દિલ્હીના જંતર-મંતર ખાતે વિરોધ પ્રદર્શન દરમિયાન વડા પ્રધાન નરેન્દ્ર મોદી વિરુદ્ધ અભદ્ર અને વાંધાજનક ભાષાનો ઉપયોગ કરવા બદલ 25 વર્ષીય મહિલા રુચિકા સિંઘ સામે નોઇડા પોલીસે FIR દાખલ કરી છે. રુચિકા મૂળ ફરીદાબાદની રહેવાસી છે અને નોઇડામાં બ્યુટી પાર્લર ચલાવે છે. ઘટના બાદથી તે અને તેનો પરિવાર ફરાર હોવાથી પોલીસ તેને શોધી રહી છે.
આ મામલે ગાઝિયાબાદના વસુંધરાના નિવાસી અને સુપ્રીમ કોર્ટના વકીલ સ્મૃતિ સિંઘે 29 જુલાઈના રોજ નોઇડાના એક્સપ્રેસવે પોલીસ સ્ટેશનમાં ફરિયાદ નોંધાવી હતી. ફરિયાદમાં તેમણે જણાવ્યુ હતું કે તેમણે સોશિયલ મીડિયા પર 23 જુલાઈના પ્રદર્શનનો એક વિડીયો જોયો હતો, જેમાં આરોપી મહિલાએ જાહેરમાં બંધારણીય પદની ગરિમાને હાનિ પહોંચાડે તેવી અને શાંતિ ભંગ કરે તેવી અપમાનજનક ટિપ્પણીઓ કરી હતી.
અહેવાલ મુજબ જંતર મંતર ખાતે CJP પ્રદર્શન દરમિયાન કેટલાક લોકોએ વડા પ્રધાન અને અન્ય કેન્દ્રીય મંત્રીઓ સામે અત્યંત ખરાબ અને અયોગ્ય ભાષાનો ઉપયોગ કર્યો હતો. પોલીસે વકીલની ફરિયાદના આધારે BNSની કલમ 352 (શાંતિ ભંગ કરવાના ઇરાદાથી અપમાન), 353(1) (જાહેર ઉપદ્રવ ફેલાવતા નિવેદનો) અને 356(1) (બદનક્ષી) હેઠળ ગુનો દાખલ કર્યો છે.
ઉલ્લેખનીય છે કે વાંધાજનક ટિપ્પણીઓના વિડીયો સોશિયલ મીડિયા પર વાયરલ થયા બાદ લોકોમાં ભારે વિરોધ જોવા મળ્યો હતો અને કાયદાકીય કાર્યવાહીની માંગ ઉઠી હતી. કારણ કે ઘટના દિલ્હીના પાર્લામેન્ટ સ્ટ્રીટ પોલીસ સ્ટેશનની હદમાં બની હતી, તેથી નોઇડા પોલીસે પ્રાથમિક ઝીરો FIR નોંધીને આગળની તપાસ માટે કેસ દિલ્હી પોલીસને ટ્રાન્સફર કરી દીધો છે.
ઝીરો FIR એક એવી સુવિધા છે જેના હેઠળ ઘટના ગમે ત્યાં બની હોય, કોઈપણ પોલીસ સ્ટેશનમાં ફરિયાદ નોંધીને તેને સંબંધિત પોલીસ સ્ટેશનમાં મોકલી શકાય છે. બીજી તરફ દિલ્હી પોલીસના સ્પેશિયલ સેલ IFSO યુનિટે પણ વિવિધ સોશિયલ મીડિયા પ્લેટફોર્મને વાયરલ થયેલી આવી વાંધાજનક સામગ્રી હટાવવા માટે સૂચના આપી છે. હાલ દિલ્હી પોલીસ આ વિડીયો અને ડિજિટલ પુરાવાઓની તપાસ કરીને આગળની કાયદાકીય કાર્યવાહી કરી રહી છે.
