Thursday, November 14, 2024
More
    Home Blog Page 1170

    સુરતમાં હેરિટેજ કોમ્પ્લેક્સની અંદર આવેલી દરગાહની આસપાસનું ગેરકાયદે બાંધકામ તોડી પાડવામાં આવ્યું

    ઑપઇન્ડિયા સ્ટાફ
    -
    0
    સુરતમાં હેરિટેજ કોમ્પ્લેક્સની અંદર આવેલી દરગાહની આસપાસનું ગેરકાયદે બાંધકામ તોડી પાડવામાં આવ્યું

    સુરત ચોક બજાર વિસ્તારમાં હેરિટેજ કોમ્પ્લેક્સની અંદર દરગાહ/મઝારની આસપાસ બાંધવામાં આવેલ ગેરકાયદેસર બાંધકામ સત્તાવાળાઓ દ્વારા તોડી પાડવામાં આવ્યું છે. ગત થોડા દિવસોમાં આ ગેરકાયદે બાંધકામ વિષે લોકોએ સોશિયલ મીડિયા પર ખૂબ વિરોધ નોંધાવ્યો હતો.

    સૂત્રોના જણાવ્યા અનુસાર, સત્તાવાળાઓને અતિક્રમણ અંગે જાણ કર્યા પછી ગયા અઠવાડિયે બુધવારે જ ગેરકાયદેસર બાંધકામ તોડી પાડવામાં આવ્યું હતું. ઓપઇન્ડિયાએ અગાઉ રવિવારે અહેવાલ આપ્યો હતો કે ચોકબજારમાં સુરત હેરિટેજ કોમ્પ્લેક્સ બિલ્ડિંગમાં ‘મઝાર’ ની આસપાસ ગેરકાયદેસર બાંધકામ આવ્યું છે. સૂત્રોના જણાવ્યા અનુસાર, આ દરગાહ થોડા વર્ષોથી છે, પરંતુ તેની આસપાસ બાંધકામ તાજેતરમાં કરવામાં આવ્યું હતું.

    સોશિયલ મીડિયા પર વાયરલ થયેલા એક વીડિયોમાં તાજા સિમેન્ટના કામ સાથે નવા નાખવામાં આવેલા પથ્થરો જોઈ શકાય છે જ્યાં વીડિયો લેનાર વ્યક્તિએ કહ્યું કે દરગાહની આસપાસનું બાંધકામ રાતોરાત થઈ ગયું છે. “આજે અહીં અતિક્રમણ થયું છે, આવતીકાલે તે તમારી જગ્યાએ હશે,” વીડિયોમાં એક વ્યક્તિને કહેતા સાંભળી શકાય છે. ‘દરગાહ’ ગૈબન શાહ વાલિદની હોવાનું જાણવા મળ્યું છે.

    સૂત્રોના જણાવ્યા મુજબ, જ્યારે દરગાહની વિગતો માટે પોલીસનો સંપર્ક કરવામાં આવ્યો હતો જે તેની માલિકીની તપાસ કરી રહી હતી. પોલીસે કહ્યું કે માલિકીના રેકોર્ડ દર્શાવે છે કે જમીન ત્રણ પક્ષોની છે. એક પક્ષ સુરત મહાનગરપાલિકા, એક સરકારી જમીન અને એક પક્ષ ખાનગી પક્ષ છે. ખાનગી માલિક કોણ છે તેની તપાસ કરવા પર, સુરત પોલીસ અધિકારીએ જણાવ્યું હતું કે તે 5-6 ટ્રસ્ટીઓ સાથેનું ટ્રસ્ટ છે. પોલીસે જણાવ્યું હતું કે તેઓ જમીનની માલિકી અંગે વધુ વિગતો માટે સિટી સર્વે સુધી પહોંચ્યા છે.

    ટ્રસ્ટમાં ગનીભાઈ દેસાઈ, ગોરધનભાઈ ચોખાવાલા, યશવંતભાઈ શુક્લ, ઈશ્વરલાલ દેસાઈ, ચુનીભાઈ ભટ્ટ ટ્રસ્ટીઓ છે જેઓ આંશિક જમીનની માલિકી ધરાવે છે. અનિવાર્યપણે, હેરિટેજ કોમ્પ્લેક્સની જમીનના ત્રણ અલગ-અલગ માલિકો છે. તેનો એક ભાગ સુરત મ્યુનિસિપલ કોર્પોરેશનની માલિકીનો છે, ભાગ ગુજરાત સરકારની માલિકીનો છે અને કેટલોક ભાગ ઉપરોક્ત ટ્રસ્ટની માલિકીનો છે. દરગાહ ક્યાં સત્તાવાળાઓ હેઠળ આવે છે તે શોધવા માટે સિટી સર્વેમાંથી તે ચોક્કસ વિસ્તારની માલિકી જાણવાની જરૂર પડશે.

    જો કે, ઉપરોક્ત માહિતી પરથી એવું લાગે છે કે વકફે હજુ સુધી દરગાહ પર દાવો કર્યો નથી. જ્યારે કેટલાક સ્થાનિક મીડિયા અહેવાલો દાવો કરે છે કે દરગાહ ઘણા વર્ષોથી છે, તે સ્વતંત્ર રીતે ચકાસી શકાતી નથી.

    સુરત મહાનગર પાલિકાની સંસ્થા વકફ મિલકત છે.

    ગયા વર્ષે નવેમ્બરમાં, SMC મુખ્યાલય મુગલિસરાને વકફ મિલકત જાહેર કરવામાં આવી હતી. એવું નોંધવામાં આવ્યું હતું કે આ ઇમારતનો ઉપયોગ 17મી સદીમાં હજ યાત્રાળુઓ દ્વારા કરવામાં આવ્યો હતો અને તે મુસ્લિમ શાસક દ્વારા શરિયાને ટાંકીને દાનમાં આપવામાં આવ્યો હોવાથી, રાજ્ય વક્ફ બોર્ડે દાવો કર્યો હતો. સુપ્રીમ કોર્ટની ઘોષણા કે ‘એકવાર વકફ, હંમેશા વકફ’ પર પણ આધાર રાખ્યો હતો.

    બાગપતના પાદરી આલ્બર્ટની 11 વર્ષની બાળકી પર બળાત્કારના આરોપસર ધરપકડ થઇ

    ઑપઇન્ડિયા સ્ટાફ
    -
    0
    બાગપતના પાદરી આલ્બર્ટની 11 વર્ષની બાળકી પર બળાત્કારના આરોપસર ધરપકડ થઇ

    ગત શનિવારે (23 એપ્રિલ) ઉત્તર પ્રદેશના બાગપતના ચાંદીનગરમાં 11 વર્ષની બાળકી પર બળાત્કાર કરવાના આરોપ હેઠળ ઉત્તર પ્રદેશ પોલીસે એક ખ્રિસ્તી પાદરીની ધરપકડ કરી છે. રિપોર્ટ્સ અનુસાર આરોપીનું નામ આલ્બર્ટ છે જે 67 વર્ષનો છે અને તે તમિલનાડુના કન્યાકુમારી ખાતે આવેલા એક ચર્ચમાં પાદરી છે. શુક્રવારે આ બાળકી જ્યારે ચર્ચમાં સાઈકલ ફેરવવા ગઈ હતી ત્યારે આ પાદરી તેની પાસે ગયો હતો અને તેને પૈસા આપવાની લાલચ આપીને પોતાના રૂમમાં લઇ ગયો હતો. ત્યારબાદ આરોપ અનુસાર તેણે બાળકી સાથે શારીરિક છેડછાડ કરી હતી અને તેનો બળાત્કાર કર્યો હતો.

    ભોગ બનનાર બાળકીના નિવેદન અનુસાર, પાદરીએ તેના કપડાં ફાડી નાખ્યા હતા અને પછી તેને અભદ્ર ફિલ્મો દેખાડી હતી. આ બાળકી પર બળાત્કાર ગુજાર્યા બાદ પાદરીએ તેને મૂંગા રહેવાની ધમકી પણ આપી હતી. તેણે કહ્યું હતું કે જો તે મૂંગી નહીં રહે તો તેણે તેના ખરાબ પરિણામો ભોગવવા પડશે. જો કે બીજા દિવસેજ બાળકીએ પોતાના માતાપિતાને આ બાબતની જાણ કરી દીધી હતી. તુરંત બાદ બાળકીની માતાએ પોલીસ ફરિયાદ નોંધાવી હતી.

    પાદરી આલ્બર્ટ વિરુદ્ધ પોલીસે POSCO (Prevention of Child Sexual Offenses) એક્ટ હેઠળ FIR નોંધી છે. પોલીસ સુપ્રિટેન્ડેન્ટ નીરજ જદૌન અનુસાર પાદરી આલ્બર્ટને પોલીસ ફરિયાદના આધારે પકડી લેવાનો હતો અને ભોગ બનનાર બાળકીનો મેડિકલ ટેસ્ટ પણ કરી લેવામાં આવ્યો હતો. આરોપી પાદરી તેમજ ભોગ બનનાર બાળકી આ બંનેના DNA રિપોર્ટ્સના સેમ્પલ્સ લઇ લેવામાં આવ્યા છે અને તેને વધુ એનાલિસીસ માટે મોકલી આપવામાં આવ્યા છે. પોલીસે આ કેસમાં કડક હાથે કામ લેવાનું વચન પણ આપ્યું છે.

    આ વર્ષે ફેબ્રુઆરીમાં પણ આંધ્રપ્રદેશના વિશાખાપટ્ટનમમાં એક 42 વર્ષના પાદરીએ ચાર વર્ષ સુધી 17 સ્ત્રીઓનું જાતીય શોષણ કર્યું હોવાનું સામે આવ્યું હતું. એક રિપોર્ટ અનુસાર આ પાદરી કિશોરો તેમજ મહિલાઓને મજુરી અને છેતરપિંડી જેવા ગેરકાયદેસરના કાર્યો કરવા માટે મજબુર કરતો હતો. આ મામલો ત્યારે સામે આવ્યો જ્યારે એક મહિલા ચર્ચમાંથી ભાગી ગઈ અને પોલીસ અધિકારીઓનો તેણે સંપર્ક કર્યો હતો. 3 ફેબ્રુઆરી 2021ના દિવસે ભોગ બનનારી એક મહિલાએ પાદરી વિરુદ્ધ ફરિયાદ નોંધાવી હતી. આ પાદરીને અંબાટી અનિલ કુમાર ઉર્ફે પ્રેમ દાસ તરીકે ઓળખવામાં આવ્યો હતો. આ વ્યક્તિ વિજયવાડાના ક્રિશ્નાલંકાનો રહેવાસી હતો અને તે રેલવેમાં TTEનું કાર્ય કરતો થતો. 2015માં તેણે પ્રેમ સ્વરૂપી મીનીસ્ટ્રીઝ’ નામનું એક ટ્રસ્ટ ઉભું કર્યું હતું જેમાં તે પાદરી બન્યો અને તેણે બે માળનું ચર્ચ પણ સ્થાપ્યું હતું.

    ગુજરાત કોંગ્રેસનું ડૂબતું વહાણ, ગુજરાત વિધાનસભા ચૂંટણી પહેલા એક પછી એક કોંગ્રેસી નેતાઓના રાજીનામાં

    ઑપઇન્ડિયા સ્ટાફ
    -
    0
    ગુજરાત કોંગ્રેસનું ડૂબતું વહાણ, ગુજરાત વિધાનસભા ચૂંટણી પહેલા એક પછી એક કોંગ્રેસી નેતાઓના રાજીનામાં

    ગુજરાતની વિધાનસભા ચૂંટણી નજીક આવતા જ ફરી એકવાર કોંગ્રેસ નેતાઓના રાજીનામાં અટકવાનું નામ નથી લઈ રહ્યા. એક પછી એક નેતાઓ કોંગ્રેસ છોડીને ભાજપ તથા આપમાં જોડાઈ રહ્યા છે. ત્યારે કોંગ્રેસની સ્થિતિ ખરાબ થઈ મૂકી છે.

    ઓલ ઈન્ડિયા પ્રોફેશનલ કોંગ્રેસનાં પૂર્વ પ્રદેશ પ્રમુખ, પૂર્વ પ્રદેશ પ્રવકતા અને દિગ્ગજ કોંગ્રેસનેતા કૈલાશ ગઢવીએ કોંગ્રેસ પક્ષમાંથી રાજીનામું આપી દીધું અને ગઇકાલે અમદાવાદ ખાતે પોતાના સમર્થકો સાથે આમ આદમી પાર્ટીમાં જોડાયા હતા. આ પહેલા એમણે અરવિંદ કેજરીવાલ સાથે મુલાકાત કરીને આપમાં જોડવાના સંકેત આપી દીધા જ હતા.

    આ પહેલા કૈલાશ ગઢવીએ કોંગ્રેસની નેતાગીરી પર પ્રશ્ન ઉઠાવતા ટ્વિટ દ્વારા કહ્યું હતું કે, ‘સત્તા મેળવવા કે સરકાર બનાવવાના મક્કમ નિર્ધારના અભાવે કોંગ્રેસની નેતાગીરી લાંબા સમયથી ગુજરાતમાં સરકાર બનાવવામાં નિષ્ફળ રહી છે.- ચાલો કંઈક નવું કરીએ’

    થોડા સમય પહેલા જ કોંગ્રેસનાં દિગ્ગજ નેતા સ્વ. અહેમદ પટેલના દીકરા ફૈઝલે પણ પક્ષ તરફ પોતાની નારાજગી દર્શાવી હતી. ફૈઝલ પટેલે ટ્વિટ કરીને પોતાની વ્યથા દર્શાવતા જણાવ્યુ છે કે, ‘હું રાહ જોઇને થાકી ગયો છું. કોઇ પ્રોત્સાહન મળી નથી રહ્યુ. મારા પાસે વિકલ્પો ખુલ્લાં છે.’ 

    આ પહેલા કોંગ્રેસનાં પૂર્વ ધારાસભ્ય તથા સૌરાષ્ટ્રના કદ્દાવર નેતા ઇન્દ્રનીલ રાજ્યગુરુ તથા રાજકોટ કોંગ્રેસનાં કોર્પોરેટર વશરામ સાગઠિયાએ પણ કોંગ્રેસનાં પોતાના તમામ હોદ્દાઓ પરથી રાજીનામું આપીને આપમાં જોડાયા હતા.

    કોંગ્રેસ નેતાઓના રાજીનામાં આટલે અટકતા નથી. થોડા સમય પહેલા જ કોંગ્રેસનાં દિગ્ગજ નેતા જયરાજસિંહ પરમારે પણ કોંગ્રેસ પક્ષનો સાથ છોડીને કેસરિયો ધારણ કર્યો હતો. લાંબા સમયથી કોંગ્રેસથી નારાજ ચાલતા જયરાજસિંહે આ જાણકારી ટ્વિટર દ્વારા આપી હતી.

    ગુજરાત કોંગ્રેસનાં સ્થાનિક જિલ્લા સંગઠનોમાંથી પણ હમણાં હમણાં ઘણા કોંગ્રેસ નેતાઓના રાજીનામાં પડ્યા છે. ગત મહિને જ જામનગર જિલ્લા કોંગ્રેસનાં મહામંત્રી કે પી બથવારે રાજીનામું આપી દીધું હતું જે બાદ જામનગર જિલ્લા કોંગ્રેસનાં મંત્રી ગોવિંદ પટેલે પીએન રાજીનામું આપી દીધું હતું.

    આ પહેલા ગત મહિને અમદાવાદ મહાનગર પાલિકાના પૂર્વ નેતા વિપક્ષ દિનેશ શર્માએ કોંગ્રેસમાંથી રાજીનામું આપ્યુ હતું. ગુજરાત પ્રદેશ પ્રમુખ જગદીશ ઠાકોરને રાજીનામુ આપતા તેમણે પત્રમા લખ્યુ કે, ‘હું કોંગ્રેસના તમામ સભ્યપદ પરથી રાજીનામુ આપુ છું અને કોંગ્રેસ પક્ષની તમામ જવાબદારીઓમાંથી મુક્ત થઈ રહ્યો છું. હું છેલ્લા ઘણા સમયથી કોંગ્રેસ પક્ષની કાર્યપ્રણાલીથી અને નિર્ણાયક શક્તિના અભાવે થઈ રહેલા રાજકીય નુકસાનને હવે સ્વમાનના ભોગે સહન કરી શકુ તેમ નથી. હું અનેકવાર પક્ષને કુંભકર્ણની નિંદ્રામાંથી જગાડવા અને પક્ષના સંગઠનને મજબૂત કરવા ત્વરિત નિર્ણય શક્તિ બતાવવા માટે પક્ષને અનેક સૂચનો કરતો આવ્યો છુ. છતા પરિણામ શૂન્ય રહેતા આજે છેલ્લા વિકલ્પ તરીકે કોંગ્રેસ પક્ષને અલવિદા કહેવુ જ યોગ્ય માનીને નવી દિશા અને માર્ગ તરફ આગળ વધી રહ્યો છું.’

    આટઆટલા રાજીનામાઓ બાદ પણ હજુ લાંબા સમય સૂનધિ ગુજરાત કોંગ્રેસમાં આ સ્થિતિ બદલાય એવી કોઈ શક્યતાઓ દેખાતી નથી. પાટીદાર આંદોલનમાથી જન્મેલ વિવાદિત નેતા તથા કોંગ્રેસનાં કાર્યકારી અધ્યક્ષ હાર્દિક પટેલ પણ છેલ્લા ઘણા સમયથી કોંગ્રેસનાં સ્થાનિક નેતૃત્વ પર પ્રશ્નો ઉઠાવતા આવ્યા છે. અટકળો લાગી રહી છે કે ચૂંટણી પહેલા ગમે ત્યારે હાર્દિક કોંગેસને છોડી આપ અથવા ભાજપમાં જોડાઈ શકે છે. હાર્દિક પટેલે હમણાં જ નિવેદન આપતા કહ્યું હતું કે ‘અમે રામના ભક્ત છીએ’ અને ભાજપ સંગઠનના પણ ખૂબ વખાણ કર્યા હતા.

    કોંગ્રેસ નેતાઓના રાજીનામાંઓ વચ્ચે પણ ગુજરાત કોંગ્રેસનાં આંતરિક વિવાદો થમવાનું નામ નથી લઈ રહ્યા. કોંગ્રેસના સ્વાભિમાન સંમેલન પહેલા વિવાદ છેડાયો છે. સંમેલનના પોસ્ટરમાં પ્રદેશ પ્રમુખનો ફોટો ન હોવાથી અનેક ચર્ચાએ જોર પકડ્યું છે. હાર્દિક પટેલે આ ફોટો ટ્વિટર પીઆર શેર કર્યો છે જેમાં પ્રદેશ કોંગ્રેસનાં કાર્યક્રમમાં પ્રદેશ કોંગ્રેસ અધ્યક્ષનો જ ફોટો નથી.

    તો હવે જોવાનું એ રહેશે કે આટઆટલી તકલીફો વચ્ચે ગુજરાત વિધાન ચૂંટણી પહેલા શું કોંગ્રેસ પાર્ટી પોતાની આ ખરડાતીછબીને સાચવી શકશે કે કેમ.

    ભગવાન રામનું અપમાન કરતો વિડીયો વાયરલ થયા બાદ લવલી પ્રોફેશનલ યુનિવર્સીટીનાં પ્રોફેસર બરખાસ્ત, યુનિવર્સીટીએ માફી માંગી

    ઑપઇન્ડિયા સ્ટાફ
    -
    0
    ભગવાન રામનું અપમાન કરતો વિડીયો વાયરલ થયા બાદ લવલી પ્રોફેશનલ યુનિવર્સીટીનાં પ્રોફેસર બરખાસ્ત, યુનિવર્સીટીએ માફી માંગી

    ભગવાન રામનું અપમાન કરતો વિડીયો વાયરલ થયા બાદ લવલી પ્રોફેશનલ યુનિવર્સીટીના પ્રોફેસર ગુરસંગ પ્રીત કૌરને બરખાસ્ત કરી દેવામાં આવ્યાં છે. આ મામલે યુનિવર્સીટીએ પોતાના અધિકારીક ઇન્સ્ટાગ્રામ અકાઉન્ટ પરથી એક નિવેદન પણ જારી કર્યું અને ઘટના મામલે ખેદ વ્યક્ત કર્યો હતો. યુનિવર્સીટી દ્વારા જારી કરવામાં આવેલ નિવેદનમાં કહેવામાં આવ્યું કે, ભગવાન રામનું અપમાન કરતો વિડીયો વાયરલ થવા મામલે ખેદ વ્યક્ત કરવામાં આવે છે તેમજ પ્રોફેસરને બરખાસ્ત કરી દેવામાં આવ્યાં છે.

    નિવેદનમાં આગળ જણાવવામાં આવ્યું કે, “સોશિયલ મીડિયા પર શેર કરવામાં આવેલ વિડીયોથી અનેક લોકોને ઠેસ પહોંચી છે જે બાબતથી અમે પૂરેપૂરા વાકેફ છીએ. વિડીયોમાં અમારી યુનિવર્સીટીના એક પ્રોફેસર વ્યક્તિગત ટીપ્પણી કરતાં સંભળાય છે.” યુનિવર્સીટીએ આગળ જણાવ્યું, “અમે સ્પષ્ટતા કરવા માંગીએ છીએ કે એ તેમનો વ્યક્તિગત વિચાર છે અને જેનું યુનિવર્સીટી સમર્થન કરતી નથી. અમારી યુનિવર્સીટી ધર્મનિરપેક્ષ છે અને જ્યાં તમામ ધર્મો અને જાતિના લોકો સાથે પ્રેમ અને સન્માન સાથે સમાન વ્યવહાર કરવામાં આવે છે.”

    સોશિયલ મીડિયા પર વાયરલ થયેલા વિડીયોમાં યુનિવર્સીટી દ્વારા બરખાસ્ત કરવામાં આવેલ પ્રોફેસર ગુરસંગ પ્રીત કૌર ભગવાન રામને ખરાબ વ્યક્તિ તરીકે ચીતરી રહ્યાં છે. તેઓ વિડીયોમાં કહે છે, “રામ ખરાબ માણસ હતા. રામે રાવણ જેવા નેકદિલ માણસ સાથે છળ કર્યું હતું.” તેઓ પોતાના વિડીયોમાં વિદ્યાર્થીઓને કહે છે કે રાવણ સીતાનું અપહરણ કરીને તેમને લંકા નહતો લઇ ગયો પરંતુ રામે રાવણનો વધ કરવા માટે સીતાહરણનું ષડ્યંત્ર રચ્યું હતું.

    એટલું જ નહીં, પ્રોફેસર એક જ વાત વારંવાર કહેતાં જોવા મળે છે. તેઓ વિદ્યાર્થીઓને ભગવાન રામ વિરુદ્ધ ભડકાવતા કહે છે કે, શું તમે જાણો છો કે રાવણ એક નેકદિલ માણસ હતો? જ્યારે રામ સારા માણસ ન હતો. તે ખૂબ શાતીર હતો, જેણે ચતુરાઈથી સીતાના અપહરણની યોજના બનાવી અને રાવણને ખરાબ સાબિત કરી દીધો. જે બાદ પ્રોફેસર વિદ્યાર્થીઓને પોતાના કુતર્કો પર વિચાર કરવા માટે પણ કહે છે.

    આ વિડીયો સોશિયલ મીડિયા પર વાયરલ થયા બાદ ઇન્ટરનેટ યુઝરોએ ભારે વિરોધ નોંધાવ્યો હતો તો આ મામલે દિલ્હી પોલીસને પણ કડક પગલાં લેવા માટેની ફરિયાદ કરવામાં આવી હતી. તેમજ લોકોએ યુનિવર્સીટીને ટેગ કરીને કડક પગલાં લેવાની માંગ પણ કરી હતી. જોકે, ભારે વિરોધ બાદ યુનિવર્સીટીએ પ્રોફેસરને બરખાસ્ત કર્યાં છે.

    ભાજપ સાંસદ મનસુખ વસાવા આકરા પાણીએ, કહ્યું- હિંદુ ધર્મને તોડવા માટે વિદેશી શક્તિઓ સક્રિય, હિંદુઓએ સજાગ રહેવાની જરૂર, ધર્મપરિવર્તન વિશે પણ ખુલીને બોલ્યા

    ઑપઇન્ડિયા સ્ટાફ
    -
    0
    ભાજપ સાંસદ મનસુખ વસાવા આકરા પાણીએ, કહ્યું- હિંદુ ધર્મને તોડવા માટે વિદેશી શક્તિઓ સક્રિય, હિંદુઓએ સજાગ રહેવાની જરૂર, ધર્મપરિવર્તન વિશે પણ ખુલીને બોલ્યા

    ભારતીય જનતા પાર્ટીના સાંસદ મનસુખ વસાવાએ ધર્મપરિવર્તન મામલે મોટું નિવેદન આપ્યું છે. દેડિયાપાડામાં જનજાતિ સુરક્ષા મંચ દ્વારા આયોજિત એક જાહેર સભામાં સંબોધતા સાંસદ મનસુખ વસાવા હિંદુ ધર્મની ટીકા કરનારાઓ અને ધર્મ પરિવર્તન કરાવનારાઓ પર વરસ્યા હતા.

    સાંસદ મનસુખ વસાવાએ ધર્મપરિવર્તન કરનારા લોકોને આદિવાસી સમાજમાંથી કાઢી મૂકવા જોઈએ તેમ કહ્યું હતું તો સજાગ નહીં રહેવા પર હિંદુઓ ફરી લઘુમતીમાં મૂકાઈ જશે તેમ જણાવ્યું હતું. તદુપરાંત, હિંદુઓને ધર્મથી વિમુખ કરવા પાછળ વિદેશી ષડ્યંત્રો પણ કારણભૂત હોવાનું તેમણે જણાવ્યું હતું.

    આદિવાસી વિસ્તારના લોકોની ગરીબીનો લાભ લઇ લોભ-લાલચ આપી કરાતા ધર્મ-પરિવર્તન મામલે કડક વિરોધ નોંધાવતા કહ્યું કે, “ધર્મ હંમેશા જોડવાનું કામ કરે છે, તોડવાનું નહીં. કોઈની ગરીબી કે અજ્ઞાનતાનો લાભ લઇ ધર્મને તોડવાનું કામ કરવું એ ધર્મ ન કહેવાય.” તેમણે હાકલ કરતા કહ્યું કે, જો સજાગ નહીં રહ્યા તો હિંદુઓ લઘુમતીમાં મૂકાઈ જશે. હિંદુ ધર્મમાં માનનારા લોકોનું ધર્મપરિવર્તન કરવા પાછળ વિદેશી ષડ્યંત્ર છે તેમ પણ તેમણે આક્ષેપ લગાવ્યો હતો.

    સોશિયલ મીડિયા પર હિંદુ દેવી-દેવતાઓ પર ટિપ્પણી કરતા લોકોને નિશાને લઇ તેમણે કહ્યું હતું કે, “તમે હિંદુ દેવી-દેવતાની ટીકા કરો છો. પયગંબરની કે ઇસુ ભગવાનની ટીકા કરી છે? હું તેમને ભગવાન માનું છું. પરંતુ તમને શું અધિકાર છે અમારા દેવી-દેવતાઓ પર ટિપ્પણી કરવાનો? તેમણે કહ્યું હતું કે દેવી-દેવતાઓની ટીકા-ટિપ્પણી થાય તો અમે મૌન નથી રહેવાના, અમારા આરાધ્યો ઉપર ટીકા ટિપ્પણી કરવાનો કોઈને અધિકાર નથી.” તેમણે આવા લોકો પર આદિવાસીઓને ગેરમાર્ગે દોરવાનો પણ આરોપ લગાવ્યો હતો.

    ધર્મપરિવર્તન વિરુદ્ધ કડક કાયદાની માંગ કરતા તેમણે કહ્યું હતું કે, ધર્મ પરિવર્તન કરીને અન્ય ધર્મ સ્વીકારનાર સામે કાયદો બનાવવામાં આવે તે જરૂરી છે અને જે આદિવાસી હોય અને હિંદુ ધર્મમાં જન્મ્યો હોય તે ધર્મ છોડીને જાય તો તેને ડી-લિસ્ટ કરીને અનુસુચિત જનજાતિ તરીકેના હકો મળવાના બંધ થઇ જવા જોઈએ તેમ પણ તેમણે કહ્યું હતું. તેમણે એમ પણ ઉમેર્યું કે આવું જ ચાલતું રહ્યું તો અમારા જેવા લોકો બેસી નથી રહેવાના અને કડક કાયદો પણ બનાવીશું. આ ઉપરાંત તેમણે આવી બાબતો માટે સજાગ રહેવા માટે પણ જાહેરમંચ પરથી અપીલ કરી હતી.

    અહીં ઉલ્લેખનીય છે કે સાંસદ મનસુખ વસાવા આ પહેલાં પણ ધર્મપરિવર્તન અને લવ જેહાદ જેવા મુદ્દાઓ ઉઠાવી ચૂક્યા છે. ગત વર્ષે તેમણે તત્કાલીન મુખ્યમંત્રી વિજય રૂપાણીને સંબોધીને એક પત્ર લખ્યો હતો અને આદિવાસી વિસ્તારોમાં યુવતીઓને લવજેહાદનો શિકાર થતી બચાવવા માટે કડક કાયદો બનાવવા માંગ કરી હતી.

    તેમણે કહ્યું હતું કે, લવજેહાદના નામે હિંદુ યુવતીઓનું જીવન બરબાદ કરી નાંખવામાં આવે છે અને યુવતીઓને ફસાવવા માટે મુસ્લિમ યુવકોને તાલીમ પણ આપવામાં આવી હોવાનો તેમણે આરોપ લગાવ્યો હતો. જોકે, અહીં એ પણ નોંધવું જોઈએ કે ગુજરાત સરકારે ગત માર્ચ મહિનામાં લવ-જેહાદ સબંધિત કાયદો પસાર કર્યો હતો. જે જૂન 2021 થી લાગુ પણ થઇ ગયો છે.

    આસામ : ગુવાહાટી નગર નિગમની ચૂંટણીમાં NDAનો ભવ્ય વિજય : 60 માંથી 58 બેઠકો કબજે કરી, કોંગ્રેસનું ખાતું પણ ન ખૂલ્યું!

    ઑપઇન્ડિયા સ્ટાફ
    -
    0
    આસામ : ગુવાહાટી નગર નિગમની ચૂંટણીમાં NDAનો ભવ્ય વિજય : 60 માંથી 58 બેઠકો કબજે કરી, કોંગ્રેસનું ખાતું પણ ન ખૂલ્યું!

    આસામના પાટનગર ગુવાહાટીની નગર નિગમની ચૂંટણીમાં ભાજપ ગઠબંધનને (NDA) પ્રચંડ જીત મળી છે. ગુવાહાટી નગર નિગમની ચૂંટણી દરમ્યાન કુલ 60 બેઠકોમાંથી 58 બેઠકો ભાજપ ગઠબંધનને મળી છે, જ્યારે દેશની બીજી સૌથી મોટી અને દાયકાઓ સુધી આસામમાં શાસન કરનારી પાર્ટી કોંગ્રેસ પોતાનું ખાતું પણ ખોલી શકી ન હતી.

    ગુવાહાટી નગર નિગમ ચૂંટણી પરિણામમાં NDAને મળેલી કુલ 58 બેઠકો પૈકી 52 બેઠકો પર ભાજપના ઉમેદવારનો વિજય થયો છે. જેમાંથી પણ ત્રણ બેઠકો પર ભાજપના ઉમેદવાર બિનહરીફ જીત્યા હતા. જ્યારે ભાજપની સહયોગી પાર્ટી અસોમ ગણા પરિષદે બાકીની છ બેઠકો મેળવી હતી. જ્યારે કોંગ્રેસ પાર્ટીને એક પણ બેઠક મળી ન હતી. કોંગ્રેસ કરતાં સારું પ્રદર્શન આમ આદમી પાર્ટીનું રહ્યું હતું, જેણે એક બેઠક મેળવી હતી.

    વિકાસના એજન્ડા પર નિર્માણ માટે જનતાએ જનાદેશ આપ્યો : વડાપ્રધાન નરેન્દ્ર મોદી

    ચૂંટણીમાં જીત બાદ વડાપ્રધાન નરેન્દ્ર મોદીએ ટ્વીટ કરીને પાર્ટી કાર્યકર્તાઓ અને જનતાને અભિનંદન પાઠવ્યા હતા. વડાપ્રધાને કહ્યું કે, “વિકાસના એજન્ડા પર નિર્માણ માટે ગુવાહાટીની જનતાએ ભાજપને મોટો જનાદેશ આપ્યો છે, તેમજ તેની સાથે જનતાએ રાજ્ય સરકારની મહેનતને પણ આશીર્વાદ આપ્યા છે. જે માટે ગુવાહાટીના લોકોનો આભાર. સખત મહેનત માટે દરેક ભાજપ કાર્યકર્તાનો હું આભાર વ્યક્ત કરું છું.”

    ઐતિહાસિક જીત બદલ જનતાને નમન : આસામ સીએમ

    આ ઉપરાંત, આસામના મુખ્યમંત્રી હિમંતા બિસ્વા સરમાએ પણ ભાજપ અને સહયોગી પાર્ટીને જીત અપાવવા બદલ જનતાનો આભાર માનતા કહ્યું કે, “આ ઐતિહાસિક જીત અપાવવા બદલ હું ગુવાહાટીના લોકોને નમન કરું છું. આ વિશાળ જનાદેશ થકી લોકોએ વડાપ્રધાન નરેન્દ્ર મોદીના માર્ગદર્શનમાં અમારી વિકાસયાત્રામાં તેમના વિશ્વાસની પુષ્ટિ કરી છે.”

    આ પહેલાંની ચૂંટણીમાં કોંગ્રેસ જીતી હતી

    અહીં એ પણ નોંધવું જોઈએ કે, આ પહેલાં ગુવાહાટી નગર નિગમની ચૂંટણી 2013 માં થઇ હતી. તે સમયે કોંગ્રેસ પાર્ટીએ કુલ 31 માંથી 19 વોર્ડ જીત્યા હતા. ત્યારે ભાજપને ફાળે 11 બેઠકો આવી હતી. આ વખતે વોર્ડની સંખ્યા વધારીને 60 કરવામાં આવી હતી, જેમાંથી પચાસ ટકા બેઠકો મહિલાઓ માટે અનામત રાખવામાં આવી હતી. 60 બેઠકો પર કુલ 200 ઉમેદવારો ઉભા રહ્યા હતા.

    નગર નિગમની ચૂંટણીમાં ભાજપે પોતાના 53 ઉમેદવારોને મેદાને ઉતાર્યા હતા, જેમાંથી 52 પર પાર્ટી જીતી હતી. જ્યારે ભાજપની સહયોગી પાર્ટી એજીપીએ સાત બેઠકો પર ચૂંટણી લડી, તેમાંથી 6 પર જીત મેળવી હતી. કોંગ્રેસ પાર્ટીએ કુલ 55 બેઠકો પર ચૂંટણી લડી હતી, પરંતુ એક પણ સીટ નસીબમાં આવી ન હતી. આમ આદમી પાર્ટીએ 39 વોર્ડમાં પોતાના ઉમેદવારો ઉતાર્યા હતા, જેમાંથી માત્ર એક બેઠક પર તેમને જીત મળી હતી.

    કોંગ્રેસ પાર્ટીનો ગઢ કહેવાતું હતું આસામ, આજે એક બેઠક પણ ન મળી

    સ્વતંત્રતા બાદથી ઘણાં દાયકાઓ સુધી આસામમાં કોંગ્રેસ પાર્ટીનું જ શાસન રહ્યું હતું અને રાજ્ય કોંગ્રેસનો ગઢ કહેવાતું હતું. સૌથી વધુ વર્ષો સુધી આસામમાં સત્તા પર રહેવાનો રેકોર્ડ કોંગ્રેસના સ્વર્ગીય નેતા તરૂણ ગોગોઈના નામે બોલે છે. તેઓ 2001 થી 2016 એમ પંદર વર્ષ સુધી આસામના સીએમ રહ્યા હતા.

    જોકે, 2016 માં યોજાયેલી આસામ વિધાનસભા ચૂંટણીમાં સૌપ્રથમ વખત 86 બેઠકો મેળવીને ભાજપે સત્તા મેળવી હતી અને સર્બાનંદ સોનાવાલ મુખ્યમંત્રી બન્યા હતા. જે બાદ 2021 માં ભાજપ હિમંતા બિસ્વા સરમાના ચહેરા પર ચૂંટણી લડ્યું હતું અને ફરીથી બહુમતીથી સત્તા મેળવી લીધી હતી. હાલ હિમંતા સરમા આસામના મુખ્યમંત્રી છે.

    એ પણ નોંધવું જોઈએ કે હિમંતા બિસ્વા સરમા અગાઉ કોંગ્રેસ પાર્ટીના દિગ્ગજ નેતા ગણાતા હતા અને તરૂણ ગોગોઈ સરકારમાં વિવિધ મંત્રાલય પણ સંભાળી ચૂક્યા હતા. જોકે, વર્ષ 2015 માં કોંગ્રેસ હાઈકમાન્ડ અને રાહુલ ગાંધી સાથે વિવાદ થતાં તેઓ કોંગ્રેસ છોડીને ભાજપમાં જોડાયા હતા અને 2016 ની ચૂંટણીમાં ભાજપ માટે પ્રચાર કર્યો હતો અને પાર્ટીને સત્તા સુધી પહોંચાડી હતી.

    માતોશ્રીને હાથ લગાવ્યો તો 20 ફૂટ નીચે દાટી દઈશું: નવનીત કૌરને ધમકી આપતા સંજય રાઉત

    ઑપઇન્ડિયા સ્ટાફ
    -
    0
    માતોશ્રીને હાથ લગાવ્યો તો 20 ફૂટ નીચે દાટી દઈશું: નવનીત કૌરને ધમકી આપતા સંજય રાઉત

    મહારાષ્ટ્રમાં હનુમાન ચાલીસા અંગે ચાલી રહેલા વિવાદમાં આજે શિવસેનાના પ્રવક્તા સંજય રાઉતે સંસદ સભ્ય નવનીત કૌર રાણા અને તેમના પતિ રવિ રાણાને ધમકી આપતાં કહ્યું છે કે, “માતોશ્રીને હાથ લગાવવાનો પ્રયાસ પણ ન કરતા નહીંતો અમે તમને જમીનથી 20 ફૂટ નીચે દાટી દઈશું.”

    સંજય રાઉતે આ ધમકી નાગપુર ખાતે એક પ્રેસ કોન્ફરન્સને સંબોધિત કરતાં કહ્યું હતું. નવનીત અને રવિ રાણાએ મુંબઈમાં ઉદ્ધવ ઠાકરેના નિવાસ માતોશ્રી ખાતે હનુમાન ચાલીસાનો પાઠ કરવાનો પડકાર ફેંક્યો હતો.

    છેલ્લા અમુક દિવસો દરમ્યાન શિવસેનાએ આ દંપત્તિ વિષે ઘણી અભદ્ર ભાષામાં કમેન્ટ્સ કરી છે જેમણે મહારાષ્ટ્રમાં લાઉડસ્પીકરની ચળવળ ચલાવવાની શરુ કરી છે. સંજય રાઉતે જણાવ્યું હતું કે તેઓ આ રેકોર્ડ પર  જણાવે છે કે જો માતોશ્રીને હાથ પણ લગાવવામાં આવશે તો તેમને જમીનથી 20 ફૂટ નીચે દાટી દેવામાં આવશે.

    રાઉતે ઉમેર્યું હતું કે આ સાચું હિન્દુત્વ નથી, એ લોકો (રાણા દંપત્તિ) નફરતનું ઝેર ફેલાવી રહ્યાં છે, અમે આ પ્રકારની પ્રયુક્તિઓને કડક હાથે દબાવી દઈશું. રાઉતે આ દંપત્તિને અમરાવતીના બંટી અને બબલી કહેતાં કહ્યું હતું કે તેઓ તેમના મુંબઈ ખાતેના નિવાસસ્થાનના દરવાજા આગળ એમ્બ્યુલન્સ મુકીને તેને બ્લોક કરવાના શિવસેનાના કાર્યકર્તાઓના કાર્યને બિરદાવે છે. તેમણે અચાનક આવી પડનારી કોઈ જરૂરીયાતને પહોંચી વળવા માટે જ અને બંટી અને બબલીને જો હોસ્પિટલ લઇ જવા પડે તો તેના માટે જ આ એમ્બ્યુલન્સ તેમના ઘર સામે મૂકી દીધી હતી. આ અમારો માનવીય સ્વભાવ દર્શાવે છે.

    રાઉતે ભાજપ પર આરોપ મુકતાં કહ્યું હતું કે ભાજપ આ બંનેને શિખંડી બનાવીને તેમના ખભે બંદૂક મુકીને અમારા પર હુમલો કરી રહ્યું છે. પરંતુ માતોશ્રીને જો નુકશાન પહોંચાડશો તો તમારે તમારા અંતિમસંસ્કારનો સમાન તૈયાર રાખવો પડશે. આ પ્રકારના બોગસ લોકો હિન્દુત્વને શું આગળ લઇ જવાના? અમે તો મહાભારત શરુ કરવા સક્ષમ છીએ.

    હનુમાનજીનું ઉદાહરણ આપતા સંજય રાઉતે આગળ જણાવ્યું હતું કે શિવસેનાનું હિન્દુત્વ ગદાધારી માટે છે નહીં કે ઘંટાધારીઓ માટે. અમે 1992માં અયોધ્યાની જેમજ ધર્મના રક્ષણ હેતુ ગદા ઉપાડીશું. શનિવારે માતોશ્રી ખાતે હનુમાન ચાલીસાના પાઠ કરવાના નવનીત રાણા અને તેમના પતિ રવિ રાણાના પ્રયાસોને જ્યારે શિવસેનાના કાર્યકર્તાઓએ નિષ્ફળ બનાવ્યા ત્યારે મુંબઈ પોલીસે તેમની ધરપકડ કરી હતી. જો કે આ દંપત્તિએ આજની નરેન્દ્ર મોદીની મુંબઈ યાત્રાને ધ્યાનમાં લઈને મહારાષ્ટ્રના મુખ્યમંત્રી ઉદ્ધવ ઠાકરેના નિવાસસ્થાન માતોશ્રી ખાતે પોતાનો હનુમાન ચાલીસાના પઠનનો કાર્યક્રમ પડતો મૂક્યો હોવાની જાહેરાત પણ કરી હતી.

    ઈરફાન પઠાણ હવે રાજકારણની પીચ પર રમશે? ટ્વીટ બાદ સોશિયલ મીડિયામાં ચર્ચા

    ઑપઇન્ડિયા સ્ટાફ
    -
    0
    ઈરફાન પઠાણ હવે રાજકારણની પીચ પર રમશે? ટ્વીટ બાદ સોશિયલ મીડિયામાં ચર્ચા

    ભારતીય ક્રિકેટ ટીમનો પૂર્વ ક્રિકેટર ઈરફાન પઠાણ હાલના દિવસોમાં ચર્ચામાં છે. થોડા દિવસો પહેલાં ઈરફાન પઠાણે કરેલું એક ટ્વીટ ટ્વીટર સહિતના સોશિયલ મીડિયા પ્લેટફોર્મ ઉપર ભારે ચર્ચાનો વિષય બન્યું હતું. જે બાદ ગઈકાલે પણ એ જ મુદ્દાને લાગતું વધુ એક ટ્વીટ કરવામાં આવ્યું હતું. સામાન્ય રીતે ક્રિકેટ કે અન્ય બાબતો અંગે ટ્વીટ કરતા ઈરફાન પઠાણે અચાનક રાજકીય વિષયો પર બોલવા-લખવાનું શરૂ કેમ કરી દીધું તે હાલ નેટીઝન્સમાં ચર્ચાનો વિષય છે.

    22 એપ્રિલના રોજ ઈરફાન પઠાણે ટ્વીટ કરતાં કહ્યું હતું, ‘મારા અદ્ભૂત દેશ પાસે દુનિયાનો સૌથી મહાન દેશ બનવાની ક્ષમતા છે. પરંતુ…’ જે બાદ ઈરફાને વાક્ય અધૂરું છોડી દીધું હતું. જોકે, ઈરફાન પઠાણે ચોક્કસ કયા વિષયને લઈને આ ટ્વીટ કર્યું તે આશય સ્પષ્ટ કર્યો ન હતો પરંતુ દેશની વર્તમાન પરિસ્થિતિઓને આધારે ઇન્ટરનેટ યુઝરોએ તાળો મેળવી લીધો હતો અને જે બાદ ટ્વીટ મામલે ઘણી ચર્ચા પણ થઇ હતી.

    ઈરફાન પઠાણના આ ટ્વીટ બાદ અન્ય ભારતીય ક્રિકેટર અમિત મિશ્રાએ પણ એ જ અંદાજમાં ટ્વીટ કર્યું હતું. જોકે, તેમણે ઈરફાન કે અન્ય કોઈ પણ વ્યક્તિનું નામ લખ્યું ન હતું. અમિત મિશ્રાએ લખ્યું, ‘જો કેટલાક લોકો સ્વીકારી લે કે બંધારણ જ એકમાત્ર અનુસરવા જેવું પુસ્તક છે તો મારા અદભૂત દેશ પાસે દુનિયાનો મહાન દેશ બનવાની ક્ષમતા છે.’ અમિત મિશ્રાએ ટ્વીટમાં ક્યાંય નામ લખ્યું ન હતું પરંતુ ઈશારો ઈરફાન પઠાણના ટ્વીટ તરફ હોવાથી આ ટ્વીટની પણ ખૂબ ચર્ચા થઇ હતી.

    આવનાર સમયમાં ગુજરાત વિધાનસભાની ચૂંટણી આવી રહી છે. ચૂંટણીને લઈને ભાજપ, કોંગ્રેસ અને આમ આદમી પાર્ટી સહિતના પક્ષો સક્રિય થઇ ગયા છે તો બીજી તરફ પક્ષપલટાની મોસમ પણ શરૂ થઇ છે. પાર્ટીના નેતાઓ એક પાર્ટીમાંથી બીજી પાર્ટીમાં જઈ રહ્યા છે તો કેટલાક સામાજિક સંસ્થાઓ કે કળા જેવા ક્ષેત્રો સાથે જોડાયેલા લોકો પણ ચૂંટણી અગાઉ રાજકારણમાં ડગ માંડવાના પ્રયાસ કરી રહ્યા છે. ત્યારે ઈરફાન પઠાણે પણ ચૂંટણીના થોડા સમય પહેલાં અચાનક રાજકીય મુદ્દાઓને લઈને ટ્વીટ કરતાં ઇન્ટરનેટ યુઝરોમાં ચર્ચા શરૂ થઇ ગઈ છે કે શું ઈરફાન પઠાણ પણ આવનાર સમયમાં રાજકારણમાં જોડાશે?

    ઉલ્લેખનીય છે કે ભૂતકાળમાં પણ અનેક ક્રિકેટરો નિવૃત્તિ બાદ રાજકારણમાં પ્રવેશીને સાંસદ કે ધારાસભ્ય પણ બન્યા છે. તાજેતરમાં જ પંજાબના ક્રિકેટર હરભજનસિંઘને આમ આદમી પાર્ટીએ રાજ્યસભા સાંસદ તરીકે નામાંકિત કર્યા હતા અને તેઓ જીત્યા પણ હતા. જે બાદ હવે ગુજરાતી ક્રિકેટર ઈરફાન પઠાણના રાજકારણમાં પ્રવેશવા અંગે સોશિયલ મીડિયામાં ચર્ચા ચાલી રહી છે.

    @venkybengaluru નામના એક યુઝરે ઈરફાનના ટ્વીટને ટાંકીને કહ્યું, ‘આ ટ્વીટ સંકેત આપી રહ્યું છે કે ઈરફાન પઠાણ રાજકારણમાં જોડાઈ રહ્યો છે. મને લાગે છે કે તે ‘આપ’માં જોડાશે. તમને શું લાગે છે? અન્ય એક યુઝર લખે છે, મને શા માટે એવું લાગી રહ્યું છે કે ઈરફાન પઠાણ ગુજરાત ચૂંટણી પહેલાં ‘આપ’માં જોડાઈ શકે છે? પ્રશાંત સંજય નામના યુઝર લખે છે, ‘શું ઈરફાન પઠાણ ચૂંટણી લડવાના છે? તેમના ટ્વીટ પરથી તો એવું જ લાગે છે.

    વિવેક સિંઘ નામના યુઝરે ટ્વીટ કરીને પ્રશ્ન કર્યો છે કે, શું ઈરફાન પઠાણ ગુજરાત વિધાનસભા ચૂંટણી પહેલાં આમ આદમી પાર્ટીમાં જોડાવા જઈ રહ્યો છે?

    જોકે, અહીં એ પણ નોંધવું જોઈએ કે રાજકારણમાં જોડાવા અંગે કે ન જોડાવા અંગે ઈરફાન પઠાણ તરફથી હજુ સુધી કોઈ અધિકારીક નિવેદન આપવામાં આવ્યું નથી કે કોઈ પ્રતિક્રિયા આપવામાં આવી નથી.

    અગાઉ પણ ઈરફાન પઠાણ વિવાદમાં આવ્યો હતો

    આ પહેલાં પણ ઈરફાન પઠાણ વિવાદોમાં ફસાયો હતો. વર્ષ 2021 માં વાઈરલ થયેલા એક વિડીયોમાં ઈરફાન વિરુદ્ધ લગ્નેતર સબંધોનો આરોપ લગાવવામાં આવ્યો હતો. જેમાં યુવતીના સસરાએ તેની વિરુદ્ધ ઈરફાન પઠાણ સાથે લગ્નેતર સબંધોનો આરોપ લગાવ્યો હતો. નોંધનીય બાબત એ છે કે આ યુવતી ઈરફાન પઠાણની પિતરાઈ બહેન છે. તેના પિતાએ આરોપ લગાવ્યો હતો કે તેની પત્ની અને ઈરફાન વચ્ચે ઘણા સમયથી સબંધો હતા અને લગ્ન પછી પણ ચાલુ જ રહ્યા હતા. તેઓ વિડીયો કોલિંગ દ્વારા વાત કરતા હોવાનું અને ડેટ પર જતા હોવાનું પણ કહેવામાં આવ્યું હતું. રિપોર્ટ અનુસાર, જ્યારે આ વિગતો બહાર આવી તો યુવતીએ તેમની વિરુદ્ધ દહેજ ઉત્પીડનનો કેસ દાખલ કરી દીધો હતો.

    કેરળ સરકારે દિલ્હી મોડેલની પોલ ખોલી: દિલ્હીના ‘શિક્ષણ મોડેલ’નો અભ્યાસ કરવા માટે કેરળના અધિકારીઓએ સરકારી શાળાની મુલાકાત લીધી હોવાનો ‘આપ’ ધારાસભ્યનો દાવો, કેરળ શિક્ષણમંત્રીએ નકાર્યો

    ઑપઇન્ડિયા સ્ટાફ
    -
    0
    કેરળ સરકારે દિલ્હી મોડેલની પોલ ખોલી: દિલ્હીના ‘શિક્ષણ મોડેલ’નો અભ્યાસ કરવા માટે કેરળના અધિકારીઓએ સરકારી શાળાની મુલાકાત લીધી હોવાનો ‘આપ’ ધારાસભ્યનો દાવો, કેરળ શિક્ષણમંત્રીએ નકાર્યો

    દિલ્હીના શાસક પક્ષ આમ આદમી પાર્ટીનાં ધારાસભ્ય આતિશી મારલેનાએ ટ્વીટ કરીને દિલ્હીના શિક્ષણ મોડેલ અંગે અભ્યાસ કરવા માટે કેરળના અધિકારીઓએ દિલ્હીની એક શાળાની મુલાકાત લીધી હોવાનો દાવો કર્યો હતો. જોકે, ત્યારબાદ કેરળ સરકાર દ્વારા આ દાવાનું ખંડન કરીને સ્પષ્ટતા કરવામાં આવી હતી કે તેમના કોઈ પણ અધિકારી દિલ્હી ગયા નહતા!

    23 એપ્રિલના (શનિવાર) રોજ આમ આદમી પાર્ટી નેતા અને કાલકાજીનાં ધારાસભ્ય આતિશી મારલેનાએ ટ્વીટ કરતાં કહ્યું હતું, “કાલકાજી ખાતેની શાળામાં કેરળના અધિકારીઓની યજમાની કરવાની તક મળી. તેઓ અમારા શિક્ષણ મોડેલને સમજવા અને પોતાના રાજ્યમાં લાગુ કરવા માટે ઈચ્છુક હતા. આ અરવિંદ કેજરીવાલ સરકારની રાષ્ટ્રનિર્માણ માટેની વિચારધારા છે.”

    આતિશી મારલેનાના ટ્વીટનો સ્ક્રીનશોટ

    ઉપરાંત, આ જ પ્રકારનું એક ટ્વીટ આમ આદમી પાર્ટીના અધિકારીક ટ્વીટર હેન્ડલ પરથી પણ કરવામાં આવ્યું હતું. જેમાં જણાવવામાં આવ્યું કે, ‘કેરળના મહાનુભાવોએ શિક્ષણ ક્રાંતિ અંગે જાણવા માટે દિલ્હીની સરકારી શાળાઓની મુલાકાત લીધી અને એમ પણ કહ્યું કે, આ કક્ષાની સુવિધાઓ હશે તેવી તેમને અપેક્ષા ન હતી.’ વધુમાં કહેવામાં આવ્યું કે, ‘કેજરીવાલ સરકારના હેપ્પીનેસ ક્લાસથી પ્રભાવિત થઈને શિક્ષણવિદોએ કેરળમાં પણ આ પ્રણાલી લાગુ કરવાની ઈચ્છા વ્યક્ત કરી.’

    આમ આદમી પાર્ટીના ટ્વીટનો સ્ક્રીનશોટ

    જોકે, આમ આદમી પાર્ટીનો આ દાવો લાંબો સમય ટકી શક્યો નહીં અને ‘આપ’ ધારાસભ્ય આતિશી મારલેના અને પાર્ટી દ્વારા કરવામાં આવેલ ટ્વીટ ધ્યાને આવતાં કેરળ સરકારે આ મામલે સ્પષ્ટતા કરવી પડી હતી. કેરળ સરકારે સ્પષ્ટતા કરીને કહ્યું કે, તેમના કોઈ અધિકારીઓ દિલ્હી ગયા ન હતા.

    કેરળ રાજ્યના શિક્ષણ પ્રધાને દિલ્હીના શિક્ષણ મોડેલ અંગે અભ્યાસ કરવા કે અન્ય કોઈ પણ કારણોસર રાજ્યના અધિકારીઓને દિલ્હી મોકલવા અંગેના અહેવાલો નકારી કાઢ્યા હતા. કેરળના શિક્ષણમંત્રી વી શિવનકુટ્ટીએ કહ્યું, ‘દિલ્હી મોડેલ’ અંગે જાણકારી મેળવવા માટે કેરળ શિક્ષણ વિભાગે કોઈને પણ મોકલ્યા નથી.

    કેરળના શિક્ષણમંત્રીનું ટ્વીટ

    તેમણે વધુમાં કહ્યું કે, “બીજી તરફ, ગયા મહિને કેરળ મોડેલનો અભ્યાસ કરવા માટે દિલ્હીથી મુલાકાત લેવા માટે આવેલ અધિકારીઓને અમે તમામ મદદ પૂરી પાડી હતી. ‘આપ’ ધારાસભ્ય દ્વારા કયા અધિકારીઓનું સ્વાગત કરવામાં આવ્યું એ અમે પણ જાણવા માંગીએ છીએ.”

    જોકે, દિલ્હીની શાળાઓની મુલાકાત લેનારાઓમાં CBSE સ્કૂલ મેનેજમેન્ટ એસોસિએશનના સેક્રેટરી અને કેરળ સહોદય સંઘના કોષાધ્યક્ષ સહિતના વ્યક્તિઓ સામેલ હોવાનું ધ ઇન્ડિયન એક્સપ્રેસના એક અહેવાલમાં જાણવા મળ્યું છે.

    સુરત : હેરિટેજ કોમ્પલેક્સમાં દરગાહનું નિર્માણ થયું હોવાનો વિડીયો ફરતો થયો

    ઑપઇન્ડિયા સ્ટાફ
    -
    0
    સુરત : હેરિટેજ કોમ્પલેક્સમાં દરગાહનું નિર્માણ થયું હોવાનો વિડીયો ફરતો થયો

    સુરત શહેરના ચોકબજાર સ્થિત હેરિટેજ કોમ્પલેક્સમાં દરગાહ મળી આવી હોવાનો વિડીયો વાઈરલ થયો છે.

    વાઈરલ વિડીયોમાં જોવા મળે છે કે દરગાહની આસપાસ તાજેતરમાં જ સિમેન્ટ વડે નવા જ પથ્થરો બેસાડવામાં આવ્યા છે. વિડીયો બનાવનાર વ્યક્તિ કહેતો સંભળાય છે કે, દરગાહ પહેલાં અહીં ન હતી અને રાતોરાત બનાવી દેવામાં આવી છે. તે કહે છે, “જ્યાંથી દરગાહ મળી આવી તે આખો વિસ્તાર કબજે કરવામાં આવ્યો છે, ધીમે-ધીમે આખી જમીન કબજે કરવામાં આવી રહી છે. કાલ સુધી આ ન હતું. જાહેર જગ્યાએ અને સરકારી સંપત્તિ પર કરવામાં આવી રહ્યું છે. આજે અહીં કબજો થયો છે, કાલે તમારા ઘરો પર કબજો કરવામાં આવશે.” આ દરગાહ ગેબન શાહ વાલિદની હોવાનું જાણવા મળ્યું છે.

    સૂત્રો અનુસાર, દરગાહની વિગતો માટે પોલીસનો સંપર્ક કરવામાં આવતા જણાવવામાં આવ્યું કે, જમીન માલિકીના દસ્તાવેજો પરથી જાણવા મળે છે કે આ જમીન ત્રણ પક્ષોની છે. જેમાં એક પક્ષ સુરત મહાનગરપાલિકા છે, એક સરકારી જમીન છે અને અન્ય એક પક્ષ ખાનગી છે. ખાનગી માલિકી કોની પાસે છે તે અંગે તપાસ કરતા સુરત પોલીસના અધિકારીઓને જાણવા મળ્યું કે, ત્રીજો ખાનગી પક્ષ એક પાંચથી છ ટ્રસ્ટીઓવાળું એક ટ્રસ્ટ છે. પોલીસે કહ્યું કે, તેઓ જમીન માલિકીની વધુ વિગતો મેળવવા માટે શહેર સર્વેક્ષણનો સંપર્ક કરી રહ્યા છે.

    જમીનની માલિકી ધરાવતા ટ્રસ્ટમાં ઘનીભાઈ દેસાઈ, ગોરધનભાઈ ચોખાવાલા, યશવંતભાઈ શુક્લા, ઈશ્વરલાલ દેસાઈ અને ચુનીભાઈ ભટ્ટ નામના ટ્રસ્ટીઓ છે. હેરિટેજ કોમ્પ્લેક્સની જમીનની માલિકી ત્રણ પક્ષો પાસે છે. જેમાંથી એક મહાનગરપાલિકા, એક સરકાર અને કેટલોક હિસ્સો ત્રીજા પક્ષ ઉપરોક્ત ટ્રસ્ટ છે. દરગાહ ચોક્કસ શેના હેઠળ આવે છે તે જાણવા માટે શહેર સર્વેક્ષણમાંથી  જે-તે વિસ્તારની માલિકી જાણવી પડશે.

    જોકે, ઉપરોક્ત જાણકારી પરથી અનુમાન છે કે વકફ બોર્ડે હજુ દરગાહ પર દાવો માંડ્યો નથી. બીજી તરફ, કેટલાક સ્થાનિક અહેવાલોનો દાવો છે કે આ દરગાહ અહીં વર્ષોથી છે. જોકે, આ અહેવાલોના દાવા અંગે સ્વતંત્ર રીતે તેની ખરાઈ થઇ શકી નથી.

    સુરત મહાનગરપાલિકા હેડક્વાર્ટર પર પણ દાવો કરવામાં આવ્યો હતો

    અહીં નોંધનીય છે કે, ગત વર્ષે નવેમ્બર મહિનામાં મુગલીસરા ખાતે આવેલ SMC હેડક્વાર્ટરને વકફની સંપત્તિ જાહેર કરી દેવામાં આવ્યું હતું. આ ઈમારતનો ઉપયોગ 17મી સદીમાં હજ યાત્રાળુઓ માટે ફાળવવામાં આવ્યો હતો અને જે મુસ્લિમ શાસક દ્વારા દાન કરવામાં આવ્યું હતું એવું કારણ આપવામાં આવ્યું હતું. જે બાદ શરિયા તેમજ વકફ સંપત્તિ મામલે સુપ્રીમ કોર્ટના આદેશનો હવાલો આપી રાજ્ય વકફ બોર્ડે દાવો કર્યો હતો.

    1...1,1691,1701,171...1,177Page 1,170 of 1,177

    © Copyright - OpIndia.com