મહારાષ્ટ્રના થાણેમાં ગર્ભવતી પ્રેમિકાની હત્યા કરી નાંખવા બદલ એક 27 વર્ષીય ઈસમની ધરપકડ કરવામાં આવી છે. આરોપીની ઓળખ અલ્તમશ દલવી તરીકે થઇ છે. તે તેની પ્રેમિકા સાથે લગ્ન કરવા માંગતો ન હોવાથી તેની હત્યા કરી નાંખી હતી અને લાશ અવાવરું જગ્યાએ ફેંકી દીધી હતી. હાલ પોલીસ આ મામલે વધુ તપાસ કરી રહી છે.
શનિવારે સાંજે મુંબ્રા પોલીસને વિસ્તારમાં એક ક્વોરી નજીક એક મહિલાની લાશ મળી હોવાની જાણકારી આપવામાં આવી હતી. જે બાદ પોલીસ અને ફોરેન્સિક ટીમ ઘટનાસ્થળે પહોંચતા તેમને ગળું કપાયેલી અને લોહીલુહાણ હાલતમાં એક લાશ મળી આવી હતી. બે કલાક બાદ પોલીસ મહિલાની ઓળખ કરી શકી હતી. મહિલાની ઓળખ મુસ્કાન ઉર્ફ નાદિયા મુલ્લા તરીકે થઇ છે.
પોલીસે મહિલાના પરિવારને જાણ કરતાં તેમણે તેના પ્રેમી પર શક વ્યક્ત કર્યો હતો. તે બંને વચ્ચે ત્રણ વર્ષથી પ્રેમસબંધ હતો. રિપોર્ટ અનુસાર, તે મૃતક મહિલા સાથે લગ્ન કરવા માંગતો ન હતો. અને બંને વચ્ચે અવારનવાર ઝઘડા પણ થતા રહેતા હતા. જેથી અવાવરું ક્વોરી પર લઇ જઈને હત્યા કરી નાંખી હતી અને લાશ ફેંકી દીધી હતી.
આરોપીની ઓળખ અલ્તમશ દલવી (27) તરીકે થઇ છે. તે મુંબ્રામાં જ રહે છે અને એક નાની કંપનીમાં સુપરવાઈઝર તરીકે કામ કરે છે. તેણે પ્રેમિકાની હત્યા કરવા માટે અગાઉથી જ પ્લાન ઘડી રાખ્યો હતું. જે માટે 13 ઇંચનું ચપ્પુ પણ ખરીદી લાવ્યો હતો. એ જ ચપ્પુ વડે પ્રેમિકાનું ગળું કાપીને તેની હત્યા કરી નાંખી અને જે બાદ લાશ ફેંકીને ફરાર થઇ ગયો હતો.
મૃતક મહિલાના પરિવારે જણાવ્યું કે તે ગર્ભવતી હતી. તેની બહેને કહ્યું, “મારી બહેન ગર્ભવતી હતી અને દલવી તેને અબોર્શન માટે દબાણ કરતો હતો. પરંતુ તે ખુશ હતી અને તેની સાથે જ લગ્ન કરવા માંગતી હતી.” તેણે જણાવ્યું કે, “ત્રણ દિવસ પહેલાં અમને જાણવા મળ્યું કે તેણે અન્ય યુવતી સાથે લગ્ન નક્કી કરી દીધા છે. અમે તે યુવતીનું સરનામું મેળવ્યું અને હકીકતથી વાકેફ કરવા માટે તેના ઘરે ગયા હતા. જેનાથી દલવી ગુસ્સે થઇ ગયો હતો અને કદાચ એટલે જ તેણે મારી બહેનની હત્યા કરવાનું કાવતરું ઘડ્યું હશે. તે સમયે તે ગર્ભવતી પણ હતી.”
