ભાવનગર શહેરમાં અશાંતધારા અધિનિયમના ઉલ્લંઘનનો પ્રથમ કેસ નોંધાયો છે. આ કેસ રાજ્યમાં અમદાવાદ પછી બીજો અને સૌરાષ્ટ્ર તથા ભાવનગર શહેરમાં પ્રથમ છે. ક્રેસન્ટ વિસ્તારમાં એક મકાન કલેક્ટર/એસડીએમની અગાઉની પરવાનગી વગર વેચી દેવામાં આવ્યું હોવાના આરોપસર ફરિયાદ નોંધાઈ છે. આ ઘટના અશાંતધારાના કડક અમલીકરણના ભાગરૂપે મહત્વની ગણાઈ રહી છે.ઘ
ભાવનગર શહેરના ક્રેસન્ટ વિસ્તારમાં આવેલ વોર્ડ નંબર 5, શીટ નંબર 135, સિટી સરવે નંબર 4463, પ્લોટ નંબર 567-A/1માં આવેલા એક મકાનનું હસ્તાંતરણ અશાંતધારા હેઠળ આવતા વિસ્તારમાં કરવામાં આવ્યું હતું. આ વિસ્તારમાં અશાંતધારો અમલમાં છે, જે અનુસાર કોઈપણ મિલકતનું હસ્તાંતરણ કરવા માટે કલેક્ટર અથવા એસડીએમની અગાઉની લેખિત પરવાનગી ફરજિયાત છે.
અહેવાલ મુજબ દર્શરાજસિંહ ધર્મેન્દ્રસિંહ ગોહિલે અલ્લારખભાઈ કદરભાઈ ગીગાણીને તા. 26 ઑગસ્ટ, 2025ના રોજ સેલ એગ્રીમેન્ટ કરીને મકાન વેચ્યું હતું. સત્તાખત પણ કરાવવામાં આવ્યું હતું અને ₹93 લાખની સંપૂર્ણ રકમ ચૂકવાઈ ગઈ હતી. ત્યારબાદ મકાનનો કબજો પણ ખરીદદારને સોંપી દેવામાં આવ્યો હતો. જોકે, અશાંતધારો લાગુ હોવા છતાં કોઈ પરવાનગી લેવામાં આવી નહોતી.
વેચનારે સપ્ટેમ્બર 11, 2025ના રોજ પરવાનગી માટે અરજી કરી હતી, પરંતુ તપાસ અને સુનાવણી બાદ તા. 17 ફેબ્રુઆરી, 2026ના રોજ તે અરજી નકારી કાઢવામાં આવી હતી. તેમ છતાં મિલકતનું હસ્તાંતરણ અને કબજો આપી દેવામાં આવ્યો હોવાથી અધિનિયમની કલમ 4 અને 5નું ઉલ્લંઘન થયું છે.
પોલીસ ફરિયાદ અને કાર્યવાહી
સિટી મામલતદાર કે.બી. ચાંદલીયાએ દસ્તાવેજોની તપાસ દરમિયાન આ ઉલ્લંઘનની નોંધ લીધી અને ઘોઘા રોડ પોલીસ સ્ટેશનમાં ફરિયાદ નોંધાવી હતી. પોલીસે વેચનાર દર્શરાજસિંહ ગોહિલ, ખરીદદાર અલ્લારખભાઈ ગીગાણી અને અન્ય સંડોવાયેલા વ્યક્તિઓ સામે ગુનો નોંધ્યો છે. ભાવનગરના સિટી DYSP આર.આર. સિંઘલે જણાવ્યું હતું કે, “આ વિસ્તારમાં અશાંતધારો લાગુ હોવા છતાં સરકારી પરવાનગી વગર મિલકત વેચાઈ હોવાનું જાણવા મળતાં અશાંતધારાના ઉલ્લંઘન બદલ ફરિયાદ નોંધાઈ છે. તપાસમાં ખુલાસો થયો કે મકાન ₹93 લાખમાં વેચાયું અને ખરીદદારને કબજો આપવામાં આવ્યો છે.”
તેમણે વધુમાં કહ્યું કે, “આ ભાવનગરમાં અશાંતધારાના ઉલ્લંઘનનો પ્રથમ કેસ છે અને રાજ્યમાં બીજો કેસ છે.” લોકલ ક્રાઈમ બ્રાન્ચ (LCB) દ્વારા આગળની તપાસ હાથ ધરવામાં આવી છે. વેચનાર અને ખરીદદારને પૂછપરછ માટે હાજર કરવામાં આવ્યા છે. ₹93 લાખના નાણાકીય વ્યવહારોની પણ તપાસ કરવામાં આવશે.
પૃષ્ઠભૂમિ અને મહત્વ
ભાવનગર શહેરના કેટલાક વિસ્તારોમાં 2023-2024માં અશાંતધારો લાગુ કરવામાં આવ્યો હતો, જેમાં ક્રેસન્ટ વિસ્તારનો પણ સમાવેશ થાય છે. આ કાયદો કોમી રમખાણોના વિસ્તારોમાં મિલકતની ગેરકાયદેસર તબદીલી અટકાવવા માટે અમલમાં છે. અમદાવાદ, વડોદરા, સુરત જેવા શહેરોમાં પહેલેથી જ અમલ છે.
