આસામમાં સીલ કરાયેલા મિયાં મ્યુઝિયમનું અલકાયદા કનેક્શન હોવાનો ખુલાસો થયો છે, આ પહેલા આ મ્યુઝિયમે માત્ર જમીન અને મિલકતના કાયદાનું ઉલ્લંઘન કર્યું હોવાનું માનવામાં આવી રહ્યું હતું. ભારતીય ઉપખંડમાં અલ કાયદા (AQIS) અને અંસારુલ બાંગ્લા ટીમ (ABT) સાથે સંબંધ હોવા બદલ આસામ મિયાં પરિષદના પ્રમુખ અને મહાસચિવ સહિત ત્રણ લોકોની ધરપકડ કરવામાં આવી છે. મિયાં મ્યુઝિયમનું અલકાયદા કનેક્શન સામે આવતા સુરક્ષા એજન્સીઓએ તપાસને વેગ આપ્યો છે.
આસામના ગોલપારા જિલ્લામાં દપકાભીતા ખાતે પ્રધાનમંત્રી આવાસ યોજના (PMAY) હેઠળ ફાળવવામાં આવેલા મકાનમાં વિવાદાસ્પદ ‘મિયાં સંગ્રાહાલય’નો પર્દાફાશ થયો હતો. વહીવટીતંત્ર દ્વારા 25 ઓક્ટોબર 2022ના રોજ તેને સીલ કરવામાં આવ્યું હતું. આ પછી મિયાં પરિષદનો મામલો સામે આવ્યો છે.
મિયાં પરિષદના પ્રમુખ એમ મોહર અલીની પોલીસે ગોલપારા જિલ્લાના દપકાભીતા ખાતેના સંગ્રહાલયમાંથી ધરપકડ કરી છે. મોહર અલી તેમના બે સગીર પુત્રો સાથે મ્યુઝિયમ ખોલવા માટે ધરણા પર બેઠા હતા. મોહર સસ્પેન્ડ કરાયેલ સરકારી શાળાના શિક્ષક છે. તો બીજી તરફ તેના મહાસચિવ અબ્દુલ બાતેન શેખને મંગળવાર (25 ઓક્ટોબર 2022) ની રાત્રે ધુબરી જિલ્લાના આલમગંજ સ્થિત તેમના નિવાસસ્થાનથી અટકાયતમાં લેવામાં આવ્યો હતો.
આ સિવાય ત્રીજો આરોપી તનુ ધાડુમિયા છે. આ મ્યુઝિયમનું ઉદ્ઘાટન 23 ઓક્ટોબર 2022ના રોજ આમ આદમી પાર્ટી (AAP) ના ભૂતપૂર્વ નેતા અને અહોમ રોયલ સોસાયટીના સભ્ય તનુ દ્વારા કરવામાં આવ્યું હતું. પોલીસે તનુને ડિબ્રુગઢના કવામરી ગામમાં તેના ઘરેથી અટકાયત કરી છે. બીજી તરફ AAPનું કહેવું છે કે તનુને પાર્ટીમાંથી હાંકી કાઢવામાં આવી છે.
આ ત્રણેયને કસ્ટડીમાં લીધા બાદ પૂછપરછ બાદ તેઓને ખોગરાપર પોલીસ સ્ટેશનમાં લાવવામાં આવ્યા છે, જ્યાં તેમની પૂછપરછ કરવામાં આવી રહી છે. આ ત્રણેય સામે આતંકવાદી જૂથો સાથે જોડાણ બદલ ગેરકાનૂની પ્રવૃત્તિઓ (પ્રિવેન્શન) એક્ટ (UAPA) ની વિવિધ કલમો હેઠળ કેસ દાખલ કરવામાં આવ્યો છે .
તાજેતરમાં ધરપકડ કરાયેલા કેટલાક કટ્ટરપંથીઓની પૂછપરછ દરમિયાન અટકાયત કરાયેલા ત્રણ વ્યક્તિઓના નામ સામે આવ્યા છે. નલબારીના પોલીસ અધિક્ષક ફણીન્દ્ર કુમાર નાથે જણાવ્યું હતું કે, “આ મહિનાની શરૂઆતમાં અમે ત્રણ જેહાદીઓની ધરપકડ કરી હતી – ઝુબેર હુસૈન, અબુ રેહાન અને અબેલ અલી – જેમના AQIS અને ABT સાથે સંબંધો હતા. આ તમામ હજી પણ અમારી કસ્ટડીમાં છે, તેમણે પૂછપરછ દરમિયાન કહ્યું હતું કે મિયા મ્યુઝિયમની સ્થાપનામાં તેમનો સહયોગ હતો.”
મ્યુઝિયમને સીલ કરવાની કાર્યવાહીના એક દિવસ પહેલા મુખ્યમંત્રી હિમંતા બિસ્વા સરમાએ મ્યુઝિયમના ફંડિંગ પર સવાલ ઉઠાવ્યા હતા. શર્માએ કહ્યું હતું કે, “મને સમજાતું નથી કે આ કેવું મ્યુઝિયમ છે. તેઓએ મ્યુઝિયમમાં રાખેલ હળનો ઉપયોગ આસામી લોકો કરે છે. માછીમારી માટે વપરાતી વસ્તુઓ પણ આસામી સમુદાયની છે. ત્યાં ‘લુંગી’ સિવાયની દરેક વસ્તુ આસામી લોકોની છે. તેઓએ સાબિત કરવું પડશે કે નંગોલ (હળ)નો ઉપયોગ ફક્ત મિયાં દ્વારા જ કરવામાં આવે છે અને અન્ય લોકો દ્વારા નહીં. અન્યથા કેસ નોંધવામાં આવશે.”
સરમાએ કહ્યું, “મ્યુઝિયમમાં માત્ર પરંપરાગત વસ્તુઓ છે જે સમગ્ર આસામી સમાજની સંસ્કૃતિને પ્રતિબિંબિત કરે છે, મિયાં સમુદાયની સંસ્કૃતિને નહિ. રાજ્યના બુદ્ધિજીવીઓએ આ અંગે વિચાર કરવો જોઈએ. જ્યારે મેં મિયાં શાયરી સામે અવાજ ઉઠાવ્યો ત્યારે તેઓએ મને કોમવાદી કહ્યો. હવે મિયાં કવિતા, મિયાં સ્કૂલ, મિયાં સંગ્રાહાલય અહીં છે… ઓફિસ ખુલ્યા પછી સરકાર આ બાબતે પગલાં લેશે.”
અગાઉ, રાજ્યમાં ભારતીય જનતા પાર્ટીના ધારાસભ્યોએ મ્યુઝિયમ ખોલનારા તમામ વ્યક્તિઓ સામે પગલાં લેવાની માંગ કરી હતી, જેમણે જિલ્લામાં ‘સ્થાયી મુસ્લિમોની સંસ્કૃતિ’ પ્રદર્શિત કરવાનો દાવો કર્યો હતો. ડિબ્રુગઢના બીજેપી ધારાસભ્ય પ્રશાંત ફૂકન મ્યુઝિયમ સામે અવાજ ઉઠાવનારા સૌપ્રથમ હતા. તેમણે કહ્યું હતું કે, “હું રાજ્ય સરકારને આ મ્યુઝિયમ બંધ કરાવવા વિનંતી કરું છું.” બીજેપી ધારાસભ્ય શિલાદિત્ય દેવે પણ મ્યુઝિયમ બનાવનારાઓ સામે કડક કાર્યવાહીની માંગ કરી હતી.
અહેવાલો અનુસાર, 1890 ના દાયકાના અંતમાં બંગાળમાંથી સ્થળાંતર કરીને આસામમાં સ્થાયી થયેલા મુસ્લિમો માટે ‘ મિયાં ‘ શબ્દનો ઉપયોગ કરવામાં આવે છે. અંગ્રેજોએ તેમને વાણિજ્યિક ખેતી માટે ખરીદ્યા હોવાના અહેવાલ છે.
