અદાણી ગ્રુપે (Adani Group) મધ્યપ્રદેશ ગ્લોબલ ઇન્વેસ્ટર્સ સમિટ (Madhya Pradesh Global Investors Summit) 2025માં મોટા રોકાણની જાહેરાત કરી છે. અદાણી ગ્રુપ મધ્યપ્રદેશમાં પંપ સ્ટોરેજ, સિમેન્ટ, ખાણકામ, સ્માર્ટ મીટર અને થર્મલ એનર્જીમાં ₹2 લાખ 10 હજાર કરોડનું જંગી રોકાણ કરશે.
આ રોકાણ હેઠળ, જૂથ રાજ્ય સરકાર સાથે ગ્રીનફિલ્ડ સ્માર્ટ સિટી પ્રોજેક્ટ, એરપોર્ટ પ્રોજેક્ટ અને ₹1 લાખ કરોડના કોલસા ગેસિફિકેશન પ્રોજેક્ટ પર ચર્ચા કરી રહ્યું છે. અદાણી ગ્રુપના આ રોકાણથી મોટા પાયે રોજગારી મળશે, કનેક્ટિવિટી વધશે, મધ્યપ્રદેશ એક મુખ્ય આર્થિક કેન્દ્ર તરીકે સ્થાપિત થશે. જેના કારણે 2030 સુધીમાં 1 લાખ 20 હજારથી વધુ નોકરીઓનું સર્જન થશે.
Adani Commits Over Rs 2 Lakh Crore to Madhya Pradesh at Global Investment Summit #Adani #GautamAdani #InvestInMP #globalinvestorssummit2025 #IndianWitnesshttps://t.co/gR3SuLIamJ
— The Indian Witness (@IndianWitness) February 24, 2025
ભોપાલમાં મધ્યપ્રદેશ ગ્લોબલ ઇન્વેસ્ટર્સ સમિટ 2025ને સંબોધતા, અદાણી ગ્રુપના ચેરમેન ગૌતમ અદાણીએ રાજ્ય પ્રત્યે ગ્રુપની પ્રતિબદ્ધતાનો પુનરોચ્ચાર કર્યો. તેમણે કહ્યું કે પ્રધાનમંત્રી નરેન્દ્ર મોદી અને મુખ્યમંત્રી ડૉ. મોહન યાદવના નેતૃત્વમાં, મધ્યપ્રદેશ ભારતમાં સૌથી વધુ રોકાણ માટે તૈયાર રાજ્યોમાંનું એક બની ગયું છે. ગૌતમ અદાણીએ કહ્યું, “આ ફક્ત રોકાણ નથી. આ એક એવી યાત્રાની શરૂઆત છે જે મધ્યપ્રદેશને ઔદ્યોગિક અને આર્થિક વિકાસમાં મોખરે રાખશે. માનનીય પ્રધાનમંત્રી અને રાજ્યના મુખ્યમંત્રીના નેતૃત્વ હેઠળ આ રાજ્યના અસાધારણ ઉત્થાન માટે અમે અમારી પ્રતિબદ્ધતાનો પુનરોચ્ચાર કરીએ છીએ.”
અદાણી ગ્રુપે મધ્યપ્રદેશમાં ઊર્જા, માળખાગત સુવિધા અને ઉત્પાદન, લોજિસ્ટિક્સ અને કૃષિ-વ્યવસાયમાં ₹50 હજાર કરોડથી વધુનું રોકાણ કર્યું છે, જેનાથી 25 હજારથી વધુ નોકરીઓનું સર્જન થયું છે. આ નવા રોકાણો ભારતની આત્મનિર્ભરતા અને નવીનતા સાથે રાજ્યના ઔદ્યોગિક ઇકોસિસ્ટમને વધુ મજબૂત બનાવશે.
આ મહિનાની શરૂઆતમાં, તેમના પુત્ર જીતના લગ્ન પ્રસંગે, ગૌતમ અદાણીએ સામાજિક કાર્ય માટે ₹10 હજાર કરોડનું દાન આપવાની જાહેરાત કરી હતી. આ રકમનો ઉપયોગ શિક્ષણ, આરોગ્યસંભાળ અને કૌશલ્ય વિકાસ ક્ષેત્રોમાં વંચિતો માટે સસ્તું અને સુલભ વિશ્વ-સ્તરીય માળખાગત સુવિધા બનાવવા પર ધ્યાન કેન્દ્રિત કરવા માટે કરવામાં આવશે.
