અલ્હાબાદ હાઇકોર્ટે કોર્ટ રૂમમાં તોડફોડ અને સરકારી વકીલો સાથે મારપીટ કરવાના મામલે કડક વલણ અપનાવ્યું છે. હાઇકોર્ટે 28 ઑક્ટોબરના રોજ થયેલી ઘટનામાં સામેલ વકીલો સામે FIR નોંધવા અને તેમની વિરુદ્ધ કોર્ટની અવમાનનાની કાર્યવાહી શરૂ કરવાની ભલામણ કરી છે. આ ઉપરાંત, ઘટનાને લઈને સોશિયલ મીડિયા પર ખોટી માહિતી ફેલાવનારા લોકો સામે પણ FIR નોંધવા અને વાંધાજનક પોસ્ટ દૂર કરવા સૂચનો કર્યા છે.
જસ્ટિસ અજય ભનોટ અને જસ્ટિસ દિવેશ ચંદ્ર સામંતની બેન્ચે આ મામલે 29 પાનાંનો આદેશ આપ્યો છે. હવે આગળની કાર્યવાહી માટે આ મામલો હાઇકોર્ટના ચીફ જસ્ટિસ સમક્ષ મોકલવામાં આવ્યો છે. હાઇકોર્ટના મતે વકીલોનું આ પ્રકારનું વર્તન માત્ર વિરોધ નથી, પરંતુ ન્યાયવ્યવસ્થાને અસર કરતી ગંભીર બાબત છે.
સમગ્ર વિવાદની શરૂઆત ક્યાંથી થઈ?
નોંધનીય છે કે આ વિવાદની શરૂઆત 27 ઑક્ટોબર, 2026ના રોજ થઈ હતી. અલ્હાબાદ હાઇકોર્ટ બાર એસોસિએશનના કેટલાક હોદ્દેદારોએ ચીફ જસ્ટિસને પત્ર લખીને જસ્ટિસ અજય ભનોટ વિરુદ્ધ ફરિયાદ કરી હતી. વકીલોનો આરોપ હતો કે કોર્ટ રૂમમાં વકીલો માટે અનામત રાખવામાં આવેલી સીટ પર એક પોલીસ અધિકારી બેઠેલા હતા. જ્યારે એક વકીલે આ બાબતે વાંધો ઉઠાવ્યો ત્યારે જજે તે વકીલ સાથે ખરાબ વર્તન કર્યું અને તેમને પોલીસ અધિકારીની માફી માગવા દબાણ કર્યું.
બાર એસોસિએશને એવો પણ આરોપ લગાવ્યો હતો કે જજે વકીલને જેલમાં મોકલવાની ધમકી પણ આપી. બાર એસોસિએશનની ફરિયાદ બાદ હાઇકોર્ટની બેન્ચે આ સમગ્ર મામલે વાસ્તવિકતા જણાવી હતી. બેન્ચે જણાવ્યું હતું કે જે વકીલ સાથે ખરાબ વર્તન થયું હોવાનો આરોપ હતો, તેમણે પોતે કોર્ટમાં હાજર થઈને સ્પષ્ટતા કરી હતી કે જજે તેમનું અપમાન નથી કર્યું.
28 ઑક્ટોબરે વકીલોએ કોર્ટ રૂમમાં હોબાળો કર્યો
આ વિવાદના બીજા દિવસે એટલે કે 28 ઑક્ટોબરે કેટલાક વકીલો કોર્ટ રૂમ નંબર 49માં એકઠા થયા, સૂત્રોચ્ચાર શરૂ કર્યા અને કોર્ટની કાર્યવાહી અટકાવી દીધી. પરિણામે ન્યાયાધીશોને કોર્ટની કાર્યવાહી અટકાવીને પોતાની ચેમ્બરમાં જવાની ફરજ પડી હતી. ત્યારબાદ કેટલાક વકીલોએ કોર્ટ રૂમમાં ખુરશીઓ અને અન્ય ફર્નિચરની તોડફોડ કરી હતી.
હાઇકોર્ટના આદેશ મુજબ, આ દરમિયાન સરકારી વકીલો, કોર્ટના કર્મચારીઓ અને સુરક્ષા કર્મચારીઓ સાથે પણ મારપીટ કરવામાં આવી હતી. આ ઘટનામાં સરકારી વકીલોને પણ માર મારવામાં આવ્યો હોવાનો આરોપ છે. હાઇકોર્ટના આદેશ મુજબ સરકારી વકીલ પરિતોષ માલવિયાએ જજોની ચેમ્બરમાં જઈને આરોપ લગાવ્યો હતો કે કેટલાક વકીલોએ તેમની સાથે મારપીટ કરી હતી અને રાજ્ય સરકાર તરફથી કેસ લડવા બદલ ધમકી પણ આપી હતી.
સોશિયલ મીડિયા પર ખોટી માહિતી ફેલાવનારાઓ સામે પણ કાર્યવાહી
આ ઉપરાંત હાઇકોર્ટે આ મામલે સોશિયલ મીડિયા પર ફેલાવવામાં આવેલી ખોટી માહિતી સામે પણ વાંધો ઉઠાવ્યો હતો. કોર્ટના જણાવ્યા મુજબ અધૂરી માહિતી ફેલાવીને જજ અને કોર્ટની છબી ખરાબ કરવાનો પ્રયાસ થયો હતો. આથી આવી પોસ્ટ કરનારા લોકો સામે FIR નોંધવા અને તેને દૂર કરવા ભલામણ કરાઈ છે. કોર્ટે સ્પષ્ટ કર્યું કે વકીલોને કાયદાકીય વિરોધનો અધિકાર છે, પણ હિંસા અને તોડફોડ કરવી અયોગ્ય છે.
હાઇકોર્ટની બેન્ચે જણાવ્યું કે વકીલો અને જજો વચ્ચેના મતભેદનો ઉકેલ ચર્ચા અને કાયદાકીય પ્રક્રિયાથી જ આવવો જોઈએ. કોર્ટમાં હિંસા અને ધમકીથી ન્યાયવ્યવસ્થાની સ્વતંત્રતા પર માઠી અસર પડે છે. આથી માત્ર સુમેળ જાળવવાના નામે આવી ગંભીર ઘટનાને અવગણી શકાય નહીં.
હવે ચીફ જસ્ટિસ આ મામલે અવમાનનાની કાર્યવાહી અને FIR અંગે આગળનો નિર્ણય લેશે. હવે આ મુદ્દો માત્ર બાર એસોસિએશન અને જજ વચ્ચેનો વિવાદ નથી રહ્યો, પરંતુ કોર્ટની ગરિમા અને શાસન સાથે જોડાયેલો ગંભીર મામલો બની ગયો છે.
