હિંસા બાદ 180 હિંદુ સંગઠનોએ યુકેના પીએમને પત્ર લખી ન્યાયની માંગ કરી હતી, 180 બ્રિટિશ ભારતીય અને હિંદુ સંગઠનો અને મંદિરના અધિકારીઓએ બ્રિટિશ વડા પ્રધાન લીગ ટ્રસને યુકેના લેસ્ટરમાં હિંદુઓ વિરુદ્ધ હિંસા અંગે પત્ર લખ્યો છે. આ પત્રમાં ત્યાં રહેતા હિંદુઓની સ્થિતિ અને લેસ્ટર હિંસા તેમજ પીડિતોને વળતરની નિષ્પક્ષ તપાસની માંગ કરવામાં આવી છે.
હિંદુ સંગઠનોએ યુકેના પીએમને બ્રિટિશ વડાપ્રધાન લિઝ ટ્રસને લખેલા પત્રમાં લખ્યું છે કે અહીં હિંદુઓને નિશાન બનાવીને હુમલા કરવામાં આવી રહ્યા છે. તેથી હિંદુઓ ખૂબ જ ભયભીત છે. પત્રમાં કહેવામાં આવ્યું છે કે, “અમે બર્મિંગહામ, લેસ્ટર, હોલ અને અન્ય શહેરોમાં તાજેતરની હિંસા તરફ તમારું ધ્યાન દોરવા માંગીએ છીએ, આ સ્થળોએ થયેલી હિંસામાં ભારતીય અને હિંદુ સમુદાયને ખૂબ જ હેરાન કરવામાં આવ્યા છે. હિંસાગ્રસ્ત આ વિસ્તારોમાં હિંદુ સમુદાય પ્રત્યે નફરત ચરમસીમાએ છે.”
આ પત્રમાં હિંદુઓ પરના હુમલાઓનું વર્ણન કરતા આગળ કહેવામાં આવ્યું છે કે, “જ્યારે પણ કોઈપણ હિંદુ સમુદાયના વ્યક્તિ પર શારીરિક હુમલો થાય છે, સોશિયલ મીડિયા પર હેરાન કરવામાં આવે છે, તેમને શાળાઓ અને ઓફિસોમાં પણ નિશાન બનાવવામાં આવે છે, તેમને સતત ધમકાવવામાં આવે છે અને તેમની સાથે દુર્વ્યવહાર થાય છે. અહી હિંદુઓ પર શારીરિક હુમલાઓ, સોશિયલ મીડિયા પર ઉત્પીડન અને શાળાઓ અને કાર્યસ્થળોમાં સોફ્ટ ટાર્ગેટીંગ દ્વારા ખુલ્લેઆમ હિંસા, ધમકીઓ અને દુર્વ્યવહાર કરવામાં આવ્યો છે.
લીઝ ટ્રસને લખેલા પત્રમાં એમ પણ કહેવામાં આવ્યું છે કે બ્રિટનમાં કુલ વસ્તીના બે ટકાથી પણ ઓછા હિંદુઓ છે, તેમ છતાં બ્રિટિશ અર્થતંત્રમાં તેમનું યોગદાન સામાજિક-આર્થિક અને સામાજિક એકીકરણની દ્રષ્ટિએ નોંધપાત્ર છે. એવું કહેવામાં આવ્યું છે કે જેલના આંકડાઓથી સ્પષ્ટ થાય છે કે અહીં હિન્દુ સમુદાય સૌથી વધુ કાયદાનું પાલન કરે છે. તેમ છતાં આજે હિન્દુઓ એક એવા સમુદાયની જેમ જીવી રહ્યા છે જાણે તેનું અસ્તિત્વ સંકટમાં હોય.
લેસ્ટર અને અન્યત્ર હિંસા તરફ ધ્યાન દોરતા આ પત્રમાં કહેવામાં આવ્યું છે કે, “તમારે લેસ્ટરમાં થયેલી હિંસા અને બર્મિંગહામમાં મંદિરની બહાર આક્રમક વિરોધની સાથે સાથે નોટિંગહામ અને લંડનમાં વેમ્બલી ખાતે હિંદુ સમુદાયને પરેશાન કરવાની પણ નોંધ લેવી જોઈએ. પ્રતિષ્ઠિત સનાતન મંદિરની બહારના દુષ્ટ પ્રયાસોની આપને જાણ હોવી જોઈએ. જો કે લેસ્ટરમાં હિંદુઓ સાથે જે બન્યું તેના માટે ઘણા કારણો છે. પરંતુ તમારે જાણવું જોઈએ કે અહીં હિન્દુ સમુદાય જોખમમાં છે.
આ સિવાય બ્રિટનના વડાપ્રધાનને લખેલા આ પત્રમાં 6 માંગણીઓ કરવામાં આવી છે . સૌથી પહેલા તો હિંદુઓ સામેની હિંસાની પોલીસ દ્વારા સક્રિય તપાસની માંગ કરવામાં આવી છે. સાથે જ બીજી માંગ તરીકે તોફાન પીડિતોને આર્થિક સહાયની માંગ પણ કરવામાં આવી છે. ત્રીજી માંગણીમાં કહેવામાં આવ્યું છે કે હિંદુ વિરોધી નફરત અને તેના કારણોની નિષ્પક્ષ તપાસ થવી જોઈએ.
લીઝ ટ્રસને લખેલા પત્રમાં ચોથી માંગ છે કે સરકારે એવા સ્થળોની ઓળખ કરવી જોઈએ જ્યાં કટ્ટરપંથી પ્રબળ બન્યા છે. હિંદુ સંગઠનોએ શિક્ષકોને હિંદુ વિરોધી ગતિવિધિઓનું પરીક્ષણ કરવા માટે તાલીમ આપવા માટે ભંડોળની પણ માંગ કરી છે. તો બીજી તરફ છઠ્ઠી અને છેલ્લી માંગ દિવાળી દરમિયાન હિન્દુઓને પૂરતી સુરક્ષા આપવા સાથે સંબંધિત છે.
