વક્ફ સંશોધન બિલ 2025 (Waqf Amendment Bill 2025) સંસદના બંને ગૃહો લોકસભા (Lok Sabha) અને રાજ્યસભા (Rajya Sabha) બંનેમાં પસાર થઈ ચૂક્યું છે. હવે તેને કાયદાનું રૂપ લેવા એક જ ચરણમાંથી પસાર થવાનું બાકી છે. બિલ રાષ્ટ્રપતિ દ્રૌપદી મૂર્મુના (Droupadi Murmu) હસ્તાક્ષર બાદ કાયદા તરીકે અમલમાં આવશે.
નોંધનીય છે કે રાજ્યસભામાં લગભગ 12 કલાક સુધી આ બિલ પર ગહન ચર્ચા વિચારણા કર્યા બાદ 3 એપ્રિલના રોજ આ બિલ 128 સાંસદોના સમર્થન અને 95 સાંસદોના વિરોધ સાથે રાજ્યસભામાં પસાર કરવામાં આવ્યું હતું.
આ ઉપરાંત લોકસભામાં પણ લગભગ 12 કલાકથી વધુ સમય સુધી ચર્ચા ચાલી હતી. 2 એપ્રિલના રોજ આ બિલ પર લોકસભામાં ચર્ચા થઈ હતી. આ દરમિયાન કેન્દ્રીય ગૃહમંત્રી અમિત શાહ અને લઘુમતી બાબતોના મંત્રી કિરેન રિજિજુએ બિલના તથ્યો રજૂ કર્યા હતા.
લોકસભામાં ચર્ચા બાદ 2 એપ્રિલની મધ્યરાત્રિએ 288 સાંસદોના સમર્થન અને 232 સાંસદોના વિરોધ બાદ આ બિલ પસાર થઈ ગયું હતું. હવે રાજ્યસભામાં પણ આ બિલ પસાર થઈ ચૂક્યું છે. ત્યારે પ્રક્રિયા અનુસાર રાષ્ટ્રપતિ દ્રૌપદી મૂર્મુ આ બિલ પર તેમના હસ્તાક્ષર કરે પછી બિલ કાયદાના સ્વરૂપમાં અમલમાં આવશે.
