ભારતમાં હજુ ચૂંટણીઓ પણ થઈ નથી અને વડાપ્રધાન નરેન્દ્ર મોદીને વિદેશમાંથી ચૂંટણી પછીના આમંત્રણ મળવા લાગ્યા છે. રશિયાના રાષ્ટ્રપતિ વ્લાદિમીર પુતિન સાથે વાત કર્યાના કલાકો બાદ પીએમ મોદીએ યુક્રેનના રાષ્ટ્રપતિ વોલોદિમીર ઝેલેન્સકી સાથે ફોન પર વાત કરી હતી. નોંધનીય છે કે રશિયા અને યુક્રેન વચ્ચે છેલ્લા 2 વર્ષથી યુદ્ધ ચાલી રહ્યું છે અને હાલમાં જ પુતિને ચેતવણી આપી હતી કે જો નાટો યુક્રેનમાં પ્રવેશ કરશે તો ત્રીજા વિશ્વ યુદ્ધને થતા કોઈ રોકી શકશે નહીં. આ તણાવ વચ્ચે પીએમ મોદીએ બંને નેતાઓ સાથે વાત કરી હતી.
એવું કહેવામાં આવી રહ્યું છે કે પુતિન અને ઝેલેન્સકી બંનેએ પીએમ મોદીને ચૂંટણી પછી પોતપોતાના દેશોની મુલાકાત લેવાનું આમંત્રણ આપ્યું છે. બંનેએ એમ પણ કહ્યું છે કે તેઓ ભારતને એક એવા દેશ તરીકે જુએ છે જે સમાધાન દ્વારા શાંતિ સ્થાપિત કરે છે. વડાપ્રધાન નરેન્દ્ર મોદી અગાઉ 2019માં રશિયા ગયા હતા. પીએમ મોદીને આમંત્રણ મળવું એ પણ દર્શાવે છે કે અન્ય દેશો પણ માની રહ્યા છે કે સતત ત્રીજી વખત વડા પ્રધાન તરીકે તેમની વાપસી નિશ્ચિત છે અને જનાદેશ તેમના પક્ષમાં જશે.
Indian PM Modi speaks to Russia's President Putin and Ukrainian President Zelensky
— WION (@WIONews) March 21, 2024
Will India be the peacemaker in #RussiaUkraineWar?@SehgalRahesha brings you this report
Watch more: https://t.co/dm7SyC01cG pic.twitter.com/1lNYozRcji
પીએમ મોદીએ રશિયા અને યુક્રેન વચ્ચેના લોકો-થી-લોકોના સંબંધોને મજબૂત કરવા તેમજ રશિયા સાથે યુક્રેનના તણાવને સમાપ્ત કરવા વિશે વોલોડિમિર ઝેલેન્સકી સાથે પણ વાત કરી. તેમણે કહ્યું કે વાતચીત અને કૂટનીતિ દ્વારા જ યુદ્ધનો અંત લાવી શકાય છે. PM મોદી જાપાનના હિરોશિમામાં મે 2023માં G7 સમિટ દરમિયાન ઝેલેન્સકીને પણ મળ્યા હતા. ભારતે યુક્રેનને માનવતાવાદી સહાય પણ મોકલી હતી, જેના માટે ઝેલેસીએ તેમની તાજેતરની વાતચીત દરમિયાન પીએમ મોદીનો આભાર માન્યો હતો.
આ પહેલા પુતિન રશિયાના રાષ્ટ્રપતિ તરીકે ફરીથી ચૂંટાયા પર પીએમ મોદીએ તેમને ફોન કરીને અભિનંદન પાઠવ્યા હતા. આ દરમિયાન બંને ભારત અને રશિયા વચ્ચેના વ્યૂહાત્મક સંબંધોને વધુ ગાઢ બનાવવા માટે સંમત થયા હતા. પુતિન 87.17% મતો સાથે ફરીથી રશિયાના રાષ્ટ્રપતિ તરીકે ચૂંટાયા છે. આ પહેલા તેઓ 2000, 2004, 2012 અને 2018માં રાષ્ટ્રપતિની ચૂંટણી જીત્યા હતા. પશ્ચિમી દેશોએ આ ચૂંટણીને અલોકતાંત્રિક ગણાવી છે. યુક્રેને યુએસ કોંગ્રેસને $60 બિલિયન પેકેજને અનબ્લોક કરવા કહ્યું છે, જે રાજકીય આંતરકલહમાં અટવાયેલું છે.
