અભિનેતા નવાઝુદ્દીન સિદ્દીકીએ પોતાના ભાઈ અને પૂર્વ પત્નીના આક્ષેપોથી કંટાળીને આખરે તેમની સામે માનહાનિનો કેસ કર્યો છે. અભિનેતાએ ભાઈ શમ્સુદ્દીન અને પૂર્વ પત્ની અંજના પાંડેય પાસેથી 100 કરોડ રૂપિયાના વળતરની માંગણી કરી છે.
નવાઝુદ્દીનના વકીલ સુનીલ કુમારે જસ્ટિસ રિયાઝ છાગલાની બેંચ સમક્ષ માનહાનિનો કેસ દાખલ કર્યો હતો. આ મામલે 30 માર્ચે સુનાવણી થવાની છે. નવાઝુદ્દીને અરજીમાં જણાવ્યું છે કે તેના ભાઈ અને પૂર્વ પત્ની પર કાયમી ધોરણે રોક લગાવવામાં આવે જેથી તેઓ હવે એવું કોઈ નિવેદન ન આપે જેનાથી તેની પ્રતિષ્ઠા ખરડાય. આ ઉપરાંત, નવાઝે એવી અરજી પણ કરી છે કે તેનો ભાઈ અને પૂર્વ પત્ની તેના વિશે કોઈપણ પ્રકારનું બદનામીભર્યું કન્ટેન્ટ સોશિયલ મીડિયા પર શેર ન કરે અને અત્યારસુધી આ પ્લેટફોર્મ પર જેટલા આરોપો મૂકવામાં આવ્યા છે તેને પાછા લેવામાં આવે.
નવાઝુદ્દીન સિદ્દીકીએ પોતાને બદનામ કરવા બદલ ભાઈ અને પૂર્વ પત્ની તરફથી લેખિત જાહેર માફીની પણ માંગ કરી છે. સિદ્દીકીએ કોર્ટને અપીલ કરી છે કે, તેના ભાઈ અને પૂર્વ પત્નીએ જે લોકોને તેના વિશે ખોટી અને દ્વેષપૂર્ણ માહિતી પહોંચાડી છે તેમના અંગે સંપૂર્ણ ખુલાસો માંગવામાં આવે.
જાણો આખો મામલો શું છે?
અરજીમાં કહેવામાં આવ્યું છે કે, 2008માં જ્યારે નવાઝના ભાઈ શમ્સુદ્દીને કહ્યું કે તે બેરોજગાર છે, ત્યારે અભિનેતાએ તેને પોતાનો મેનેજર બનાવ્યો હતો. નવાઝુદ્દીને ઇનકમ ટેક્સ રિટર્ન, ઓડિટિંગ, જીએસટી ફાઈલિંગ જેવા કામો શમ્સુદ્દીનને સોંપ્યા હતા. પોતે ફિલ્મો પર ધ્યાન આપી શકે એટલે તેણે ક્રેડિટ કાર્ડ્સ, ડેબિટ કાર્ડ્સ, સાઈન કરેલી ચેકબુક, બેંક પાસવર્ડ, ઈમેલ એડ્રેસ વગેરે પોતાના ભાઈને આપ્યા હતા.
નવાઝુદ્દીને આરોપ મૂક્યો કે આ દરમિયાન તેનો ભાઈ છેતરપિંડી કરવા લાગ્યો હતો. ફિલ્મોમાં વ્યસ્ત હોવાને કારણે નવાઝ પાસે પોતાના ટ્રાન્ઝેક્શનને લઈને બેંક સાથે કોર્ડિનેટ કરવાનો સમય ન હતો. એક વખત શમ્સુદ્દીને કહ્યું કે તે નવાઝના નામ પર પ્રોપર્ટી ખરીદી રહ્યો છે. જ્યારે વાસ્તવમાં તેણે જોઇન્ટ નામે પ્રોપર્ટી ખરીદી હતી. આ પ્રોપર્ટીઝમાં યારી રોડ પર એક ફ્લેટ, એક સેમી કમર્શિયલ પ્રોપર્ટી, બુઢાનાના શાહપુરમાં એક ફાર્મહાઉસ, દુબઈમાં એક પ્રોપર્ટી, રેન્જ રોવર, બીએમડબલ્યુ સહિતની ગાડીઓ સામેલ છે.
નવાઝુદ્દીને કહ્યું કે, જ્યારે મેં આ અંગે પોતાના ભાઈ શમ્સુદ્દીનને સવાલ પૂછ્યા, તો તેણે મારી એકસ વાઈફને ઉશ્કેરવાનું શરુ કર્યું. મારા પર ખોટા અને બહુ ગંદા આરોપો લગાવવા માટે શમ્સુદ્દીને જ અંજનાને ઉશ્કેરી હતી.
સિદ્દીકીએ અરજીમાં એવું પણ કહ્યું કે અંજના પહેલાંથી જ પરિણીત હતી, પણ તેણે પોતાને અપરિણીત કહીને મને દગો આપ્યો. નવાઝુદ્દીને પોતાના ભાઈ અને પૂર્વ પત્ની પર 21 કરોડ રૂપિયાના ગોટાળાનો આરોપ પણ લગાવ્યો છે.
સોશિયલ મીડિયા પોસ્ટ દ્વારા પોતાના પર લાગેલા આરોપો પર નિવેદન આપ્યું
બોલિવૂડ અભિનેતા નવાઝુદ્દીન સિદ્દીકીની છૂટા પડી ગયેલી પત્ની આલિયાએ તાજેતરમાં જ દાવો કર્યો હતો કે તેણે તેને અને તેમના બે બાળકોને તેના ઘરની બહાર કાઢી મૂક્યા હતા. તેના આઘાતજનક દાવાઓના દિવસો પછી, નવાઝે તેની સાથેની કાનૂની લડાઈ વચ્ચે પોતાનું મૌન તોડ્યું. સોમવારે, તેમણે આરોપોને સંબોધતા એક લાંબું નિવેદન શેર કર્યું હતું. તેમણે કહ્યું કે તે તેના પર માત્ર એ માટે પ્રતિક્રિયા આપી રહ્યો છે કારણ કે દરેક તેને ‘ખરાબ વ્યક્તિ’ તરીકે ઓળખાવી રહ્યા છે.
This is not an allegation but expressing my emotions. pic.twitter.com/6ZdQXMLibv
— Nawazuddin Siddiqui (@Nawazuddin_S) March 6, 2023
જાણીતા અભિનેતાએ કહ્યું કે તેણે તેની છૂટી ગયેલી પત્ની સાથેની લડાઈ વચ્ચે ગૌરવપૂર્ણ મૌન જાળવી રાખ્યું કારણ કે આ તમામ તમાશા ક્યાંક તેમના નાના બાળકો વાંચશે. તેમણે કહ્યું કે “એકતરફી અને હેરાફેરીવાળા વીડિયો”ના આધારે તેનું ચારિત્ર્યહનન કરવામાં આવી રહ્યું છે.” તેમણે આગળ ઘણા મુદ્દાઓ દ્વારા પોતાની વાત મૂકી હતી.
