ગુરુવારે (21 નવેમ્બર) મહારાષ્ટ્રના સિટી અને ઔદ્યોગિક વિકાસ નિગમ લિમિટેડ (CIDCO)એ મહારાષ્ટ્રના નવી મુંબઈ વિસ્તારમાં પનવેલના પેરાગોન ક્ષેત્રમાં એક પહાડી પર બનેલી ગેરકાયદે દરગાહને તોડી પાડી છે. આ ઘટના પહેલાં સ્થાનિક હિંદુ કાર્યકર્તાઓએ ગેરકાયદે ઊભી કરવામાં આવેલી તે દરગાહને રાષ્ટ્રીય સુરક્ષા માટે સંભવિત જોખમ ગણાવી હતી. ઉપરાંત તે દરગાહને તોડી પાડવાને લઈને વારંવાર ફરિયાદ પણ કરવામાં આવી હતી. જેને ધ્યાને રાખીને CIDCOએ હિંદુ સંગઠનોને ખાતરી આપી હતી કે, તેઓ વહેલી તકે ગેરકાયદેસર બાંધકામને દૂર કરશે. મહત્વનું છે કે આ દરગાહ આગામી નવી મુંબઈ ઈન્ટરનેશનલ એરપોર્ટ નજીક CIDCO પ્રોપર્ટી પર બનાવવામાં આવી હતી.
મળતી માહિતી અનુસાર, CIDCOના અધિકારીઓએ પોલીસ અને સ્થાનિક વહીવટીતંત્રની મદદથી નિગમની જમીન પર ગેરકાયદે તાણી કાઢવામાં આવેલી ‘હઝરત ખ્વાજા પીર કરમ અલી’ની દરગાહ તોડી પાડી હતી. સમગ્ર કાર્યવાહી દરમિયાન સુરક્ષાની સ્થિતિને ધ્યાને રાખીને આખા વિસ્તારમાં સુરક્ષાદળોના કાફલા ખડકી દેવામાં આવ્યા હતા. નોંધવા જેવું છે કે, અધિકારીઓએ વારંવાર નોટિસ ફટકાર્યા બાદ દરગાહના સંચાલકોએ પનવેલ કોર્ટનો દરવાજો ખખડાવ્યો હતો. જોકે, ત્યાં પણ કેસ વધુ સમય સુધી ચાલી શક્યો નહોતો અને આખરે કોર્ટે જ તે દરગાહને જમીનદોસ્ત કરવા માટેનો આદેશ આપી દીધો હતો.
CIDCO removed illegally constructed durgah on squattd CIDCO plot; Dargah at Panvel was overseeing the new Navi Mumbai airport n suspicious surveillance activities were noticed misusing religious construction which was posing serious security threat to airport!#NaviMumbaiAirport pic.twitter.com/g9dW0Ho3V6
— Legal Rights Observatory- LRO (@LegalLro) November 21, 2024
અહેવાલો મુજબ, દરગાહ તોડતા પહેલાં પણ દરગાહ CIDCO અધિકારીઓ તરફથી દરગાહને વારંવાર નોટિસો આપવામાં આવી હતી જેમાં ઉલ્લેખ હતો કે, દરગાહ 2011માં ગેરકાયદે બનાવવામાં આવી હતી. ત્યારે આ નોટિસ અને CIDCOના દાવાની વિરુદ્ધમાં દરગાહની સંભાળ રાખનારા લોકોએ પનવેલ કોર્ટનો સંપર્ક કર્યો હતો. જે દરમિયાન તેમણે દરગાહ કાયદેસર બનાવવામાં આવી હોવાનો દાવો કર્યો હતો.
દરગાહના સંચાલકોએ કોર્ટમાં એવો દાવો કર્યો હતો કે, આ મઝહબી સંપત્તિ 200 વર્ષ જૂની છે અને તે ગેરકાયદેસર રીતે નથી બનાવવામાં આવી. જોકે, તેઓ તેમના દાવાઓને સાબિત કરવા માટે પૂરતા પુરાવા રજૂ કરી શક્યા નહોતા અને કોર્ટે CIDCOના નિર્ણયને માન્ય ગણીને દરગાહ દૂર કરવાનો આદેશ આપ્યો હતો.
નોંધનીય છે કે, 25 ઑક્ટોબરે CIDCOએ ગેરકાયદે બનેલી દરગાહ વિરુદ્ધ કાર્યવાહીની ખાતરી આપી હતી. આ મુદ્દો ઉઠાવતા કેટલાક હિંદુ સંગઠનોએ કહ્યું હતું કે, ટેકરીની ટોચ પર કેટલાક પથ્થરોને લીલા રંગે રંગીને વર્ષ 2012માં ગેરકાયદે અતિક્રમણ કરવામાં આવ્યું હતું અને પછીના 15 વર્ષમાં આ બાંધકામને વિસ્તૃત કરવામાં આવ્યું હતું.
આ વર્ષે ઑક્ટોબરમાં હિંદુ સંગઠનોમાંથી એક હિંદુ આઈટી સેલે ગૃહ મંત્રાલયને પત્ર લખીને ફરિયાદ કરી હતી કે, નવી મુંબઈ ઈન્ટરનેશનલ એરપોર્ટની નજીક થોડા જ સમયમાં ઇસ્લામી સંપત્તિ બની ગઈ છે અને અધિકારીઓ પણ કોઈ કાર્યવાહી કરી રહ્યા નથી. આ જ દરમિયાન હિંદુ જનજાગૃતિ સમિતિએ પણ 2023માં આ જ દરગાહ તોડવાની માંગ કરી હતી.
આ સંગઠને એવો દાવો કર્યો હતો કે, માત્ર કેટલાક પથ્થરોને રંગવાથી આ અતિક્રમણ શરૂ કરવામાં આવ્યું હતું. જે સમય જતા 1 એકરની જમીનમાં ફેલાઈ ગયું હતું. એવો પણ દાવો કરવામાં આવ્યો હતો કે, અતિક્રમણ વધતા ત્યાં એક પરિસર જેમાં ફુવારા, ગુંબજ, પાણીની ટાંકીઓ, આઉટહાઉસ, ગેસ્ટહાઉસ અને પાર્કિંગ સ્થળો પણ બનાવવામાં આવ્યા હતા.
આ સિવાય તાજેતરમાં જ એક હિંદુ સંગઠને CIDCOને આ ઘટનાને લઈને ફરિયાદ પણ કરી હતી. જેમાં કહેવામાં આવ્યું હતું કે, દરગાહ, મજારો અને તેના જેવા અન્ય બાંધકામો વિરુદ્ધ વહીવટીતંત્ર ઝડપી કાર્યવાહી કરતુ નથી અને બાકીના ગેરકાયદે બાંધકામો પર તરત જ કાર્યવાહી શરૂ કરી દેવામાં આવે છે. આ સાથે જ ફારીયાદમાં વહેલી તકે તે મઝહબી બાંધકામને દૂર કરવા માટેની માંગણી પણ કરવામાં આવી હતી. ત્યારપછી CIDCOએ મતદાન બાદ કાર્યવાહી કરવા માટેની ખાતરી પણ આપી હતી. મહારાષ્ટ્ર વિધાનસભા ચૂંટણી માટે મતદાન સમાપ્ત થયાના એક દિવસ પછી, વહીવહીતંત્રએ ગેરકાયદેસર માળખા સામે કાર્યવાહી શરૂ કરી હતી.
