પુનર્ગઠન કરવાની તૈયારીમાં છે. પરીક્ષા પ્રક્રિયામાં ટેક્નોલોજીનો વધુ ઉપયોગ, આઉટસોર્સિંગ વ્યવસ્થામાં ફેરફાર અને જવાબદારી નક્કી કરવા જેવા સુધારાઓ પર પણ કામ ચાલી રહ્યું છે, જેથી ભવિષ્યમાં પેપર લીક જેવી ઘટનાઓ અટકાવી શકાય.
આ કાર્યવાહી એવા સમયે કરવામાં આવી છે જ્યારે NEET પેપર લીક મુદ્દે વિરોધ ચાલુ છે અને પરીક્ષા પ્રણાલીમાં સુધારાની માંગ ઉઠી રહી છે. સાથે જ કેન્દ્ર સરકારે પેપર લીક જેવા ગુનાઓ સામે વધુ કડક સજાની જોગવાઈ કરતું કાયદાકીય માળખું પણ આગળ ધપાવ્યું છે.
