કેરળમાં શાળાઓમાં છોકરા-છોકરીઓને સાથે બેસાડવા સબંધિત પ્રસ્તાવને લઈને વિવાદ શરૂ થઇ ગયો છે. મુસ્લિમ લીગ મહાસચિવ પીએમએ સલામે શાળામાં છોકરીઓ અને છોકરાઓને સાથે બેસાડવા સબંધિત પ્રસ્તાવને ખતરનાક ગણાવ્યો છે. એટલું જ નહીં, પરંતુ તેમણે સરકાર પાસે આ ‘જેન્ડર ન્યૂટ્રલ પોલિસી’ મામલેનો આ પ્રસ્તાવ પરત ખેંચવાની પણ માંગ કરી છે.
મુસ્લિમ લીગના નેતાએ કહ્યું, “સરકાર વિદ્યાર્થીઓ પર લિંગ સમાનતા થોપવાના પ્રયત્નો કરી રહી છે. લૈંગિક સમાનતા વિદ્યાર્થીઓને ગેરમાર્ગે દોરશે. અમે સરકારને અપીલ કરીશું કે તેઓ તેને પરત ખેંચી લે.
તેમણે એમ પણ પ્રશ્ન કર્યો હતો કે છોકરા-છોકરીઓને વર્ગમાં એકસાથે બેસાડવાની શું જરૂર છે? શા માટે તેમને મજબુર કરવામાં આવી રહ્યા છે કે એવા પ્રસંગો પેદા કરવામાં આવી રહ્યા છે? આ મુદ્દો માત્ર સમસ્યા સર્જશે. તેમણે દાવો કર્યો હતો કે સાથે બેસાડવાથી બાળકો અભ્યાસ પરથી વિચલિત થશે.
કેરળમાં મુસ્લિમ લીગ સહિતનાં સંગઠનોએ કેરળની રાજ્ય સરકાર સમક્ષ શિક્ષણ સંસ્થાઓમાં ‘જેન્ડર ન્યૂટ્રલ પોલિસી’ સબંધિત પ્રસ્તાવને પરત ખેંચવાની માંગ કરી હતી. આ પહેલાં સોમવારે કેરળના કોઝીકોડમાં મુસ્લિમ સંગઠનોની એક બેઠક બાદ સૈયદ રશીદ અલી શિહાબે પત્રકારોને કહ્યું હતું કે, આ અત્યંત વાંધાજનક છે. સરકાર શિક્ષણ સંસ્થાઓમાં પોતાની વિચારધારા લાગુ કરવાના પ્રયત્નો કરી રહી છે.
કેરળમાં મુસ્લિમ સંગઠનો કાયમ સરકાર પર શૈક્ષણિક સંસ્થાઓમાં લૈંગિક સમાનતા ‘થોપવાનો’ આક્ષેપ લગાવતા રહ્યા છે અને સરકારને તેનાથી દૂર રહેવાનું કહેતા આવ્યા છે. સંગઠનોએ રાજ્યની ડાબેરી સરકાર પર શૈક્ષણિક સંસ્થાઓમાં તેની ઉદારવાદી નીતિ અપનાવવાનો આરોપ લગાવ્યો હતો.
વર્ષ 2020માં કેરળના કોઝીકોડની એક હાઇસ્કુલમાં પહેલીવાર સમાન યુનિફોર્મ લાગુ કરવામાં આવ્યા હતા. જેમાં મુસ્લિમ વિદ્યાર્થીનીઓ માટે આખી બાંયનો વિકલ્પ આપવામાં આવ્યો હતો. ત્યારથી જ રાજ્યમાં મુસ્લિમ સંગઠનો આ બાબતનો વિરોધ કરી રહ્યા છે અને વિજયન સરકાર પર શાળાના વિદ્યાર્થીઓ પર મોર્ડન ડ્રેસકોડ થોપવાનો આક્ષેપ કરતા રહ્યા છે.
ગત વર્ષે ડિસેમ્બર મહિનામાં કોઝિકોડમાં એક મુસ્લિમ સંગઠન દ્વારા વિરોધ પ્રદર્શનનું પણ આયોજન કરવામાં આવ્યું હતું અને સમાન યુનિફોર્મ લાગુ કરવાના નિર્ણયનો વિરોધ કર્યો હતો.
મુસ્લિમ સંગઠનોના વિરોધ વચ્ચે કેરળના શિક્ષણમંત્રી વી શિવનકુટ્ટીએ જણાવ્યું હતું કે રાજ્ય સરકારનો જેન્ડર ન્યૂટ્રલ યુનિફોર્મ લાવવાનો કોઈ વિચાર નથી. તેમણે કહ્યું હતું કે, કેટલીક શાળાઓએ આવા યુનિફોર્મ લાગુ કર્યા છે. શાળા અને સમાજમાંથી પણ તેને આવકાર મળ્યો છે. પરંતુ સરકારની આવી કોઈ યોજના નથી. સરકાર યુનિફોર્મ જેવી બાબતો થોપવા માંગતી નથી. આ બાબત શાળાઓ અને સંચાલક સંસ્થાઓ પર આધાર રાખે છે.
