રાજ કુન્દ્રા પોર્ન કેસ બાદ બોલિવૂડ અભિનેત્રી શિલ્પા શેટ્ટીના પતિ અને બિઝનેસમેન રાજ કુન્દ્રાની મુશ્કેલીઓ ફરી એકવાર વધી શકે છે. ઈન્ડિયા ટુડેના અહેવાલ મુજબ એન્ફોર્સમેન્ટ ડિરેક્ટોરેટ (ED) એ પોર્ન રેકેટ કેસમાં રાજ કુન્દ્રા વિરુદ્ધ કેસ નોંધ્યો છે, મળતી માહિતી મુજબ કુન્દ્રા વિરુદ્ધ ફોરેન એક્સચેન્જ મેનેજમેન્ટ એક્ટ (FEMA) હેઠળ કેસ નોંધવામાં આવ્યો છે. આમ રાજ કુન્દ્રા પોર્ન કેસમાં નવો વળાંક આવ્યો છે.
ગત વર્ષે આ મામલો પ્રકાશમાં આવ્યો હતો. આ કેસમાં મુંબઈ પોલીસે 20 જુલાઈ 2021ના રોજ રાજ કુન્દ્રાની ધરપકડ કરી હતી. તેના પર પોર્ન ફિલ્મો બનાવવાનો આરોપ હતો. ભારતમાં અંગત જગ્યા પર પોર્નોગ્રાફી જોવા પર પ્રતિબંધ નથી, પરંતુ પોર્ન ફિલ્મો બનાવવા બદલ પોર્નોગ્રાફી કાયદા હેઠળ રાજ કુન્દ્રાની ધરપકડ કરવામાં આવી હતી. જેમાં પોર્ન ફિલ્મો બનાવવી, બતાવવી, તેનું વિતરણ કરવું અને પ્રકાશિત કરવું તે કાયદાકીય રીતે ગુનો માનવામાં આવે છે. રાજ કુન્દ્રાની ધરપકડ કરતા પહેલા મુંબઈ પોલીસે ફેબ્રુઆરીમાં આ કેસમાં 5 લોકોની ધરપકડ કરી હતી. આરોપ છે કે આ બધા પોર્ન ફિલ્મો બનાવતા હતા અને ફિલ્મો અને વેબ સિરીઝમાં કામ આપવાની લાલચ આપીને લોકોને છેતરતા હતા.
કુન્દ્રા માટે પોર્ન ઉજ્વળ ભવિષ્ય
મુંબઈ પોલીસે ગયા વર્ષે ખુલાસો કર્યો હતો કે, કુન્દ્રા આ રેકેટ ખૂબ જ આયોજનબદ્ધ રીતે ચલાવી રહ્યા હતો. તેમાં નફો મેળવવા માટે તેની પાસે સુનિયોજિત વ્યૂહરચના પણ હતી. પ્રાપ્ત પુરાવાઓ પરથી એવું બહાર આવ્યું હતું કે રાજ કુન્દ્રા જાતીય કૃત્યોના લાઇવ સ્ટ્રીમિંગને શ્રેષ્ઠ વિકલ્પ માની રહ્યો હતો. તેનો પ્લાન હતો કે તે આ બિઝનેસને બોલિવૂડ જેટલો જ મોટો બનાવશે.
હોટશોટ્સ મારફતે સ્ટ્રીમિંગ
મુંબઈ ક્રાઈમ બ્રાન્ચે રાજ કુન્દ્રાને ‘હોટશોટ’ એપ દ્વારા અશ્લીલ વીડિયો બનાવવા અને પ્રકાશિત કરવા માટે “મુખ્ય કાવતરાખોર” તરીકે નામ આપ્યું હતું. પોલીસના જણાવ્યા અનુસાર કુન્દ્રા ‘હોટશોટ્સ’ એપ દ્વારા પોર્ન વીડિયોના સ્ટ્રીમિંગમાં સામેલ હતો. તેણે વર્ષ 2019માં તેની એપ ‘હોટશોટ્સ’ 25,000 ડૉલર (રૂ. 18,65,410)માં વેચી. જો કે, આ માત્ર તપાસને ગેરમાર્ગે દોરવા માટે હતું, કારણ કે એપ વેચ્યા પછી પણ તે મુંબઈથી તેનું નિયંત્રણ કરતો હતો. કુન્દ્રા પોર્ન વીડિયો માટે કન્ટેન્ટ આપતો હતો. તેણે તેની વિયાન ઈન્ડસ્ટ્રીઝ ઓફિસમાંથી યુકેની ફર્મનું નિયંત્રણ કરતો હતો.
વિદેશમાં નોંધાયેલછે હોટશોટ એપ
વાસ્તવમાં રાજ કુન્દ્રાએ ભારતમાં જ પોર્ન વીડિયો બનાવ્યા હતા, પરંતુ જે એપ્લીકેશન પર તેનું પ્રસારણ થતું હતું તે હોટશોટ્સ એપ કેનરીન નામની કંપની દ્વારા બનાવવામાં આવી હતી, જે વિદેશમાં રજીસ્ટર્ડ હતી. એટલે કે રાજ કુન્દ્રાની ફર્મ (વિઆન)નો યુકે સ્થિત ફર્મ કેનરીન સાથે કરાર હતો. ભારતના સાયબર પોર્નોગ્રાફી કાયદાઓથી બચવા માટે આ કંપની વિદેશમાં રજીસ્ટર કરવામાં આવી હતી અને ભારતમાં શૂટ કરાયેલી પોર્ન મૂવીઝ ‘WeTransfer’ નામના ડિજિટલ પ્લેટફોર્મ દ્વારા કેનરીનને મોકલવામાં આવી હતી.
સૌથી મોટી સાઇઝની ફાઇલો (વીડિયો, ઇમેજ વગેરે) સરળતાથી ‘WeTransfer’ દ્વારા ટ્રાન્સફર કરી શકાય છે. જો કે હોટશૉટ્સ એપ ન તો ગૂગલ પ્લે સ્ટોર પર ઉપલબ્ધ હતી અને ન તો એપલ પ્લે સ્ટોર પર પરંતુ તેને એપીકે ફાઇલની મદદથી ફોનમાં ઇન્સ્ટોલ કરી શકાય છે. હોટશોટ પર ભારતમાંથી લગભગ 10 લાખ યુઝર્સ છે. રાજ કુન્દ્રા હોટશોટ્સ સિવાય, પેઇડ સબ્સ્ક્રિપ્શન્સ સાથે પણ અન્ય ઘણી એપ્લિકેશનો પર પોર્ન મૂવીઝ વેચીને ભારે નફો કમાયો હતો.
પૂનમ પાંડે અને શર્લિન ચોપરાના આરોપ
અભિનેત્રી પૂનમ પાંડે અને શર્લિન ચોપરાએ રાજ કુન્દ્રા અને તેના સહયોગીઓ પર તેમની તસવીરોનો દુરુપયોગ કરવાનો આરોપ લગાવ્યો હતો. બંનેએ એક નિવેદનમાં સ્વીકાર્યું હતું કે રાજ કુન્દ્રા જ તેમને ‘એડલ્ટ ઈન્ડસ્ટ્રી’માં લાવ્યા હતા. શર્લિન ચોપરાને એક પ્રોજેક્ટ માટે 30 લાખ રૂપિયા મળતા હતા અને રાજે તેને આવા 15-20 પ્રોજેક્ટ આપ્યા હતા. બીજી તરફ, પૂનમ પાંડેએ રાજ કુન્દ્રાની કંપની સાથે જોડાણ કર્યું હતું, જેમાં તેને કન્ટેન્ટ માટે પૈસા મળતા હતા. ‘આર્મસ્પ્રાઈમ મીડિયા’ કંપનીએ ભારતીય મોડલો માટે એપ્સ ડેવલપ કરી હતી.
શર્લિને પોલીસને જણાવ્યું કે તેણે આર્મ્સપ્રાઈમ નામની કંપની સાથે કરાર કર્યો હતો અને પછી વીડિયો બનાવવાનું શરૂ કર્યું હતું. તેણે કહ્યું કે શરૂઆતમાં તે ગ્લેમરસ વીડિયો હતો, પરંતુ તે પછી બોલ્ડ ફિલ્મો બનવા લાગી અને બાદમાં તેણે સેમી ન્યૂડ અને ન્યૂડ વીડિયો બનાવવા પડ્યા. શર્લિન ચોપરાના જણાવ્યા અનુસાર, તેને હંમેશા કહેવામાં આવતું હતું કે તેમાં કંઈ ખોટું નથી, કારણ કે દરેક જણ આવું કરેજ છે. શર્લિને જણાવ્યું હતું કે રાજ કુન્દ્રા 27 માર્ચ 2019ના રોજ તેના ઘરે આવ્યો હતો અને તેની સાથે ના પાડવા છતાં જબરદસ્તી કરવાનું શરૂ કર્યું હતું,
પોર્ન ફિલ્મોનું પ્રસારણ
ભારતના IT એક્ટ હેઠળ, જો કોઈ વ્યક્તિ અથવા ડિજિટલ પ્લેટફોર્મ કોઈપણ પ્રકારની અશ્લીલ સામગ્રીના પ્રકાશન અથવા પ્રસારણનું કારણ બને, તો તેને પોર્નોગ્રાફી એક્ટ હેઠળ પણ દોષિત ગણવામાં આવે છે. આ કાયદા હેઠળ, તે ડિજિટલ પ્લેટફોર્મ જ્યાંથી પોર્ન મૂવીઝ અથવા વિડિયો પ્રકાશિત અથવા પ્રસારિત કરવામાં આવ્યા છે તેના સંચાલકો પણ દંડનીય કાર્યવાહીને પાત્ર થશે.
બે મહિના જેલમાં વિતાવ્યા બાદ પોતાના ઘરે પરત ફર્યો
બોમ્બે હાઈકોર્ટમાંથી જામીન મળ્યા બાદ બે મહિના જેલમાં વિતાવ્યા બાદ રાજ કુન્દ્રા 21 સપ્ટેમ્બર 2021ના રોજ પોતાના ઘરે પરત ફર્યો હતો. ઘરે પહોંચીને કુન્દ્રા ખૂબ જ ભાવુક જણાતો હતો. તેની આંખોમાં આંસુ દેખાતા હતા. દરમિયાન, કેટલાક મીડિયા અહેવાલોએ મુંબઈ પોલીસને ટાંકીને જણાવ્યું હતું કે કુન્દ્રા પાસે 119 પોર્ન ફિલ્મોનું કલેક્શન હતું. તે આ ડીલ 9 કરોડમાં કરવા માંગતો હતો. તેની યોજના બે વર્ષમાં તેની એપ્લિકેશનના વપરાશકર્તાઓને 3 ગણા અને નફો 8 ગણો વધારવાનો હતો. તપાસ દરમિયાન પોલીસને કુન્દ્રાના મોબાઈલ, લેપટોપ અને હાર્ડ ડિસ્કમાંથી આ વીડિયો મળ્યા હતા. મુંબઈ પોલીસે તેની સામે 1500 પાનાની ચાર્જશીટ દાખલ કરી છે. જેમાં શિલ્પા સહિત 43 સાક્ષીઓના નિવેદન નોંધવામાં આવ્યા છે.
