રવિવારે (10 નવેમ્બર 2024) છત્તીસગઢના રાયગઢમાં કથિત રીતે બળજબરીથી ખ્રિસ્તી ધર્માંતરણની ઘટના સામે આવ્યા બાદ હોબાળો થઈ ગયો હતો. મીડિયા રિપોર્ટ્સ અનુસાર, વિશ્વ હિંદુ પરિષદ સહિતના હિંદુ સંગઠનોના સભ્યો એક ઘરની બહાર એકઠા થયા હતા, જ્યાં સામૂહિક પ્રેયરના નામે કથિત ધર્માંતરણ થઈ રહ્યું હતું. સંગઠનોએ આ મામલે સંડોવાયેલા લોકોનો વિરોધ કરીને તેમની સામે સૂત્રોચ્ચાર કર્યા હતા. ઘટનાને લઈને પોલીસને પણ બોલાવી લેવામાં આવી હતી.
નોંધનીય છે કે, જે ઘરમાં આ પ્રકાની ગતિવિધિ થતી હોવાના હોવાના આરોપો લાગ્યા છે, તે ત્રણ માળની ઇમારતમાંથી મહિલાઓ અને બાળકોને સુરક્ષિત રીતે બહાર કાઢવામાં આવ્યા હતા. પોલીસે આ મામલે બે લોકોની ધરપકડ પણ કરી છે, જેમની ઓળખ શાઉલ નાગા અને ઇન્દ્રજીત ખરે તરીકે સામે આવી છે. આ કેસમાં અન્ય દસ લોકોને બળજબરીથી ધર્માંતરણ કરાવવાના રેકેટમાં સંડોવણી બદલ પૂછપરછ માટે અટકાયતમાં લેવામાં આવ્યા હતા.
ધર્માંતરણ કરાવવા લાલચ અપાતી હોવાના આરોપ
ઉલ્લેખનીય છે કે, સ્થાનિક હિંદુ સંગઠનોના કાર્યકરોએ આ કાર્યક્રમના આયોજકો પર આરોપ લગાવ્યો હતો કે, તેઓ આર્થિક લાલચ અને સ્વાસ્થ્ય લાભના વાયદાઓ કરીને હિંદુ પુરુષો અને મહિલાઓને ખ્રિસ્તી ધર્મ અંગીકાર કરાવી રહ્યા છે. આ કાર્યક્રમમાં મહિલાઓ અને બાળકો સહિત 100થી વધુ લોકો હાજર રહ્યા હતા. હિંદુ સંગઠનો દ્વારા ‘પ્રાર્થના સભા’ રોકવા માટે પોલીસને બોલાવવામાં આવી હતી. કાયદો અને વ્યવસ્થા જાળવવા માટે ઇન્ચાર્જ સીએસપી અને એસડીએમ 30 જેટલા પોલીસ કર્મચારીઓ સાથે ઘટનાસ્થળે પહોંચ્યા હતા.
પોલીસે કાર્યવાહી અને તપાસ શરૂ કરી
પોલીસે આવીને તરત જ બિલ્ડિંગમાં આયોજિત કાર્યક્રમમાં હાજર તમામ મહિલાઓ અને બાળકોને બહાર કાઢ્યા હતા. ઇન્ચાર્જ સીએસપી અખિલેશ કૌશિકે મીડિયાને આપેલા એક નિવેદનમાં જણાવ્યું હતું કે, પોલીસને અગાઉ પણ આ પ્રકારની ફરિયાદો મળી હતી. આ મામલાની તપાસ ચાલી રહી છે અને અનેક વ્યક્તિઓને પૂછપરછ માટે પોલીસ સ્ટેશન લઈ જવામાં આવ્યા છે.
પહેલાં પણ નોંધાઈ ચૂકી છે આ પ્રકારની ફરિયાદો
નોંધવું જોઈએ કે, રાયગઢ પોલીસ સ્ટેશનમાં છેલ્લા 15 દિવસથી બળજબરીથી ધર્માંતરણ થતું હોવાની ફરિયાદો મળી રહી હતી. તેવામાં જુટમિલ પોલીસ સ્ટેશન વિસ્તારમાં તાજેતરની ઘટનાએ સ્થાનિક હિંદુઓના આક્રોશને વધુ તીવ્ર બનાવ્યો હતો. સ્થાનિક હિંદુ રહેવાસીઓએ જણાવ્યું છે કે, અઠવાડિયામાં ચાર વખત ખ્રિસ્તી મિશનરીઓ દ્વારા નિયમિત પ્રાર્થના સભાઓ યોજવામાં આવે છે અને દૂર-દૂરથી લોકો તેમાં ભાગ લેવા આવી રહ્યા છે. વારંવાર ફરિયાદો કરવા છતાં પોલીસની કથિત નિષ્ક્રિયતા અંગે સ્થાનિકોએ હતાશા વ્યક્ત કરી હતી.
બળજબરીથી ધર્માંતરણ માટે છે કડક જોગવાઈઓ
ઉલ્લેખનીય છે કે, છત્તીસગઢ ધાર્મિક સ્વતંત્રતા અધિનિયમ 1968 હેઠળ બળજબરીથી કે કપટથી કોઇનું ધર્માંતરણ કરાવવું, અથવા પ્રલોભન દ્વારા કરાવવું પણ ફોજદારી ગુનો બને છે, જેમાં એક વર્ષ સુધીની જેલ, ₹5,000 સુધીનો દંડ અથવા બંનેની સજા થઈ શકે છે. સગીર, સ્ત્રીઓ અથવા અનુસૂચિત જાતિ કે જનજાતિના લોકોને લાલચ આપવામાં આવે તેવા કિસ્સાઓમાં સજા બમણી થઈને બે વર્ષની કેદની સજા અને ₹10,000નો દંડ થાય તેવી જોગવાઈ છે. ભારતીય ન્યાય સંહિતા, 2023ની કલમ 298થી 302, ધાર્મિક ભાવનાઓને અસર કરતા ગુનાઓની રૂપરેખા તૈયાર કરે છે. બળજબથી ધર્માંતરણ એ બિન-જામીનપાત્ર અને બિન-કમ્પાઉન્ડેબલ ગુનો છે, જેમાં કડક દંડ કરવામાં આવે છે.
