Friday, April 12, 2024
More
    હોમપેજગુજરાતકાગળ-લેખિત દસ્તાવેજોના દિવસો ગયા, હવે પેપરલેસ બનશે ગુજરાત વિધાનસભાની કામગીરી: રાષ્ટ્રપતિ દ્રૌપદી...

    કાગળ-લેખિત દસ્તાવેજોના દિવસો ગયા, હવે પેપરલેસ બનશે ગુજરાત વિધાનસભાની કામગીરી: રાષ્ટ્રપતિ દ્રૌપદી મુર્મુ કરશે ઉદ્ઘાટન

    ડિજિટલ વિધાનસભા માટે અને પેપરલેસ સત્રની સુવિધા માટે ધારાસભ્યોને ટેબલેટ આપવામાં આવશે. ઈ-વિધાનસભાને ધ્યાને લઈને આગામી પ્રક્રિયાના ભાગરૂપે ધારાસભ્યોને તૈયાર કરવા માટે વિશેષ તાલીમ સત્રો પણ યોજવામાં આવ્યાં હતાં.

    - Advertisement -

    રાષ્ટ્રપતિ દ્રૌપદી મુર્મુ આ અઠવાડિયે ગુજરાત આવી રહ્યાં છે. વિધાનસભા અધ્યક્ષ શંકર ચૌધરીએ દિલ્હી જઈને રાષ્ટ્રપતિને આમંત્રણ પાઠવ્યું હતું. રાષ્ટ્રપતિ 12 સપ્ટેમ્બરે સાંજના સમયે હવાઈ માર્ગે અમદાવાદ એરપોર્ટ પહોંચશે. 13 સપ્ટેમ્બરના રોજ તેઓ ઈ-વિધાનસભાનું ઉદ્ઘાટન કરશે. ઈ-વિધાનસભામાં કાગળ-લેખિત દસ્તાવેજોની જગ્યા ઈલેક્ટ્રોનિક ઉપકરણો લેશે. નોંધનીય છે કે ગુજરાત વિધાનસભા આગામી સત્રથી સંપૂર્ણપણે ઇલેક્ટ્રોનિક માધ્યમથી સંચાલિત થશે.

    12મી સપ્ટેમ્બરે દેશના રાષ્ટ્રપતિ દ્રોપદી મુર્મુ ગુજરાત આવશે અને અને 13મી સપ્ટેમ્બરે ઈ-વિધાનસભાનું ઉદ્ઘાટન કર્યા બાદ તેઓ વિધાનસભામાં તમામ સભ્યોને સંબોધિત કરશે. આ ઉપરાંત રાષ્ટ્રપતિ રાજભવન ખાતેથી ઈ-વિધાન એપ્લિકેશન-NEVAનું લોન્ચિંગ કરશે. આગામી 13 સપ્ટેમ્બરથી ગુજરાત વિધાનસભાનું ચોમાસુ સત્ર ચાલુ થવા જઈ રહ્યું છે. આ સત્ર સંપૂર્ણપણે ડિજિટલ અને પેપરલેસ હશે.

    શું છે NEVA એપ્લિકેશન?

    NEVA એપ્લિકેશન એક વર્ક-ફ્લો સિસ્ટમ છે. તે ગૃહના અધ્યક્ષને ગૃહની કાર્યવાહીને સરળ રીતે ચલાવવામાં અને ગૃહના કાયદાકીય કામોને પેપરલેસ પ્રક્રિયાથી ચલાવવામાં મદદ કરે છે. NEVA એ એક ઉપકરણ તટસ્થ અને સભ્ય-કેન્દ્રિત એપ્લિકેશન છે. આ એપ્લિકેશન સભ્યોને સંપર્ક વિગતો, પ્રક્રિયાના નિયમો, વ્યવસાયની સૂચી, સૂચનાઓ, બુલેટિન, બિલ, તારાંકિત અને અતારાંકિત પ્રશ્નોની સંપૂર્ણ માહિતી દાખલ કરીને ગૃહને ડિજિટલી સંચાલિત કરવામાં મદદરૂપ થશે.

    - Advertisement -

    ચોમાસું સત્રમાં કયા બિલ પસાર થવાની સંભાવના?

    ગુજરાત વિધાનસભાનું ચોમાસું સત્ર 13 સપ્ટેબરથી શરૂ થશે. આગામી વિધાનસભાના સત્રમાં 9 જેટલા બિલ પસાર થવાની સંભાવના છે. જેમાં કોમન યુનિવર્સિટી એક્ટનો પણ સમાવેશ થાય છે, આ બિલનો મુખ્ય ઉદ્દેશ્ય ખાનગી યુનિવર્સિટીઓ માટે કડક નિયમો અને 27% અનામત માટેની દરખાસ્ત રજૂ કરવાનો છે. આ સિવાય પણ એજન્ડામાં અન્ય ઘણા બિલો પસાર થવાની સંભાવના છે, જેમાં બાળકોની યુનિવર્સિટીની સ્થાપના, ગુજરાત વીજળી ક્ષેત્રને લગતા નિયમ, પાવાગઢ-ચાંપાનેર હેરિટેજ સાઇટ સંબંધિત કાયદો અને કૃષિ યુનિવર્સિટી માટેના સુધારાને લગતા બિલોનો સમાવેશ થાય છે.

    ઉલ્લેખનીય છે કે ડિજિટલ વિધાનસભા માટે અને પેપરલેસ સત્રની સુવિધા માટે ધારાસભ્યોને ટેબલેટ આપવામાં આવશે. ઈ-વિધાનસભાને ધ્યાને લઈને આગામી પ્રક્રિયાના ભાગરૂપે ધારાસભ્યોને તૈયાર કરવા માટે વિશેષ તાલીમ સત્રો પણ યોજવામાં આવ્યાં હતાં.

    - Advertisement -

    સંબંધિત લેખો

    - Advertisement -

    તાજા સમાચાર

    ચૂકશો નહીં