તમિલનાડુના તિરુવલ્લુર જિલ્લામાં રવિવારે (21 જૂન) એક દુર્ઘટનામાં 7 મહિલા કર્મચારીઓનાં મોત નીપજ્યાં હતાં. પેરિયાપાલયમ નજીક આવેલા સેન્ટ પીટર એન્ડ પોલ સીફૂડ્સ એક્સપોર્ટ્સ નામના શ્રિમ્પ પ્રોસેસિંગ યુનિટમાં અમોનિયા ગેસ લીક થતાં અનેક કર્મચારીઓ અચાનક બેભાન થઈ ગયા હતા અને તેમની તબિયત બગડી હતી.
અહેવાલો અનુસાર ઘટનાની જાણ થતાં જ અસરગ્રસ્ત કર્મચારીઓને નજીકની હોસ્પિટલોમાં ખસેડવામાં આવ્યા હતા. તિરુવલ્લુર જિલ્લા કલેક્ટર એસ. કવિતાના જણાવ્યા અનુસાર કુલ 67 કર્મચારીઓને સારવાર માટે હોસ્પિટલમાં દાખલ કરવામાં આવ્યા હતા. તેમાંના 46 લોકોને વેલ્સ હોસ્પિટલ અને 21 લોકોને વેંકટેશ્વરા હોસ્પિટલમાં સારવાર આપવામાં આવી રહી છે. ગંભીર હાલતમાં રહેલા 9 દર્દીઓને વધુ સારવાર માટે ચેન્નઈની ગવર્નમેન્ટ સ્ટેનલી મેડિકલ કોલેજ હોસ્પિટલમાં ખસેડવામાં આવ્યા હતા.
અમોનિયા ગેસ લીકની માહિતી મળતાં જ અરક્કોનમ સ્થિત NDRFની ચોથી બટાલિયનને એલર્ટ કરવામાં આવી હતી અને તાત્કાલિક રાહત તથા બચાવ કામગીરી શરૂ કરવામાં આવી હતી. ઘટનાને પગલે સમગ્ર વિસ્તારમાં ચિંતા અને ગભરાટનો માહોલ સર્જાયો હતો.
મુખ્યમંત્રી સી. જોસેફ વિજયે ઘટનાને ગંભીરતાથી લઈ મૃતકોના પરિવારજનોને ₹2 લાખની આર્થિક સહાય આપવાની જાહેરાત કરી છે. સાથે જ ઘાયલોને શ્રેષ્ઠ સારવાર ઉપલબ્ધ કરાવવાનો નિર્દેશ પણ આપ્યો છે. તેમણે રાજ્યભરની જોખમી ઔદ્યોગિક એકમોની તપાસ કરવાનો આદેશ આપતાં કહ્યું છે કે ભવિષ્યમાં આવી દુર્ઘટનાઓ ફરી ન બને તે માટે જરૂરી પગલાં લેવામાં આવશે.
ઘટનાની તપાસ માટે રાજ્ય સરકારે ત્રણ સભ્યોની સમિતિની રચના કરી છે. આ સમિતિમાં ડિરેક્ટર ઑફ ઇન્ડસ્ટ્રિયલ સેફ્ટી એન્ડ હેલ્થ, પ્રદૂષણ નિયંત્રણ બોર્ડના સભ્ય સચિવ અને જાહેર આરોગ્ય વિભાગના અધિક નિયામકનો સમાવેશ કરવામાં આવ્યો છે. સમિતિને 24 કલાકમાં પ્રાથમિક અહેવાલ અને 3 દિવસમાં અંતિમ અહેવાલ રજૂ કરવાનો આદેશ આપવામાં આવ્યો છે.
મુખ્યમંત્રીએ રાજ્યના IT મંત્રી અને તિરુવલ્લુર જિલ્લાના મોનિટરિંગ અધિકારીઓને પણ અસરગ્રસ્ત વિસ્તારની મુલાકાત લઈને જિલ્લા વહીવટીતંત્ર સાથે સંકલન સાધવા અને રાહત કામગીરી પર નજર રાખવાનો નિર્દેશ આપ્યો છે.
પ્રાથમિક માહિતી અનુસાર પ્લાન્ટમાં અમોનિયા ગેસ લીક થયા બાદ કર્મચારીઓને શ્વાસ લેવામાં તકલીફ, ચક્કર અને બેભાન થવાની ફરિયાદો શરૂ થઈ હતી. જોકે ગેસ લીક કેવી રીતે થઈ અને તેની પાછળનું ચોક્કસ કારણ શું હતું તે તપાસ બાદ જ સ્પષ્ટ થશે.
