ટ્વિટરે પોતાની સબ્સ્ક્રિપ્શન સર્વિસ ટ્વિટર બ્લુ ભારતમાં લૉન્ચ કરી દીધી છે. જેના થકી યુઝરોને કેટલાંક ખાસ ફીચર્સ મળશે અને જેના માટે અમુક રકમ ટ્વિટરને ચૂકવવી પડશે. બુધવારે (9 ફેબ્રુઆરી, 2023) ભારત, ઇન્ડોનેશિયા, બ્રાઝિલ સહિતના દેશોમાં ટ્વિટર બ્લુ લૉન્ચ કરવામાં આવ્યું હતું.
ટ્વિટર બ્લુ એક સબ્સ્ક્રિપ્શન સર્વિસ છે, જેના થકી યુઝરોને કેટલીક ખાસ સુવિધાઓ મળી શકશે. જેનું મુખ્ય આકર્ષણ છે- બ્લુ ટિક. સબસ્ક્રાઇબર્સને વેરિફિકેશન બાદ આ બ્લુ ટિક આપવામાં આવશે. ઉપરાંત પણ કેટલાંક ખાસ ફીચર્સ મળશે.
‘ટ્વિટર બ્લુ’ સબ્સ્ક્રિપ્શન માટે યુઝરોને બે પ્રકારના પ્લાન આપવામાં આવ્યા છે. જેમાંથી એક વાર્ષિક છે અને બીજો માસિક. પહેલા પ્લાનમાં યુઝરે મહિનાના 566.67 એમ વર્ષના 6,800 ચૂકવવાના રહેશે જ્યારે બીજા પ્લેનમાં દર મહિને 650 રૂપિયા કપાશે. જેથી એકસાથે એક વર્ષનું સબ્સ્ક્રિપ્શન લેનારને એક હજાર રૂપિયાનું ડિસ્કાઉન્ટ મળશે.
એન્ડ્રોઇડ અને iOS યુઝરો માટે આ સબ્સ્ક્રિપ્શન પ્લાનની કિંમત 900 રૂપિયા જેટલી છે. અમેરિકામાં ટ્વિટર બ્લુની કિંમત આઠ ડોલર જેટલી છે.
ટ્વિટર બ્લુના સબસ્ક્રાઇબર્સને કેટલાંક ખાસ ફીચર્સ મળશે. જેમકે, તેમને ટ્વિટરના રિપ્લાય, સર્ચ અને મેંશન બોક્સમાં પ્રાથમિકતા આપવામાં આવશે. ઉપરાંત, તેમના માટે ટ્વિટર પર 50 ટકા ઓછી જાહેરાતો જોવા મળશે. આ યુઝરો ટ્વિટર પર લાંબા વિડીયો પોસ્ટ કરી શકશે તેમજ ટ્વિટર દ્વારા નવાં રોલ આઉટ થતાં ફીચર્સ પણ અન્ય સામાન્ય યુઝરો કરતાં વહેલાં મળી શકશે.
ઉપરાંત, આ યુઝરો ટ્વિટ કર્યાની 30 મિનિટમાં પાંચ વખત પોતાનું ટ્વિટ એડિટ કરી શકશે. હાલ ટ્વિટર ઉપર એવો કોઈ વિકલ્પ નથી જેથી ટ્વિટ એડિટ થઇ શકે. ઉપરાંત, તેઓ અમુક ટ્વિટ્સને બુકમાર્ક પણ કરી શકે તેવી સુવિધા આપવામાં આવશે.
રિપોર્ટ્સ અનુસાર, ટ્વિટર બ્લુ સબસ્ક્રાઇબર્સ મોબાઈલ ફોનમાં ટ્વિટરનું એપ આઇકન પણ બદલી શકશે. સબ્સ્ક્રિપ્શન માટે યુઝરોએ ટ્વિટર બ્લુ પર જઈને પેમેન્ટ કરવાનું રહેશે. ત્યારબાદ તેમનો મોબાઈલ નંબર વેરીફાય થયા બાદ બ્લુ ટિક આપવામાં આવશે. કંપની અનુસાર, તેમાં એકાદ અઠવાડિયાનો સમય લાગી શકે છે.
ઉલ્લેખનીય છે કે ઈલોન મસ્કે માઈક્રોબ્લોગિંગ વેબસાઈટ ટ્વિટર ખરીદ્યા બાદ ઘણા ફેરફારો આવી રહ્યા છે. આ પહેલાં વિવિધ સરકારી અકાઉન્ટ્સ, કંપનીઓ અને વ્યક્તિઓને આપવામાં આવતાં બ્લુ ટિક અકાઉન્ટ્સના કલર બદલવામાં આવ્યા હતા. જે અનુસાર, સરકારનાં અધિકારીક અકાઉન્ટ્સને ગ્રે, બિઝનેસ અકાઉન્ટ્સને ગોલ્ડન અને સામાન્ય અકાઉન્ટ્સને બ્લુ ટિક આપવામાં આવ્યાં હતાં.
આ ઉપરાંત, પણ ટ્વિટર અને તેના અલ્ગોરિધમમાં પણ અનેક ફેરફારો થયા છે.
