પાકિસ્તાને કબજે કરેલા કાશ્મીરમાં (PoK) ફરી એકવાર સ્થાનિક લોકો અને પાકિસ્તાની સુરક્ષાદળો વચ્ચે હિંસક ઝઘડો શરૂ થયો છે. આ હિંસા ત્યારે ફાટી નીકળી જ્યારે એક વિરોધ પ્રદર્શન કરનાર નાગરિક શાહઝૈબના જનાજા દરમિયાન પાકિસ્તાની સેનાએ લોકો પર હુમલો કર્યો હોવાનો આરોપ લાગ્યો છે. આ લડાઈમાં અત્યાર સુધીમાં 4 સુરક્ષાકર્મીઓ સહિત 8 લોકોનાં મોત થયાં છે અને 200થી વધુ લોકો ઘાયલ થયા છે. હાલમાં ત્યાં ખૂબ જ તણાવભર્યો માહોલ છે અને સેનાએ આખા વિસ્તારને ઘેરી લીધો છે.
આ વિવાદનું મુખ્ય કારણ ‘જોઇન્ટ અવામી એક્શન કમિટી’ (JAAC) નામનું સંગઠન છે, જે ત્યાંના લોકોના અધિકાર માટે લડી રહ્યું છે. પાકિસ્તાન સરકારે આ સંગઠન પર આતંકવાદ વિરોધી કાયદા હેઠળ પ્રતિબંધ મૂકી દીધો છે અને આરોપ લગાવ્યો છે કે આ લોકો દેશમાં અરાજકતા ફેલાવે છે. બીજી તરફ સંગઠનના નેતાઓનું કહેવું છે કે તેઓ કોઈ દેશ કે સંસ્થાની વિરુદ્ધ નથી, પરંતુ તેમનો આ શાંતિપૂર્ણ સંઘર્ષ બંધ કરાવવા માટે સરકાર તેમના પર ખોટો જુલમ કરી રહી છે. તેમણે સરકાર સામે 9 જૂને મોટી રેલી (લોન્ગ માર્ચ) યોજવાની પણ જાહેરાત કરી છે.
સ્થાનિક લોકોની મુખ્ય માંગ એ છે કે ચૂંટણીમાં બહારના લોકોની દખલગીરી બંધ થાય. PoKની વિધાનસભામાં 12 બેઠકો એવા લોકો માટે અનામત રાખવામાં આવી છે જેઓ વર્ષો પહેલાં કાશ્મીર છોડીને પાકિસ્તાનના બીજા શહેરોમાં વસી ગયા છે. પ્રદર્શનકારીઓનું કહેવું છે કે આ 12 બેઠકોના કારણે પાકિસ્તાનના મોટા રાજકીય પક્ષો અહીં પોતાની મરજી મુજબની સરકાર બનાવી લે છે અને સ્થાનિક લોકોનો અવાજ દબાવી દે છે. આ સિવાય લોકો મોંઘવારી ઘટાડવા, વીજળી સસ્તી કરવા અને મફત સારવાર જેવી સુવિધાઓની માંગ કરી રહ્યા છે.
સુરક્ષા નિષ્ણાતોના મતે પાકિસ્તાન સરકાર હાલમાં ચારેય બાજુથી મુશ્કેલીઓમાં ઘેરાયેલી છે. પાકિસ્તાની સેનાએ અત્યારે બલોચ વિદ્રોહીઓ, તાલિબાન અને અન્ય આતંકી સંગઠનો સામે લડવું પડી રહ્યું છે. આ મોટા જોખમોનો સામનો કરવા માટે સેનાના જવાનોને અન્ય સરહદો પર મોકલવામાં આવ્યા છે, જેના કારણે PoKમાં સુરક્ષા વ્યવસ્થા નબળી પડી ગઈ છે. આ જ કારણ છે કે ત્યાંની સ્થાનિક પોલીસ પરિસ્થિતિને કાબૂમાં લેવામાં નિષ્ફળ રહી છે અને લોકો રસ્તા પર ઉતરી આવ્યા છે.
આ આંદોલનને રોકવા માટે પાકિસ્તાન સરકારે આખા વિસ્તારમાં મોબાઈલ અને ઈન્ટરનેટ સેવાઓ સંપૂર્ણપણે બંધ કરી દીધી છે જેથી લોકો એકબીજા સાથે સંપર્ક ન કરી શકે અને વિરોધ પ્રદર્શન વધુ ન વધે. ઇન્ટરનેટ બંધ થવાને કારણે દુનિયાભરમાં પાકિસ્તાનની ટીકા થઈ રહી છે. બ્રિટનમાં રહેતા કાશ્મીરી સમુદાયના લોકો અને ત્યાંના 30થી વધુ સાંસદોએ આ વાતનો વિરોધ કર્યો છે અને પાકિસ્તાન સરકારને ચેતવણી આપી છે કે તેઓ હિંસા બંધ કરે અને લોકો સાથે વાતચીત કરીને મામલો ઉકેલે.
