બનાસકાંઠાની વાવ (Vav) વિધાનસભા બેઠક પર આજે ફોર્મ ભરવાના અંતિમ દિવસે ભાજપ-કોંગ્રેસે (BJP-Congress) ઉમેદવારો જાહેર કર્યા છે. ભાજપે સ્વરૂપજી ઠાકોરને ટિકિટ આપી છે, જ્યારે કોંગ્રેસે અહીં પૂર્વ MLA ગુલાબસિંહ રાજપૂતને ઉતાર્યા છે.
સ્વરૂપજી ઠાકોર વર્ષ 2022ની વિધાનસભા ચૂંટણીમાં વાવ બેઠક પરથી જ ચૂંટણી લડ્યા હતા, પરંતુ ગેનીબેન ઠાકોર સામે હારનો સામનો કરવો પડ્યો હતો. તેઓ 15 હજાર મતથી હાર્યા હતા. હવે ભાજપે ફરી તેમને જ મેદાનમાં ઉતાર્યા છે. તેઓ ઠાકોર સેનાના પ્રદેશ ઉપાધ્યક્ષ રહી ચૂક્યા છે.
વાવ વિધાનસભાની પેટાચૂંટણીમાં ભારતીય જનતા પાર્ટીના ઉમેદવાર બનવા બદલ શ્રી સ્વરૂપજી ઠાકોરને ખૂબ ખૂબ અભિનંદન અને ભવ્ય વિજય માટે શુભકામનાઓ. pic.twitter.com/3kFuLGXhvD
— BJP Gujarat (@BJP4Gujarat) October 25, 2024
ગુલાબસિંહ રાજપૂત 2019માં થરાદ વિધાનસભાની પેટાચૂંટણી જીત્યા હતા અને MLA બન્યા હતા. જોકે, 2022 વિધાનસભા ચૂંટણીમાં તેઓ આ જ બેઠક પરથી લડ્યા, પરંતુ ભાજપના શંકર ચૌધરી સામે પરાજય થયો હતો. તેઓ યુવા કોંગ્રેસ અને NSUIમાં પણ પદાધિકારી રહી ચૂક્યા છે.
અભિનંદન અભિનંદન
— Gujarat Congress (@INCGujarat) October 25, 2024
વાવ વિધાનસભા પેટા ચૂંટણીમાં શ્રી @GulabsinhRajput જી ને કોંગ્રેસ પક્ષના ઉમેદવાર બનવા બદલ ખૂબ ખૂબ અભિનંદન સહ શુભકામનાઓ…#VoteForGulabsinh pic.twitter.com/3djPEBtw0j
આ બંને ઉમેદવારોએ ઉમેદવારીપત્રો ભરી દીધાં છે. શુક્રવારે (25 ઑક્ટોબર) ઉમેદવારી પત્રો ભરવાનો અંતિમ દિવસ છે. બપોરે 2 વાગ્યા સુધીમાં કુલ 16 ફોર્મ ભરાયાં હોવાની જાણકારી મળી રહી છે. 13 નવેમ્બરે અહીં મતદાન થશે અને 23મીએ પરિણામો જાહેર કરવામાં આવશે.
