અમૃતસરના પોલીસ કમિશનર ગુરપ્રીત સિંઘ ભુલ્લરની અચાનક બદલી થતાં પંજાબના રાજકારણમાં ગરમાવો આવી ગયો છે. પાકિસ્તાન આધારિત આતંકવાદી ષડયંત્રનો પર્દાફાશ કર્યાના ગણતરીના દિવસોમાં જ પંજાબ સરકારે લીધેલા આ નિર્ણય સામે અનેક સવાલો ઊભા થઈ રહ્યા છે.
હજુ તાજેતરમાં જ ભુલ્લરે પ્રેસ કૉન્ફરન્સ કરીને આતંકી મોડ્યુલ સાથે જોડાયેલા 9 આરોપીઓની ધરપકડ કરવાની જાહેરાત કરી હતી, જેમાં 4 સગીરોનો પણ સમાવેશ થતો હતો. પોલિસના જણાવ્યા અનુસાર આ ગેંગ પાકિસ્તાનની ગુપ્તચર સંસ્થા ISIના હેન્ડલર્સના ઈશારે કામ કરી રહી હતી.
આ સઘન કામગીરી દરમિયાન પોલીસ ટીમે આરોપીઓ પાસેથી 3 પિસ્તોલ, 9 જીવતા કારતૂસ અને 4 પેટ્રોલ બૉમ્બ કબજે કર્યા હતા. આ ઉપરાંત તપાસમાં એવો પણ ઘટસ્ફોટ થયો હતો કે આરોપીઓ સુરક્ષાની દ્રષ્ટિએ સંવેદનશીલ સ્થળોની રેકી કરી રહ્યા હતા.
આ કેસ ત્યારે વધુ ચર્ચામાં આવ્યો જ્યારે 4 ઑગસ્ટે ભુલ્લરે ખુલાસો કર્યો કે આરોપીઓએ દિલ્હીના જંતર-મંતરની મુલાકાત લીધી હતી. તેઓએ ત્યાં રેકી કરી હતી અને પ્રદર્શનકારીઓ પર પેટ્રોલ બૉમ્બ વડે હુમલો કરવાનું આયોજન ઘડી રહ્યા હતા. આ નિવેદન બાદ રાષ્ટ્રીય સ્તરે સુરક્ષાને લઈને ચિંતા વધી ગઈ હતી.
નિવેદન બાદ ઊભા થયેલા વિવાદને પગલે પંજાબ સરકારે તાત્કાલિક સ્પષ્ટતા જારી કરવી પડી હતી. સરકારે જણાવ્યું કે કમિશનરે આરોપીઓનો પ્રદર્શનકારીઓ સાથે કોઈ સીધો સંબંધ હોવાનો દાવો નહોતો કર્યો. વિડીયો ક્લિપનું ખોટું એડિટિંગ કરીને ગેરમાર્ગે દોરતી માહિતી ફેલાવવામાં આવી હોવાનું સરકારે ઉમેર્યું હતું.
આ વિવાદના ગણતરીના દિવસોમાં જ પંજાબ સરકારે ગુરપ્રીત સિંઘ ભુલ્લરની અમૃતસર પોલીસ કમિશનર પદેથી બદલી કરી દીધી. સરકારે આ બદલી પાછળ કોઈ સત્તાવાર કારણ આપ્યું નથી, પરંતુ ઘટનાક્રમને જોતાં આ વિવાદના કારણે જ પગલું ભરાયું હોવાની અટકળો વહેતી થઈ છે.
આ બદલીના કારણે રાજકીય આરોપ-પ્રત્યારોપો પણ શરૂ થઈ ગયા છે. વિપક્ષી નેતાઓ લાંબા સમયથી ભુલ્લર પર શાસક આમ આદમી પાર્ટીની નજીક હોવાનો અને સરકારના હાથ-પગ બનીને કામ કરવાનો આરોપ લગાવતા રહ્યા છે.
પૂર્વ કેન્દ્રીય મંત્રી રવનીત સિંઘ બિટ્ટુએ પણ આ ઘટનાને લઈને સવાલો ઉઠાવ્યા છે. તેમણે આશંકા વ્યક્ત કરી હતી કે શું જંતર-મંતર ષડયંત્ર અંગે ભુલ્લરે કરેલા સાચા ખુલાસાથી કેજરીવાલ અને સરકાર અસ્વસ્થ થઈ ગઈ હતી? હાલ પંજાબ સરકારના મૌન વચ્ચે આ બદલી ચર્ચાનો વિષય બનેલી છે.
