વારાણસી કાશી વિશ્વનાથ મંદિરની બાજુમાં સ્થિત વિવાદિત ઢાંચા જ્ઞાનવાપીના સીલ કરવામાં આવેલા વિસ્તારના ASI સરવેની માંગ પર સુપ્રીમ કોર્ટે મુસ્લિમ પક્ષનો જવાબ માગ્યો છે.
આ સીલ કરવામાં આવેલો એરિયા એ જ છે, જ્યાંથી મે, 2022માં સરવે દરમિયાન શિવલિંગ મળી આવ્યું હતું. હિંદુ પક્ષે સુપ્રીમ કોર્ટ સમક્ષ અરજી કરીને આ વિસ્તારનો ASI સરવે કરવાની માંગ કરી છે.
જસ્ટિસ સૂર્યકાંત અને જસ્ટિસ ઉજ્જલ ભુયાનની ખંડપીઠે કેસની સુનાવણી કરતાં મસ્જિદનું સંચાલન કરતી ‘અંજુમન ઈન્તેજામિયા મસ્જિદ સમિતિ’ને આ મામલે નોટિસ પાઠવીને જવાબ રજૂ કરવા માટે કહ્યું છે. આ મામલે 17 ડિસેમ્બરે વધુ સુનાવણી હાથ ધરવામાં આવશે.
ઉલ્લેખનીય છે કે જ્ઞાનવાપી ઢાંચાના સરવે અને વિડીયોગ્રાફી દરમિયાન વજૂખાનામાંથી એક શિવલિંગ મળી આવ્યું હતું. ત્યારબાદ મામલો સુપ્રીમ કોર્ટમાં પહોંચતાં કોર્ટે આ વિસ્તારને સીલ કરી દેવાનો આદેશ આપ્યો હતો. ત્યારથી તે સીલ કરાયો છે.
અગાઉ જ્ઞાનવાપીના ASIનો મામલો સુપ્રીમ કોર્ટમાં પહોંચ્યો હતો, પરંતુ ત્યારે આ સીલ કરવામાં આવેલ વિસ્તારને બાકાત રાખવામાં આવ્યો હતો. હવે હિંદુ પક્ષની માંગ છે કે આ વિસ્તારનો પણ ASI સરવે કરવામાં આવે, જેથી શિવલિંગ કેટલાં વર્ષ જૂનું છે એ ખ્યાલ આવી શકે.
