‘હું હનુમાન ચાલીસાનો પાઠ કરી રહ્યો હતો, ઈશ્વરે જ શક્તિ આપી’: કેપ્ટન સ્મિત સાથે પીએમ મોદીએ કરી વાતચીત

Screenshot

દુબઈથી ઇઝરાયેલ જતી ફ્લાઈટ ક્રેશ કરાવવાના ઓમાની કો-પાયલટના પ્રયાસ નિષ્ફળ બનાવીને સેંકડો મુસાફરોના જીવ બચાવનાર ભારતીય મૂળ ગુજરાતના પાયલટ સ્મિત મચ્છર સાથે શુક્રવારે (2 ઑક્ટોબર) વડા પ્રધાન નરેન્દ્ર મોદીએ ટેલિફોનિક વાતચીત કરી હતી. જેનો વિડીયો સામે આવ્યો છે.

વાતચીતમાં વડા પ્રધાન સ્મિતને તેમના શૌર્ય બદલ અભિનંદન પાઠવે છે અને કહે છે કે આખા દેશને તેમની ઉપર ગર્વ છે. આખો દેશ તેમના સ્વાસ્થ્યલાભ માટે પ્રાર્થના કરી રહ્યો છે.

પીએમએ કહ્યું, ‘તમારી હિંમત, તમારા ધૈર્ય અને તમારી સૂઝબૂઝે પળવારમાં આટલા નિર્ણયો કર્યા અને આટલા લોકોના જીવ બચાવ્યા, આજે આખો દેશ ગર્વથી કહી શકે છે કે આપણે ભારતીયો જીવ લેનારા નહીં જીવ બચાવનારા લોકો છીએ. તમે સ્વયં જીવન-મૃત્યુની લડાઈ લડતા હતા ત્યારે તમે પોતાની ચિંતા ન કરીને યાત્રીઓના જીવ બચાવ્યા. આખો દેશ આજે હૃદયથી ગર્વ અનુભવી રહ્યો છે.’

ત્યારબાદ વડા પ્રધાને કહ્યું કે પોતે સ્મિતના માતા-પિતા અને પરિજનો સાથે પણ વાતચીત કરી અને તેમને અભિનંદન પાઠવ્યા.

કેપ્ટન સ્મિત વાતચીત દરમ્યાન ભાવુક થઈને વડા પ્રધાન મોદીને કહે છે કે મોદી તેમના આદર્શ છે અને આજે ફોન કરીને અભિનંદન પાઠવ્યાથી પોતે ગર્વ અનુભવે છે.

તેઓ આગળ કહે છે, “હું જીવ બચાવવા માટે લડી રહ્યો હતો. હું માર ખાતો નીચે પડી ગયો હતો. મને ત્યારે પણ ખબર પડી રહી હતી કે વિમાન નીચે જઈ રહ્યું છે, કારણ કે હું 17 વર્ષથી વિમાન ઉડાવું છું. મેં વિચાર્યું કે આ જ ક્ષણ છે, મારે ઊઠવું જ પડશે, દરવાજો (કોકપિટનો) ત્યાં જ છે. ત્યારે પણ મારી ઉપર પ્રહારો ચાલુ હતા. પણ મેં દરવાજો ખોલી નાખ્યો અને બાકીના આવી ગયા. તેમની પણ એટલી જ ભૂમિકા હતી.’

સ્મિત કહે છે, “હું મારો જીવ બચાવવા માટે જ નહતો લડ્યો, હું એ પણ જાણતો હતો કે હું આ બધાને મરવા ન દઈ શકું.”

કેપ્ટન આગળ હનુમાન ચાલીસાનો પણ ઉલ્લેખ કરે છે. તેઓ કહે છે કે, “જ્યારે જ્યારે મુશ્કેલીઓ આવે ત્યારે હું હનુમાન ચાલીસા બોલું છું. તે સમયે પણ હું હનુમાન ચાલીસાનો જ પાઠ કરી રહ્યો હતો. ઈશ્વરે જ મને શક્તિ આપી.’

ત્યારબાદ સ્મિત ફરી કહે છે કે પીએમ મોદીનો કોલ આવ્યો તેનો તેમને ખૂબ ગર્વ છે. મોદી તેમને કહે છે કે તેઓ તેમની સામે ભાવુક નહીં થાય તો ક્યાં થશે. સ્મિત કહે છે કે તેમણે ક્યારેય નહતું વિચાર્યું કે તેમની પીએમ મોદી સાથે વાત થશે.

પીએમ મોદીએ કહ્યું, “લોકો સોશિયલ મીડિયા પર ભાવના વ્યક્ત કરી રહ્યા છે એ હું પણ જોઈ રહ્યો છું. લોકો કહી રહ્યા છે કે આ ન થયું હોત તો ભારત વિશે શું-શું કહેવાયું હોત, પાયલટો વિશે શું કહેવાયું હોત. તમે સૌને બચાવી લીધા અને બહુ મોટું કામ કર્યું છે.”

અંતે બંનેએ ગુજરાતીમાં પણ વાતચીત કરી હતી. જેમાં વડા પ્રધાન સ્મિતને બાળકો વિશે પૂછે છે. ફરી પરિજનોને અભિનંદન પાઠવે છે. અંતે ‘જય શ્રીકૃષ્ણ’ સાથે વાત પૂર્ણ થાય છે.