રાજસ્થાનની શહેરી સ્થાનિક સંસ્થાઓની ચૂંટણીમાં સત્તારૂઢ ભારતીય જનતા પાર્ટી (BJP) સૌથી મોટી પાર્ટી બનીને સામે આવી છે. 309 શહેરી સ્થાનિક સંસ્થાઓનાં પરિણામોમાં જાહેર થયેલા 10,235 વોર્ડમાંથી ભાજપે 4,179 વોર્ડમાં જીત મેળવી છે, જ્યારે કોંગ્રેસ 3,613 વોર્ડ સાથે બીજા ક્રમે રહી છે. અપક્ષ ઉમેદવારોએ પણ 2,273 વોર્ડ જીતીને ત્રીજી સૌથી મોટી શક્તિ તરીકે પોતાની હાજરી નોંધાવી છે.
મહાનગરપાલિકાઓનાં પરિણામો પર નજર કરીએ તો ભાજપે જયપુર, કોટા, ઉદયપુર અને ભીલવાડામાં સ્પષ્ટ બહુમતી મેળવી છે. ઉદયપુરમાં ભાજપે 80માંથી 53 વોર્ડ, ભીલવાડામાં 70માંથી 45 અને કોટામાં 100માંથી 53 વોર્ડ જીત્યા છે. જયપુરમાં પણ ભાજપે કોંગ્રેસને પાછળ રાખીને બહુમતી મેળવી છે. બીજી તરફ કોંગ્રેસને બીકાનેરમાં સ્પષ્ટ બહુમતી મળી છે, જ્યારે અજમેર અને પાલીમાં તે સૌથી મોટી પાર્ટી તરીકે ઉભરી છે.
જોધપુરમાં ભાજપ અને કોંગ્રેસ વચ્ચે કાંટાની ટક્કર જોવા મળી હતી. બંને પક્ષોએ 44-44 વોર્ડ જીત્યા છે, જ્યારે બાકીના 10 વોર્ડ અપક્ષોના ખાતામાં ગયા છે. ભરતપુરમાં તો અપક્ષોએ જ મોટો ખેલ કર્યો છે અને 65માંથી 36 વોર્ડ જીતીને બહુમતીનો આંકડો પાર કર્યો છે. હનુમાનગઢમાં પણ અપક્ષોએ 60માંથી 32 વોર્ડ જીતીને પોતાનું બોર્ડ બનાવવાની સ્થિતિ ઊભી કરી છે. આ ઉપરાંત અજમેર, પાલી, અલવર, જોધપુર સહિતની કેટલીક સંસ્થાઓમાં બોર્ડની રચનામાં અપક્ષોની ભૂમિકા મહત્વપૂર્ણ બની શકે છે.
અન્ય પક્ષોમાં આમ આદમી પાર્ટી (AAP) અને CPMએ પણ કેટલાક વિસ્તારોમાં પોતાની હાજરી નોંધાવી છે. બારાંમાં AAPએ કોંગ્રેસ પાસેથી બાજી છીનવી લીધી, જ્યારે નોખામાં CPMએ કોંગ્રેસને પાછળ છોડી સ્થાનિક રાજકારણમાં પોતાનું સ્થાન બનાવ્યું છે.
આ ચૂંટણીમાં કુલ 309 શહેરી સ્થાનિક સંસ્થાઓનો સમાવેશ થયો હતો, જેમાં 10 મહાનગરપાલિકા, 47 નગર પરિષદ અને 252 નગરપાલિકા છે. મતદાન 9 અને 11 સપ્ટેમ્બરે બે તબક્કામાં થયું હતું. પરિણામો સામે આવ્યાં બાદ મુખ્યમંત્રી ભજનલાલ શર્માએ તેને વડા પ્રધાન નરેન્દ્ર મોદી અને રાજ્ય સરકારમાં જનતાના વિશ્વાસ તરીકે ગણાવ્યું છે.
એકંદરે પરિણામમાં ભાજપ 4,179 વોર્ડ સાથે સ્પષ્ટ રીતે સિંગલ લાર્જેસ્ટ પાર્ટી બની છે. કોંગ્રેસ કરતાં ભાજપ પાસે 566 વધુ વોર્ડ છે, જ્યારે અપક્ષોની 2,273 બેઠકોને કારણે અનેક સ્થાનિક સંસ્થાઓમાં સત્તાની રચના હવે સ્થાનિક રાજકીય સમીકરણો પર નિર્ભર રહેશે.
