કર્ણાટકના DGP પ્રવીણ સૂદ સેન્ટ્રલ બ્યુરો ઓફ ઇન્વેસ્ટિગેશન (CBI)ના આગામી ડિરેક્ટર હશે. સૂદ કર્ણાટક કેડરના 1986 બેચના ભારતીય પોલીસ સેવા (IPS) અધિકારી છે. સીબીઆઈના વર્તમાન ડિરેક્ટર સુબોધ કુમાર જયસ્વાલનો કાર્યકાળ 25 મે 2023ના રોજ સમાપ્ત થઈ રહ્યો છે. આ પછી સૂદ પોતાનું પદ સંભાળશે.
મીડિયા અહેવાલો અનુસાર, પ્રવીણ સૂદની પસંદગી વડાપ્રધાન નરેન્દ્ર મોદીની અધ્યક્ષતામાં લોકસભામાં વિપક્ષના નેતા અધીર રંજન ચૌધરી અને ભારતના મુખ્ય ન્યાયાધીશ ડીવાય ચંદ્રચુડની બનેલી પેનલ દ્વારા કરવામાં આવી છે. મધ્યપ્રદેશના ડીજીપી સુધીર સક્સેના પણ સીબીઆઈ ડાયરેક્ટર પદની રેસમાં હતા.
એવું પણ કહેવામાં આવી રહ્યું છે કે સીબીઆઈ ચીફના પદ માટે શોર્ટલિસ્ટ કરાયેલા અધિકારીઓની યાદીમાં સૂદનો સમાવેશ કરવામાં આવ્યો નથી. છેલ્લી ઘડીએ તેમનું નામ સામેલ કરવામાં આવ્યું હતું. આ અંગે ચૌધરીએ સૂદની ભલામણ સામે અસંમતિ નોંધ રજૂ કરી છે.
પ્રવીણ સૂદને જાન્યુઆરી 2020માં કર્ણાટકના ડીજીપી તરીકે નિયુક્ત કરવામાં આવ્યા હતા. તેમણે વર્ષ 1989માં મૈસૂરથી એએસપી તરીકે કારકિર્દીની શરૂઆત કરી હતી. 1999માં, તેઓ ત્રણ વર્ષ માટે મોરેશિયસ સરકારના પોલીસ સલાહકાર તરીકે વિદેશી પ્રતિનિયુક્તિ પર ગયા. ત્યાં તેણે યુરોપિયન અને અમેરિકન પોલીસ સાથે નજીકથી કામ કર્યું.
પ્રવીણ સૂદે કર્ણાટકના ડીજીપી બનતા પહેલા ગૃહ વિભાગના અગ્ર સચિવ, કર્ણાટક રાજ્ય અનામત પોલીસના અધિક પોલીસ મહાનિર્દેશક અને એડિશનલ ડાયરેક્ટર જનરલ ઓફ પોલીસ, એડમિનિસ્ટ્રેશન તરીકે સેવા આપી છે. તેઓ આવતા વર્ષે મે મહિનામાં નિવૃત્ત થવાના હતા. જો કે, સીબીઆઈ ચીફ બન્યા પછી, તેઓ ઓછામાં ઓછા મે 2025 સુધી આ પદ પર ચાલુ રહેશે.
કોણ છે પ્રવીણ સૂદ?
હાલના કર્ણાટકના DGP પ્રવીણ સૂદ મૂળ હિમાચલ પ્રદેશના છે. તેમણે આઈઆઈટી દિલ્હીથી એન્જિનિયરિંગમાં ગ્રેજ્યુએશન કર્યું છે. 2003માં, તેમણે પબ્લિક પોલિસી અને મેનેજમેન્ટમાં પોસ્ટ ગ્રેજ્યુએશન કરવા માટે ઇન્ડિયન ઇન્સ્ટિટ્યૂટ ઑફ મેનેજમેન્ટ, બેંગ્લોર અને મેક્સવેલ સ્કૂલ ઑફ ગવર્નન્સ, ન્યૂ યોર્કમાંથી અભ્યાસ માટે વિરામ લીધો હતો.
તેમને વર્ષ 1996માં સેવામાં શ્રેષ્ઠતા માટે મુખ્યમંત્રી સુવર્ણચંદ્રક, વર્ષ 2002માં ગુણવત્તાયુક્ત સેવા બદલ પોલીસ ચંદ્રક અને વર્ષ 2011માં વિશિષ્ટ સેવા બદલ રાષ્ટ્રપતિ પોલીસ ચંદ્રક એનાયત કરવામાં આવ્યો છે. આ ઉપરાંત, તેમને વર્ષ 2011માં ‘ટ્રાફિક મેનેજમેન્ટ માટે ટેકનોલોજીનો સૌથી નવીન ઉપયોગ’ માટે નેશનલ ઈ-ગવર્નન્સ ગોલ્ડ એવોર્ડ એનાયત કરવામાં આવ્યો છે.
બેંગલુરુ શહેરના પોલીસ કમિશનર તરીકે, તેમણે ‘નમ્મા 100’ શરૂ કરી, જે નાગરિકો માટે ‘ઇમરજન્સી રિસ્પોન્સ સિસ્ટમ’ છે. તે 24X7 બહુભાષી અધિકારીઓ દ્વારા સંચાલિત 100 લાઇન પ્રદાન કરે છે, અને બેંગલુરુ શહેરમાં ફેલાયેલા 276 ઇમરજન્સી રિસ્પોન્સ વાહનો (હોયસલા)ને સપોર્ટ કરે છે.
22 વર્ષની ઉંમરે બન્યા હતા IPS
22 વર્ષની નાની ઉંમરે યુનિયન પબ્લિક સર્વિસ કમિશન (UPSC) ની પરીક્ષા પાસ કરનાર અને IPS બનેલા પ્રવીણ સૂદે મહિલા પોલીસ દ્વારા સંચાલિત ‘સુરક્ષા’ એપ અને ‘પિંક હોયસલા’ લોન્ચ કરવામાં પણ મહત્વની ભૂમિકા ભજવી હતી. આ એપ મહિલાઓ અને બાળકો માટે ખૂબ જ મહત્વપૂર્ણ છે.
વાસ્તવમાં કેન્દ્રની મોદી સરકારે વર્તમાન સીબીઆઈ ડાયરેક્ટર સુબોધ જયસ્વાલના કાર્યકાળને લંબાવવા અંગે કોઈ નિર્ણય લીધો નથી. તેમનો કાર્યકાળ આગામી 10 દિવસમાં એટલે કે 25 મેના રોજ પૂરો થઈ રહ્યો છે. સુબોધ જયસ્વાલ સીબીઆઈ ચીફ બનતા પહેલા મહારાષ્ટ્ર સરકારમાં ડીજીપી હતા.
ડીજીપી પ્રવીણ સૂદ આ વર્ષે માર્ચમાં ચર્ચામાં આવ્યા હતા. કર્ણાટક કોંગ્રેસના વડા ડીકે શિવકુમારે તેમના પર રાજ્યની ભાજપ સરકારને સમર્થન આપવાનો આરોપ લગાવ્યો હતો. શિવકુમારે આક્ષેપ કર્યો હતો કે ડીજીપી કોંગ્રેસના નેતાઓ સામે કેસ નોંધી રહ્યા છે. શિવકુમારે સૂદની ધરપકડની માંગ કરી હતી.
