ભારતીય મૂળના અવકાશયાત્રી સુનીતા વિલિયમ્સે વધુ એક સિદ્ધિ પોતાના નામે કરી છે. સુનીતા વિલિયમ્સ અવકાશમાં પરીક્ષણ મિશન પર નવું અવકાશયાન ઉડાવનાર પ્રથમ મહિલા બન્યા છે. સુનીતા વિલિયમ્સે 5 જૂને ફ્લોરિડાના કેપ કેનાવેરલથી નાસાના અવકાશયાત્રી બેરી ‘બુચ’ વિલ્મોર સાથે બોઇંગના સ્ટારલાઇનર કેપ્સ્યુલમાં ઉડાન ભરી હતી.
બોઇંગ ક્રૂ ફ્લાઇટ ટેસ્ટ (CFT) નામનું આ મિશન નાસાના કોમર્શિયલ ક્રૂ પ્રોગ્રામ તરીકે શરૂ કરવામાં આવ્યું છે. ઇન્ટરનેશનલ સ્પેસ સ્ટેશન પર નિયમિત ક્રૂ ફ્લાઇટ્સ માટે સ્ટારલાઇનરને પ્રમાણિત કરવાની દિશામાં આ એક મહત્વપૂર્ણ પગલું છે. જો આ મિશન સફળ થશે, તો તે સ્પેસએક્સના ક્રૂ ડ્રેગન પછી અવકાશયાત્રીઓને ભ્રમણકક્ષામાં લેબથી લાવવા લઈ જવા માટે સ્ટારલાઈનર બીજું ખાનગી અવકાશયાન બનશે.
બંને અવકાશયાત્રીઓ લગભગ એક સપ્તાહ સુધી સ્પેસ સ્ટેશન પર રહેશે. આ દરમિયાન તેઓ સ્પેસ સ્ટેશન પર જરૂરી પરીક્ષણો કરશે. સુનીતા વિલિયમ્સ અને વિલ્મોર ઇન્ટરનેશનલ સ્પેસ સ્ટેશન પર તેમના મિશન ચાલુ રાખશે, સ્ટારલાઇનર પર તેમનું મિશન વ્યાપારી ભાગીદારી દ્વારા અવકાશમાં માનવતાની પહોંચને વિસ્તૃત કરવા માટે એક મહત્વપૂર્ણ પગલું છે.
સુનીતાના નામે છે અનેક રેકોર્ડ
સુનીતા વિલિયમ્સ માટે, આ ફ્લાઇટ તેની કારકિર્દીમાં વધુ એક સીમાચિહ્નરૂપ છે. અગાઉ, સુનીતા વિલિયમ્સે 2006-2007 અને 2012માં ઇન્ટરનેશનલ સ્પેસ સ્ટેશન પર તેમના મિશન દરમિયાન એક મહિલા દ્વારા સૌથી વધુ સ્પેસવોક (7) અને સ્પેસવોક ટાઇમ (50 કલાક, 40 મિનિટ)નો રેકોર્ડ બનાવ્યો હતો.
ઉલ્લેખનીય છે કે 2012માં સુનીતા વિલિયમ્સ ઈન્ટરનેશનલ સ્પેસ સ્ટેશનની સફર દરમિયાન અવકાશમાં ટ્રાયથ્લોન પૂર્ણ કરનાર પ્રથમ મહિલા બન્યા હતા. આ દરમિયાન, તેઓએ વેઇટ લિફ્ટિંગ મશીનનો ઉપયોગ કરીને સ્વિમિંગનું અનુકરણ કર્યું અને હાર્નેસ સાથે બાંધેલી ટ્રેડમિલ પર દોડ્યા હતા.
