એક તરફ ચૂંટણી પંચે જમ્મુ-કાશ્મીર વિધાનસભા ચૂંટણીની (Jammu Kashmir Vidhansabha Elections) જાહેરાત કરી છે તો બીજી તરફ હવે રાજકીય પાર્ટીઓએ પણ તૈયારી કરવા માંડી છે. વિધાનસભા ચૂંટણી માટે કોંગ્રેસ (Congress) અને નેશનલ કૉન્ફરન્સે (National Conference) ગઠબંધન કરવાની જાહેરાત કરી છે. ગુરુવારે (22 ઑગસ્ટ) કોંગ્રેસ અધ્યક્ષ મલ્લિકાર્જુન ખડગે અને સાંસદ રાહુલ ગાંધી NC અધ્યક્ષ ફારૂક અબ્દુલ્લા અને તેમના પુત્ર ઓમર અબ્દુલ્લાને મળ્યા હતા. આ બેઠક બાદ ફારૂક અબ્દુલ્લાએ ગઠબંધનની જાણકારી આપી હતી.
22 ઑગસ્ટે કોંગ્રેસ નેતા રાહુલ ગાંધી શ્રીનગરમાં તેમના પક્ષના નેતાઓ અને કાર્યકરોને મળ્યા હતા. ત્યારબાદ ઓમર અબ્દુલ્લાના નિવાસસ્થાને પહોંચી રાહુલ ગાંધીએ તેમને ગઠબંધન માટે વિશ્વાસમાં લીધા હતા. આ મામલે કોંગ્રેસ અધ્યક્ષ ખડગેએ કહ્યું હતું કે, તેઓ જમ્મુ અને કાશ્મીરમાં INDI ગઠબંધનને મજબૂત કરશે અને જમ્મુ-કાશ્મીરનો રાજ્યનો દરજ્જો પુનઃસ્થાપિત કરશે.
ગઠબંધનની જાહેરાત 22 ઑગસ્ટના રોજ બેઠક બાદ ફારૂક અબ્દુલ્લાએ કરી હતી. તેમણે કહ્યું હતું કે “ગઠબંધનને અંતિમ સ્વરૂપ આપવામાં આવ્યું છે અને આજે સાંજ સુધીમાં બેઠકોની વહેંચણીની વિગતો જાહેર કરવામાં આવશે. ગઠબંધન 90 બેઠકો માટે છે.” ઉપરાંત તેમણે કહ્યું હતું કે, “કોંગ્રેસ અને અમે (NC) સાથે છીએ. તારીગામી સાહેબ (CPMના M.Y. તારીગામી) પણ અમારી સાથે છે. મને આશા છે કે અમારા લોકો અમારી સાથે છે તેથી અમે જીતી શકીશું અને લોકો માટે વધુ સારું કામ કરી શકીશું.” તેમણે પણ પૂર્ણ રાજ્યના દરજ્જાની વાત કરી હતી અને ‘વિભાજનકારી શક્તિઓ’ સામે લડવાની વાત કરી હતી. જ્યારે નેશનલ કૉન્ફરન્સ અને કાશ્મીરની અન્ય સ્થાનિક પાર્ટીઓનો 370 હટવા પહેલાં કાશ્મીરમાં અસ્થિરતા સર્જવામાં મોટો ફાળો રહ્યો છે.
આ સિવાય રાહુલ ગાંધીએ પણ જમ્મુ-કાશ્મીરને રાજ્ય તરીકે દરજ્જો અપાવવાનો મુદ્દો ઉઠાવ્યો હતો. તેમણે કહ્યું હતું કે, “અમને અપેક્ષા હતી કે ચૂંટણી પહેલાં આ થઈ જશે પરંતુ ચૂંટણી જાહેર થઈ ગઈ છે. અમે આશા રાખીએ છીએ કે રાજ્યનો દરજ્જો શક્ય તેટલી વહેલી તકે પુનઃસ્થાપિત કરવામાં આવશે અને જમ્મુ-કાશ્મીરના લોકોના લોકશાહીના અધિકારો તેમને પરત કરવામાં આવશે.”
નોંધનીય બાબત છે કે કોંગ્રેસ અને નૅશનલ કૉન્ફરન્સ વચ્ચે રાષ્ટ્રીય સ્તરે પહેલેથી ગઠબંધન છે. INDI ગઠબંધનની બંને પાર્ટીઓ લોકસભા ચૂંટણી દરમિયાન પણ સાથે જ હતી. તેમાં NCએ ખીણમાં 3 સીટ પર ઉમેદવાર ઊભા રાખ્યા હતા, અને કોંગ્રેસે જમ્મુમાં 2 સીટ પર ઉમેદવારી નોંધાવી હતી. આ બાદ NC 3માંથી 2 સીટ જીતી હતી પરંતુ કોંગ્રેસ એક પણ સીટ જીતી શકી નહોતી. ત્યારે જમ્મુ-કાશ્મીર વિધાનસભા ચૂંટણી માટે ફરીથી બંને પક્ષોએ ગઠબંધન કર્યું છે.
જમ્મુ-કાશ્મીર વિધાનસભા ચૂંટણી ત્રણ તબક્કામાં 18 અને 25 સપ્ટેમ્બર તેમજ 1 ઑક્ટોબરના રોજ યોજાશે. 4 ઑક્ટોબરના રોજ પરિણામો જાહેર કરવામાં આવશે. કાશ્મીરની સાથે જ હરિયાણા વિધાનસભા ચૂંટણી પણ યોજાઇ રહી છે.
