આમિર ખાનની ફિલ્મ ‘લાલ સિંઘ ચઢ્ઢા’ રિલીઝ થયાને એક અઠવાડિયું થઇ ગયું છે, પરંતુ દરરોજ ફિલ્મની કમાણી ઘટતી જાય છે અને અત્યાર સુધીમાં ફિલ્મ માત્ર પચાસ કરોડની કમાણી કરી શકી છે. જેની સામે થોડા મહિનાઓ પહેલાં રિલીઝ થયેલી કન્નડ ફિલ્મ કેજીએફ-ચેપ્ટર 2ના હિંદી વર્ઝને માત્ર પહેલા જ દિવસે 54 કરોડ રૂપિયા કમાઈ લીધા હતા.
આમિર ખાન અને કરીના કપૂર ખાન સ્ટારર ફિલ્મ ‘લાલ સિંઘ ચઢ્ઢા’ 11 ઓગસ્ટ (ગુરુવાર)ના રોજ રિલીઝ થઇ હતી. જોકે, રક્ષાબંધનના દિવસે રિલીઝ થયા છતાં પણ ફિલ્મ માત્ર 10-12 કરોડની કમાણી કરી શકી હતી. જોકે, તે બાદ સતત ફિલ્મનું પ્રદર્શન નબળું થતું રહ્યું અને કમાણી ઘટતી રહી હતી અને ફિલ્મને પચાસ કરોડનો આંકડો પાર કરવામાં સાત દિવસ લાગ્યા છે. બુધવારે આગલા દિવસ કરતાં ફિલ્મની કમાણીમાં 35 ટકા જેટલો ઘટાડો નોંધાયો હતો.
બુધવારે લાલ સિંઘ ચઢ્ઢાએ બૉક્સ ઓફિસ પર માત્ર દોઢ કરોડની કમાણી કરી હતી. રિપોર્ટ્સ અનુસાર, જે રીતે ફિલ્મનું કલેક્શન સતત ઘટી રહ્યું છે તેને જોતાં અનુમાન છે કે હવે વધુ ખાસ કમાણી થશે નહીં અને જલ્દીથી જ ફિલ્મ બહાર થઇ જશે. જોકે, અગાઉ ટ્રેડ એનાલિસ્ટસ્ દ્વારા અનુમાન વ્યક્ત કરવામાં આવ્યું હતું કે ફિલ્મ 100 કરોડ સુધી પહોંચી શકશે નહીં. પરંતુ જે રીતે સતત કલેક્શન ઘટી રહ્યું છે તેને જોતાં હવે એનાલિસ્ટસ્ માની રહ્યા છે કે ફિલ્મનું લાઈફ ટાઈમ કલેક્શન જ 60 કરોડ પર જ અટકી જશે.
બીજી તરફ, ગત એપ્રિલ મહિનામાં રિલીઝ થયેલી કન્નડ ફિલ્મ કેજીએફ ચેપ્ટર-2ના હિન્દી વર્ઝને પહેલા જ દિવસે 54 કરોડ રૂપિયાની કમાણી કરી લીધી હતી. આ ફિલ્મનું કુલ કલેક્શન 1250 કરોડ રૂપિયા થયું હતું. બીજી તરફ, આમિર ખાનની ફિલ્મ સાત દિવસે પણ આ આંકડો પાર કરી શકી નથી.
બૉલીવુડ ફિલ્મોના સતત થતા નબળા પ્રદર્શન મામલે બચાવ કરવા માટે બૉલીવુડ અભિનેતાઓ અને નિર્માતાઓ ઠીકરું GST પર ફોડી રહ્યા છે અને કહી રહ્યા છે કે લોકો પાસે ફિલ્મ જોવા માટે પૈસા જ નથી. જોકે, બીજી તરફ દક્ષિણ ભારતની ફિલ્મો આખા દેશમાં કરોડોની કમાણી કરી રહી છે. KGF ઉપરાંત દક્ષિણની ફિલ્મ RRR પણ સુપરહિટ સાબિત થઇ હતી અને ફિલ્મે 1100થી 1200 કરોડની કમાણી કરી હતી.
આમિર ખાન અભિનીત ફિલ્મ ‘લાલ સિંઘ ચઢ્ઢા’ વર્ષ 1994માં આવેલી વિદેશી ફિલ્મ ‘ધ ફોરેસ્ટ ગમ્પ’ની ઓફિશિયલ રીમેક છે. ફિલ્મ રિલીઝ થઇ તે પહેલાં જ આમિર ખાનની જૂની કરતૂતોના કારણે સોશિયલ મીડિયા પર બહિષ્કાર શરૂ થઇ ગયો હતો. જે ફિલ્મ રિલીઝ થયા બાદ ગ્રાઉન્ડ પર પણ જોવા મળ્યો અને ફિલ્મ સુપર ફ્લૉપ ગઈ છે.
