તાજેતરમાં જ હરિયાણા વિધાનસભા ચૂંટણીમાં (Haryana Assembly Elections) હરિયાણાના જીંદ જિલ્લાની જુલાના (Julana) વિધાનસભાના ધારાસભ્ય (MLA) બનેલ કુસ્તીબાજ વિનેશ ફોગાટ (Wrestler Vinesh Phogat) ગુમ થયા છે એવા પોસ્ટરના ફોટોસ સોશિયલ મીડિયા પર ફરી રહ્યા છે. વ્હોટ્સએપ ગ્રુપ્સમાં આ પોસ્ટર શેર થવાના શરૂ થયા હતા જે હવે સોશિયલ મીડિયા પર વાયરલ થઇ રહ્યા છે. જેમાં વિધાનસભા સત્રોમાં ધારાસભ્યની ગેરહાજરીને કારણ તરીકે વર્ણવવામાં આવ્યું છે.
ઉલ્લેખનીય છે કે હરિયાણા વિધાનસભાનું શિયાળુ સત્ર 19 નવેમ્બર સુધી ચાલ્યું હતું. આ દરમિયાન પ્રથમ વખત ધારાસભ્ય તરીકે ચૂંટાયેલ વિનેશ ફોગાટ સત્ર દરમિયાન ગેરહાજર રહ્યા હતા. જોકે આ જ દરમિયાન તેઓ વાયનાડમાં પ્રિયંકા ગાંધીના ચૂંટણી પ્રચારમાં જોવા મળી રહ્યા હતા, તથા મહારાષ્ટ્રની ચૂંટણી દરમિયાન પ્રચારમાં પણ હાજરી આપી રહ્યા હતા.
ત્યારે મહારાષ્ટ્ર વિધાનસભાની ચૂંટણી પૂર્ણ થયા બાદ 20 નવેમ્બરથી આ પોસ્ટરો લાગવાની શરૂઆત થઇ હતી. જે વ્હોટ્સએપ ગ્રુપ્સ ચેટમાં પણ વાયરલ થઇ રહ્યા હતા. પોસ્ટરમાં મોટા અક્ષરોમાં હેડીંગ મારેલું છે કે ‘લાપતા વિધાયક કી તલાશ’.
ઉપરાંત પોસ્ટરમાં એવો પણ ઉલ્લેખ કરવામાં આવ્યો હતો કે, “આખું વિધાનસભા સત્ર પૂરું થઈ ગયું છે પરંતુ ધારાસભ્ય મેડમ આ સંપૂર્ણ સમય દરમિયાન ગાયબ રહ્યા. જો તે કોઈને દેખાય, તો કૃપા કરીને જુલાનાના રહેવાસીઓને જાણ કરો.”
हरियाणा के जींद जिला की जुलाना विधानसभा से विधायक और इंटरनेशनल रेसलर विनेश फोगाट के गुमशुदगी का पोस्टर सोशल मीडिया पर वायरल हो रहा है। वायरल पोस्टर में लिखा है कि लापता विधायक की तलाश। #VineshPhogat pic.twitter.com/a3iF0thq5E
— ताई रामकली (@haryanvitai) November 20, 2024
ઉલ્લેખનીય છે કે આ પોસ્ટર કોણે લગાવ્યા તે અંગે હજી કોઈ જાણકારી મળી નથી. જોકે એવું માનવામાં આવી રહ્યું છે કે વિપક્ષ દ્વારા આ પોસ્ટર લગાવવામાં આવ્યા હોઈ શકે કારણ કે જે જનતાના વોટથી વિનેશ ધારાસભ્ય બન્યા છે તે જનતાનો પક્ષ મુકવા તે વિધાનસભાના સંપૂર્ણ સત્ર દરમિયાન ગેરહાજર રહ્યા હતા.
પેરિસ ઓલિમ્પિક્સમાં બહાર થયા તો ખાપ પંચાયતે આપ્યો હતો ‘ગોલ્ડ મેડલ’
નોંધનીય છે કે વિનેશ ફોગાટ ઓગસ્ટ 2024માં પેરિસ ખાતે યોજાયેલી ઓલમ્પિક ગેમ્સમાં (Paris Olympics) 50 કિલોની વુમેન કેટેગરીમાં ગેરલાયક ઠર્યા હતા. જેથી ઓલમ્પિક ગેમ્સમાંથી બહાર થઇ ગયા હતા. જોકે ભારત આવ્યા પછી તેમને ખાપ પંચાયત તરફથી આશ્વાસન સ્વરૂપે ‘ગોલ્ડ મેડલ’ આપવામાં આવ્યો હતો. પોતે ગેરલાયક ઠર્યા બાદ આ મુદ્દાનું રાજનીતિકરણ કરીને તેઓ કોંગ્રેસમાં જોડાયા હતા.
ત્યારપછી કોંગ્રેસે 2024 હરિયાણા વિધાનસભા ચૂંટણીમાં તેમને જુલાનાની ટિકિટ આપી હતી. લોકોની સહાનુભૂતિ પ્રાપ્ત કરીને વિનેશે ફોગાટે આ ચૂંટણીમાં જીત મેળવી હતી. તેઓ વર્તમાનમાં જુલાના વિધાનસભા સીટ પરથી ધારાસભ્ય છે.
