‘બાહુબલી’, ‘RRR’ જેવી ફિલ્મો બનાવનારા અને લાર્જર ધેન લાઈફ પાત્રો સર્જનારા ફિલ્મમેકર એસ.એસ. રાજમૌલી વધુ એક ભવ્ય ફિલ્મ બનાવી રહ્યા છે. આગામી સમયમાં રાજમૌલીની ફિલ્મમાં મહેશ બાબુ જોવા મળશે, જે તેલુગુ ફિલ્મોના જાણીતાં અભિનેતા છે. આ ફિલ્મ ટ્રાયોલોજી હોવાનું કહેવાય છે એટલે કે તે ત્રણ ભાગમાં રિલીઝ કરવામાં આવશે. ઉલ્લેખનીય છે કે, ફિલ્મ RRR દુનિયાભરમાં ગાજી છે અને ફિલ્મના ગીત ‘નાટુ નાટુ’એ ઓસ્કાર જીતીને ભારતીયોને ગૌરવ અપાવ્યો છે. એટલે રાજમૌલી હવે આગળ શું કરવાના છે તેના પર સૌની નજર છે.
2023ના અંત સુધીમાં ફ્લોર પર જશે ફિલ્મ
અહેવાલો મુજબ, એસ. એસ. રાજમૌલીની મહેશ બાબુ સાથેની નવી ફિલ્મ આ વર્ષના અંત સુધીમાં લાર્જ સ્કેલ વર્કશોપથી શરુ થઈ શકે છે. આ ફિલ્મનું કામચલાઉ શીર્ષક ‘SSMB29’ છે જે ટૂંક સમયમાં ફ્લોર પર જશે. રાજમૌલીનું કહેવું છે કે ‘SSMB29’ એ ઇન્ડિયાના જોન્સ પ્રકારની ઍક્શન એડવેન્ચર ફિલ્મ હશે, પરંતુ તેની પૃષ્ઠભૂમિ વધારે સમકાલીન અને વિસ્તૃત હશે. આ ફિલ્મમાં મહેશ બાબુ કેટલાક અદ્ભુત ઍક્શન દ્રશ્યો કરતા જોવા મળશે.
રાજમૌલીની ફિલ્મમાં મહેશ બાબુ હનુમાનજીથી પ્રેરિત પાત્ર ભજવશે
પિંકવિલાના રિપોર્ટ મુજબ, રાજમૌલીની ફિલ્મમાં મહેશ બાબુ હનુમાનજીથી પ્રેરિત પાત્ર ભજવશે. “આ ફિલ્મમાં આફ્રિકન જંગલની સાહસ કથા હશે. મહેશ બાબુનું પાત્ર બજરંગબલી હનુમાનથી પ્રેરિત હશે. હનુમાનજીની જેમ મહેશ બાબુનું પાત્ર પણ દરેક પરિસ્થિતિ સામે લડીને વિજય પ્રાપ્ત કરશે. ફિલ્મની વાર્તા રામાયણથી પ્રેરિત હશે, પણ દરેક ફિલ્મની જેમ અહીં પણ રાજમૌલી ટચ જોવા મળશે.
VFX માટે ખાસ વર્કશોપનું આયોજન થશે
ફિલ્મ દિગ્દર્શક રાજમૌલી લગભગ 6 મહિના માટે જુદા-જુદા ડીપાર્ટમેન્ટના વર્કશોપ ગોઠવશે. રિપોર્ટ્સમાં કહેવામાં આવ્યું છે કે, ફિલ્મમાં નોંધપાત્ર વિઝ્યુઅલ ઈફેક્ટસ હશે એટલે આખા યુનિટ માટે VFX કોમ્પોઝિશન અંગેની વર્કશોપ યોજવામાં આવશે.
બાહુબલીની જેમ આ ફિલ્મની વાર્તા એકાધિક ભાગમાં દર્શાવાશે
એટલું જ નહીં, રાજમૌલી ‘SSMB29’ ને એક સ્કેલ ઉપર લઈ જવાના છે. એટલે કે તેઓ આ ફિલ્મને વધુ ભવ્ય બનાવશે. આ ફિલ્મની વાર્તા ત્રણ ભાગમાં રજૂ થશે તેવું કેટલાક અહેવાલોમાં જણાવાયું છે. રાજમૌલી આ ફિલ્મથી વૈશ્વિક સ્તરે દર્શકો આકર્ષવા માગે છે.
ઉલ્લેખનીય છે કે, પ્રભાસ અભિનિત ફિલ્મ ‘બાહુબલી’ બે ભાગમાં રિલીઝ થઈ હતી જેને અભૂતપૂર્વ પ્રતિસાદ મળ્યો હતો. ‘બાહુબલી 2’ એ બોક્સ ઓફિસના તમામ રેકોર્ડ તોડી નાખ્યા હતા.
હાલ ‘SSMB28’ પર કામ કરી રહ્યા છે મહેશ બાબુ
નોંધનીય છે કે, હાલ તેલુગુ સુપરસ્ટાર મહેશ બાબુ ‘SSMB28’ ફિલ્મ પર કામ કરી રહ્યા છે જેમાં પૂજા હેગડે, જગપતિ બાબુ, શ્રીલીલા જેવા કલાકારો છે. મહેશ બાબુ અને ફિલ્મ ડિરેક્ટર ત્રિવિક્રમ શ્રીનિવાસ ‘અધાડુ’, ‘ખલેજા’ બાદ ‘SSMB28’માં સાથે કામ કરી રહ્યા છે. ફિલ્મમાં સંગીત એસ. થમનનું છે અને તે 13 જાન્યુઆરી, 2024 ના રિલીઝ થવાની શક્યતા છે.
