17 ઑગસ્ટ, 2025ના રોજ, ભારતીય જનતા પાર્ટીના (BJP) રાષ્ટ્રીય અધ્યક્ષ જેપી નડ્ડાએ જાહેરાત કરી કે મહારાષ્ટ્રના રાજ્યપાલ સીપી રાધાકૃષ્ણન (CP Radhakrishnan) રાષ્ટ્રીય લોકતાંત્રિક ગઠબંધનના (NDA) ઉપરાષ્ટ્રપતિ પદના ઉમેદવાર (Vice President Candidate) તરીકે નામાંકિત કરાયા છે. આ નિર્ણય નવી દિલ્હીમાં વડાપ્રધાન નરેન્દ્ર મોદીની અધ્યક્ષતામાં યોજાયેલી સંસદીય બોર્ડની બેઠકમાં લેવાયો. બેઠકમાં ગૃહમંત્રી અમિત શાહ, સંરક્ષણ મંત્રી રાજનાથ સિંઘ અને અન્ય વરિષ્ઠ નેતાઓ હાજર હતા. આ નામાંકન ન માત્ર રાધાકૃષ્ણનની રાજકીય કુશળતાને પ્રતિબિંબિત કરે છે, પરંતુ ભાજપની દક્ષિણ ભારત, ખાસ કરીને તમિલનાડુમાં પોતાની સ્થિતિ મજબૂત કરવાની રણનીતિનો પણ ભાગ છે.
સીપી રાધાકૃષ્ણનનો જન્મ તમિલનાડુના તિરુપ્પુરમાં એક મધ્યમવર્ગના ગાઉન્ડર સમુદાયમાં થયો હતો, જે પશ્ચિમ તમિલનાડુના કોઈમ્બતુર, તિરુપ્પુર અને ઈરોડ જિલ્લાઓમાં પ્રભાવશાળી છે. આ સમુદાય તેની સામાજિક અને આર્થિક શક્તિ માટે જાણીતો છે, અને રાધાકૃષ્ણનનું આ સમુદાય સાથેનું જોડાણ તેમની રાજકીય કારકિર્દીમાં મહત્વનું રહ્યું છે. શિક્ષણ ઉપરાંત, તેમનો રમતગમત પ્રત્યેનો ઝુકાવ તેમની ઉર્જાશીલ અને શિસ્તબદ્ધ વ્યક્તિત્વને દર્શાવે છે. તેમનું કૌટુંબિક જીવન સાદું અને સ્થિર રહ્યું છે, જે તેમની જાહેર જીવનની સ્વચ્છ છબીને પૂરક બનાવે છે.
વ્યક્તિગત જીવન
ચંદ્રપુરમ પોન્નુસામી રાધાકૃષ્ણનનો જન્મ 4 મે, 1957ના (કેટલાક સ્ત્રોતોમાં 20 ઑક્ટોબર, 1957) રોજ તમિલનાડુના તિરુપ્પુરમાં ઓબીસી ગાઉન્ડર સમુદાયમાં થયો હતો. તેમણે થૂથુકુડીની વી.ઓ. ચિદમ્બરમ કોલેજમાંથી બેચલર ઑફ બિઝનેસ એડમિનિસ્ટ્રેશનની (BBA) ડિગ્રી મેળવેલી છે. રાધાકૃષ્ણન રમતગમતમાં પણ ઉત્સાહી રહ્યા છે, તેઓ ટેબલ ટેનિસમાં કોલેજ ચેમ્પિયન રહ્યા અને લાંબા અંતરની દોડ, ક્રિકેટ તથા વોલીબોલનો શોખ ધરાવે છે. 1985માં તેમણે આર. સુમતિ સાથે લગ્ન કર્યા હતા. સંતાનોમાં તેમને એક પુત્ર અને એક પુત્રી છે.
રાજકીય યાત્રા
સીપી રાધાકૃષ્ણનની રાજકીય કારકિર્દી એક પ્રેરણાદાયી યાત્રા છે, જે 16 વર્ષની ઉંમરે રાષ્ટ્રીય સ્વયંસેવક સંઘ (RSS) અને ભારતીય જનસંઘ (BJPનો પૂર્વગામી) સાથેના જોડાણથી શરૂ થઈ હતી. તેમની સમર્પણ, સંગઠનાત્મક કુશળતા અને નીચેના સ્તરે કામ કરવાની શૈલીએ તેમને ભાજપના અગ્રણી નેતાઓમાં સ્થાન અપાવ્યું છે.
RSSમાં જોડાણ
રાધાકૃષ્ણન 16 વર્ષની ઉંમરે RSS સાથે જોડાયા હતા. આ દરમિયાન તેમણે RSSના વિવિધ કાર્યક્રમોમાં સક્રિય ભાગ લીધો અને હિંદુત્વની વિચારધારાને ગ્રામીણ અને શહેરી વિસ્તારોમાં ફેલાવવામાં યોગદાન આપ્યું હતું. ભારતીય જનસંઘ અને પછી ભાજપમાં તેમની વિવિધ સ્તરની કામગીરીએ તેમને પક્ષના નેતૃત્વનું ધ્યાન ખેંચ્યું.
લોકસભા સાંસદ તરીકે (1998-2004)
1998માં કોઈમ્બતુરમાં થયેલા શ્રેણીબદ્ધ બૉમ્બ વિસ્ફોટોમાં 58 લોકોના મોત થયા હતા. આ ઘટનાએ રાજકીય વાતાવરણ બદલી નાખ્યું હતા. આ પડકારજનક સંજોગોમાં ભાજપે રાધાકૃષ્ણનને કોઈમ્બતુરથી લોકસભા ચૂંટણીમાં ઉમેદવાર બનાવ્યા. તેમણે આ ચૂંટણી જીતી અને 1999માં ફરીથી વિજય મેળવ્યો, જે તેમની લોકપ્રિયતા અને સ્થાનિક સ્તરે સમર્થનનો પુરાવો હતો. સંસદમાં તેમણે રેલવે, રસ્તા અને રમતગમત સહિતની વિવિધ સમિતિઓમાં સેવા આપી હતી.
UN જનરલ એસેમ્બલીમાં કર્યું નેતૃત્વ (2003)
2003માં તેમણે યુનાઈટેડ નેશન્સ જનરલ એસેમ્બલીમાં ભારતીય સંસદીય પ્રતિનિધિમંડળના સભ્ય તરીકે ભાગ લીધો હતો, જે તેમની આંતરરાષ્ટ્રીય સ્તરે રજૂઆતની ક્ષમતા દર્શાવે છે. આ દરમિયાન તેમણે સામાજિક મુદ્દાઓ, ખાસ કરીને આતંકવાદ અને રાષ્ટ્રીય એકતા પર ધ્યાન કેન્દ્રિત કર્યું હતું.
તમિલનાડુ ભાજપના અધ્યક્ષ (2004-2007)
2004થી 2007 સુધી, રાધાકૃષ્ણન તમિલનાડુ રાજ્યમાં ભાજપના અધ્યક્ષ તરીકે સેવા આપી. તમિલનાડુ, જ્યાં દ્રવિડ પક્ષોનું (DMK અને AIADMK) વર્ચસ્વ રહ્યું છે, ત્યાં ભાજપની હાજરી મજબૂત કરવી એક પડકારજનક કાર્ય હતું. રાધાકૃષ્ણનના નેતૃત્વમાં પક્ષે સ્થાનિક સ્તરે સંગઠનાત્મક નેટવર્ક વિસ્તાર્યું અને ગાઉન્ડર સમુદાય સહિત વિવિધ સમુદાયો સાથે સંબંધો મજબૂત કર્યા.
2004માં તેમણે એક મહત્વાકાંક્ષી રથયાત્રા હાથ ધરી, જે 93 દિવસ સુધી ચાલી અને 19000 કિલોમીટરના વિસ્તારને કવર કર્યો હતો. આ યાત્રાના ત્રણ મુખ્ય ઉદ્દેશ્યો હતા. જેમાં ભારતની નદીઓને જોડવાની હિમાયત, અસ્પૃશ્યતા નાબૂદ કરવા માટે જાગૃતિ અને આતંકવાદ વિરુદ્ધ લોકોને એકજૂટ કરવાનો સમાવેશ થાય છે. આ યાત્રાએ રાધાકૃષ્ણનને રાષ્ટ્રીય સ્તરે ચર્ચામાં લાવ્યા અને તેમની સામાજિક અને રાજકીય પ્રતિબદ્ધતાને રેખાંકિત કરી.
વહીવટી ભૂમિકાઓ
રાધાકૃષ્ણનની વહીવટી ક્ષમતાઓ તેમની વિવિધ ભૂમિકાઓમાં સ્પષ્ટ થાય છે.
કોઈર બોર્ડના અધ્યક્ષ (2016-2020)
રાધાકૃષ્ણનના નેતૃત્વમાં કોઈર ઉદ્યોગે (નાળિયેરના રેસામાંથી બનતા ઉત્પાદનો) નિકાસમાં રેકોર્ડ વૃદ્ધિ હાંસલ કરી. તેમણે આ ઉદ્યોગને આધુનિક બનાવવા અને નવી બજારોમાં પ્રવેશવા માટે નવીન યોજનાઓ અમલમાં મૂકી, જેનાથી ગ્રામીણ અર્થતંત્રને ફાયદો થયો.
ભાજપના કેરળ પ્રભારી (2020-2022)
કેરળમાં ભાજપની રાજકીય હાજરી મર્યાદિત રહી છે, ત્યાં રાધાકૃષ્ણને પક્ષની સ્થિતિ મજબૂત કરવાનું કાર્ય સોંપાયું હતું. તેમણે સ્થાનિક નેતાઓ સાથે સંકલન કરીને પક્ષના આધારને વિસ્તારવા પ્રયાસો કર્યા, જોકે આ રાજ્યમાં હજુ પણ ભાજપ માટે પડકારો રહેલા છે. કારણ કે આ વિસ્તારમાં દ્રવિડ પક્ષોના મહત્વની સાથે સામ્યવાદી વિચારધારાનો પ્રભાવ અને ખ્રિસ્તી મિશનરીઓ પણ પડકાર ઉભો કરી રહી છે.
રાજ્યપાલ તરીકે સેવા
રાધાકૃષ્ણન ફેબ્રુઆરી 2023 – જુલાઈ 2024 સુધી ઝારખંડના રાજ્યપાલ તરીકે કાર્યરત રહ્યા. ત્યારે બાદ તેમણે તેલંગાણા અને પોંડીચેરીમાં પણ રાજ્યપાલ તરીકે સેવા આપેલી છે. હાલમાં તેઓ મહારાષ્ટ્રના રાજ્યપાલ છે, જે ભારતના સૌથી મહત્વના રાજ્યોમાંનું એક છે. આ પદ પર તેમની નિમણૂક તેમની વહીવટી યોગ્યતાનો પુરાવો છે.
વિવાદો
રાધાકૃષ્ણનની રાજકીય કારકિર્દી મોટાભાગે વિવાદમુક્ત રહી છે, જે ભારતીય રાજકારણમાં દુર્લભ છે. જોકે, 2012માં એક RSS સ્વયંસેવક પર હુમલાના વિરોધમાં મેટ્ટુપાલયમમાં ધરણાં કરવા બદલ તેમની ધરપકડ થઈ હતી. આ ઘટના સિવાય તેમની છબી સ્વચ્છ અને સમર્પિત નેતા તરીકે રહી છે.
ઉપરાષ્ટ્રપતિ પદનું નામાંકન
9 સપ્ટેમ્બર, 2025ના રોજ યોજાનારી ઉપરાષ્ટ્રપતિની ચૂંટણી માટે સીપી રાધાકૃષ્ણનનું નામાંકન એનડીએની રાજકીય રણનીતિનું પરિણામ છે. આ નામાંકન 2026ની તમિલનાડુ વિધાનસભા ચૂંટણી પહેલાં ભાજપની સ્થિતિ મજબૂત કરવાનો પ્રયાસ છે. રાધાકૃષ્ણનને ‘કોઈમ્બતુરના વાજપેયી’ તરીકે ઓળખવામાં આવે છે, જે તેમની ગ્રાઉન્ડ સ્તરે કામગીરી, નિષ્ઠા અને નૈતિકતાને દર્શાવે છે. આ છબિ તેમને ઉપરાષ્ટ્રપતિ જેવા ઉચ્ચ બંધારણીય પદ માટે યોગ્ય ઉમેદવાર બનાવે છે.
ઝારખંડ, તેલંગાણા, પોંડીચેરી અને મહારાષ્ટ્રમાં રાજ્યપાલ તરીકેનો તેમનો અનુભવ તેમની વિવિધ રાજકીય અને સામાજિક પરિસ્થિતિઓનો સામનો કરવાની ક્ષમતા દર્શાવે છે. ઉપરાષ્ટ્રપતિ રાજ્યસભાના અધ્યક્ષ પણ હોય છે, આવી સ્થિતિમાં આ કુશળતા ખૂબ મહત્વની છે. જે. પી. નડ્ડાએ જણાવ્યું કે આ નામાંકન એનડીએના સાથી પક્ષો સાથે વ્યાપક ચર્ચા બાદ નક્કી થયું છે. નડ્ડાએ વિપક્ષી પક્ષો સાથે પણ સંપર્ક કરવાની ઈચ્છા વ્યક્ત કરી, જેથી ચૂંટણી સર્વસંમતિથી થઈ શકે. આ રાજકીય સમજણ અને સર્વસમાવેશક અભિગમને દર્શાવે છે.
સીપી રાધાકૃષ્ણનની રાજકીય યાત્રા એક સામાન્ય કાર્યકરથી ઉપરાષ્ટ્રપતિ પદના ઉમેદવાર સુધીની પ્રેરણાદાયી વાર્તા છે. તેમની સમર્પણ, વહીવટી કુશળતા, સ્વચ્છ છબિ અને સામાજિક મુદ્દાઓ પ્રત્યેની પ્રતિબદ્ધતાએ તેમને ભારતીય રાજકારણમાં એક વિશિષ્ટ સ્થાન અપાવ્યું છે. 9 સપ્ટેમ્બર, 2025ની ઉપરાષ્ટ્રપતિ ચૂંટણી માત્ર તેમની કારકિર્દીનો નવો અધ્યાય નહીં લખે, પરંતુ ભાજપ અને એનડીએની દક્ષિણ ભારતમાં વિસ્તરણની યોજનાને પણ આગળ વધારશે.
