રાષ્ટ્રપતિએ ધર્મેન્દ્ર પ્રધાનનું રાજીનામું સ્વીકાર્યું, પ્રહલાદ જોશીને શિક્ષણ મંત્રાલયનો વધારાનો કાર્યભાર

રાષ્ટ્રપતિ દ્રૌપદી મુર્મુએ વડા પ્રધાન નરેન્દ્ર મોદીની સલાહ પર કેન્દ્રીય શિક્ષણમંત્રી ધર્મેન્દ્ર પ્રધાનનું રાજીનામું સ્વીકારી લીધું છે. આ સાથે જ કેબિનેટ મંત્રી પ્રહલાદ જોશીને તેમના હાલના મંત્રાલયો યથાવત રાખીને શિક્ષણ મંત્રાલયનો વધારાનો કાર્યભાર સોંપવાનો આદેશ પણ આપવામાં આવ્યો છે.

દેશભરમાં છેલ્લા કેટલાક અઠવાડિયાથી ચાલી રહેલાં આંદોલન વચ્ચે આ મોટો નિર્ણય લેવામાં આવ્યો છે. દિલ્હીના જંતર-મંતર ખાતે મુખ્યત્વે કોકરોચ જનતા પાર્ટીના (CJP) નેતૃત્વ હેઠળ વિદ્યાર્થીઓએ NEET-UG પરીક્ષા પેપર લીકના કારણે રદ થતાં કેન્દ્રીય શિક્ષણ મંત્રી ધર્મેન્દ્ર પ્રધાનનાં રાજીનામાંની માંગ સાથે વિરોધ પ્રદર્શન શરૂ કર્યું હતું. 20 જુલાઈએ સંસદ તરફ કૂચ દરમિયાન પોલીસ અને પ્રદર્શનકારીઓ વચ્ચે અથડામણ થતાં આંદોલન વધુ ઉગ્ર બન્યું હતું.

ત્યારબાદ સરકાર અને CJP વચ્ચે બીજી બેઠક યોજાયા બાદ ધર્મેન્દ્ર પ્રધાને રાજીનામાંની જાહેરાત કરી હતી. તેમણે જણાવ્યું હતું કે તાજેતરના ઘટનાક્રમથી તેઓ ખૂબ દુઃખી છે. આ નિર્ણય વ્યક્તિગત પ્રતિષ્ઠા માટે નહીં, પરંતુ દેશના યુવાનોના ભવિષ્યની રક્ષા માટે લેવામાં આવ્યો હોવાનું તેમણે કહ્યું હતું. તેમણે ભારપૂર્વક જણાવ્યું કે પરીક્ષા માફિયાને હોશિયાર વિદ્યાર્થીઓનું ભવિષ્ય બરબાદ કરવાની મંજૂરી આપી શકાય નહીં અને દેશવિરોધી તાકાતો આ મુદ્દાનો લાભ ન ઉઠાવે તે માટે તેમણે રાજીનામું આપ્યું છે.

ધર્મેન્દ્ર પ્રધાને જણાવ્યું હતું કે તેમણે શરૂઆતથી જ પોતાની જવાબદારી સ્વીકારી હતી અને ક્યારેય જવાબદારીમાંથી ભાગવાનો પ્રયાસ કર્યો નહોતો. તેમણે કહ્યું કે કોઈપણ લાયક વિદ્યાર્થીને પરીક્ષા માફિયાના કારણે અન્યાય ન થાય તે માટે તેઓ પ્રતિબદ્ધ હતા. તેમણે 16 જુલાઈએ જાહેર થયેલાં NEET-UGનાં પરિણામોનો ઉલ્લેખ કરતા કહ્યું કે આર્થિક રીતે નબળા વર્ગના ઘણા પ્રતિભાશાળી વિદ્યાર્થીઓ સફળ થયા છે, જે સંતોષની બાબત છે.

રાજીનામાં બાદ 25 જુલાઈએ સરકાર અને CJP વચ્ચે ત્રીજી બેઠક યોજાઈ હતી, જેમાં સરકાર દ્વારા CJPની તમામ મુખ્ય માંગણીઓ સ્વીકારી લેવામાં આવી હતી. ત્યારબાદ CJPએ જંતર-મંતર પર ચાલી રહેલું પોતાનું આંદોલન પાછું ખેંચવાની જાહેરાત કરી હતી.

શિક્ષણ મંત્રાલયનો વધારાનો કાર્યભાર સંભાળનારા પ્રહલાદ જોશી કર્ણાટકની ધારવાડ લોકસભા બેઠક પરથી પાંચ વખત ચૂંટાયેલા સાંસદ છે. તેઓ હાલમાં ગ્રાહક બાબતો, ખાદ્ય અને જાહેર વિતરણ તેમજ નવી અને નવીનીકરણીય ઊર્જા મંત્રાલયનો કાર્યભાર સંભાળી રહ્યા છે, જે તેમણે જૂન 2024માં સંભાળ્યો હતો.

નવી અને નવીનીકરણીય ઊર્જા મંત્રી તરીકે પ્રહલાદ જોશી 2030 સુધીમાં 500 ગીગાવોટ નવીનીકરણીય અને બિન-જીવાશ્મ ઇંધણ આધારિત ઊર્જા ક્ષમતા હાંસલ કરવા તેમજ 2070 સુધી નેટ-ઝીરો ઉત્સર્જનના લક્ષ્ય તરફ કેન્દ્ર સરકારના પ્રયાસોનું નેતૃત્વ કરી રહ્યા છે. તેમણે નેશનલ ગ્રીન હાઇડ્રોજન મિશન, PM સૂર્ય ઘર મુક્ત વીજળી યોજના, PM-KUSUM યોજના અને ઓફશોર વિન્ડ એનર્જી જેવા અનેક મહત્વપૂર્ણ પ્રોજેક્ટ્સનું માર્ગદર્શન આપ્યું છે.

2019થી 2024 દરમિયાન તેઓ સંસદીય બાબતો, કોલસા અને ખાણ મંત્રી તરીકે પણ કાર્યરત રહ્યા હતા. રાષ્ટ્રીય સ્વયંસેવક સંઘ સાથે લાંબા સમયથી જોડાયેલા પ્રહલાદ જોશી પ્રથમ વખત 2004માં લોકસભામાં ચૂંટાયા હતા અને ભાજપમાં અનુભવી વહીવટકાર તેમજ સંગઠનના નેતા તરીકે ઓળખાય છે.

પ્રહલાદ જોશીને શિક્ષણ મંત્રાલયનો વધારાનો કાર્યભાર આપવાનો નિર્ણય હાલ માટેની કામચલાઉ વ્યવસ્થા માનવામાં આવી રહ્યો છે. નજીકના ભવિષ્યમાં કેન્દ્રીય મંત્રીમંડળમાં ફેરબદલ થવાની પણ શક્યતા વ્યક્ત કરવામાં આવી રહી છે.

આ દરમિયાન સરકારે પેપર લીક જેવા ગુનાઓ સામે કડક કાયદાકીય જોગવાઈઓ મજબૂત કરવાની દિશામાં પણ પગલાં લીધાં છે. પેપર લીકના કેસોમાં કડક સજા અને ઝડપી ટ્રાયલ માટે ફાસ્ટ-ટ્રેક કોર્ટની જોગવાઈ કરતો કાયદાકીય સુધારો કેન્દ્ર સરકાર દ્વારા મંજૂર કરવામાં આવ્યો છે. સાથે જ સ્પર્ધાત્મક પરીક્ષા વ્યવસ્થામાં સુધારા લાવવા માટે નેશનલ ટેસ્ટિંગ એજન્સી (NTA)માં વ્યાપક પુનર્ગઠનની પણ જાહેરાત કરવામાં આવી છે.