મથુરાના બાંકે બિહારી મંદિરના ટ્રસ્ટનું ગઠન કરવામાં આવ્યું છે. યુપીની યોગી સરકારે ટ્રસ્ટનું ગઠન કર્યું છે. પ્રમુખ સચિવ અતુલ શ્રીવાસ્તવે આ વિશેનો આદેશ આપ્યો હતો. આ ઉપરાંત ટ્રસ્ટના કામ પણ નક્કી કરવામાં આવ્યા છે. હવે ટ્રસ્ટના પદાધિકારીઓ જ નક્કી કરશે કે, પૂજા વ્યવસ્થા કેવી હશે? તહેવારો પર મંદિરની સુરક્ષા કેવી રહેશે અને પૂજારી કોણ રહેશે? આ તમામ બાબતો હવે ટ્રસ્ટ દ્વારા થશે.
આ ટ્રસ્ટનું કામકાજ જોવા માટે મુખ્ય કાર્યપાલક અધિકારી (CEO) પણ તહેનાત કરવામાં આવ્યા છે. ટ્રસ્ટમાં કુલ 18 સભ્યો રાખવામાં આવશે. અધિસૂચના અનુસાર, બોર્ડમાં 4 રીતના સભ્યો હશે. પદેન સભ્યો તરીકે 7 અધિકારીઓ હશે. આ ઉપરાંત 11 અન્ય સભ્યો પ્રતિષ્ઠિત વ્યક્તિ સામેલ કરવામાં આવશે. ટ્રસ્ટમાં વૈષ્ણવ પરંપરા, સંપ્રદાય અથવા પીઠો સાથે સંકળાયેલા 6 લોકો પણ સામેલ હશે. 3 સભ્યો શિક્ષણવિદ, ઉદ્યમી, સમાજસેવી હશે. આ ઉપરાંત ગોસ્વામી પરંપરાના બે સભ્યો પણ હશે.
વધુમાં સૂત્રોના હવાલાથી એવું પણ કહેવાય રહ્યું છે કે, એકાદ-બે દિવસમાં યોગી સરકાર CEOના પદ પર કોઈ વરિષ્ઠ અધિકારીની નિમણૂક કરી શકે છે. આ ઉપરાંત સભ્યોનો કાર્યકાળ પણ 3 વર્ષ સુધીનો હોવાનું કહેવાયું છે. કોઈપણ સભ્યને 2 વખતથી વધુ વાર નિયુક્ત કરવામાં આવી શકશે નહીં. તમામ સભ્યો હિંદુ હશે અને સનાતન ધર્મમાં આસ્થા ધરાવતા હશે.
