અભિનેતા સૈફ અલી ખાન પર હુમલો કરનાર શખ્સ હજુ પણ ફરાર છે અને મુંબઈ પોલીસની લગભગ 30 જેટલી ટીમો શહેરમાં ફરીને તેને શોધી રહી છે. બીજી તરફ, તેના વધુ CCTV ફૂટેજ સામે આવ્યા છે.
નવા ફૂટેજમાં હુમલો કરનાર પીળા શર્ટમાં જોવા મળે છે. આ કપડાં હુમલા સમયના પહેરવેશ કરતાં અલગ છે. એટલે આ દ્રશ્યો હુમલા પહેલાના છે અને પછીના એ હજુ સુધી જાણી શકાયું નથી. તાજી જાણકારી અનુસાર આરોપી છેલ્લે બાંદ્રામાં જોવા મળ્યો હતો.
મુંબઈ પોલીસ આ કેસમાં એકાદ-બેને પકડીને પૂછપરછ કરી ચૂકી છે, પરંતુ તેમને કેસ સાથે હજુ સુધી કશું લાગતું-વળગતું ન હોવાનું જાણવા મળ્યું છે. જે આરોપી છે તે હજુ સુધી પકડાયો નથી.
તપાસમાં મુંબઈ પોલીસ, ક્રાઇમ બ્રાન્ચ યુનિટ અને ક્રાઇમ ઇન્ટેલિજન્સ યુનિટને કામે લગાડવામાં આવ્યાં છે. તાજેતરમાં પત્રકારો સાથેની વાતચીતમાં મુખ્યમંત્રી દેવેન્દ્ર ફડણવીસે જણાવ્યું હતું કે, પોલીસ પાસે હવે ઘણા પુરાવાઓ આવી ગયા છે અને વહેલી તકે આરોપીને ઝડપી લેવામાં આવશે.
