ઓડિશા સરકારે પુરીના પ્રસિદ્ધ જગન્નાથ મંદિરની (Jagannath Temple Puri) આસપાસના વિસ્તારમાં પવિત્ર વાતાવરણ જાળવવા માટે દારૂ અને નોનવેજના (Liquor Bar and Nonveg Ban) વેચાણ પર પ્રતિબંધ મૂકવાની યોજના જાહેર કરી છે. આ નિર્ણય મુજબ, મંદિરની 2 કિલોમીટરની ત્રિજ્યામાં દારૂનું વેચાણ અને બિનશાકાહારી ખોરાકની દુકાનો પર રોક લગાવવામાં આવશે.
આ યોજનાને અમલમાં મૂકતાં પહેલાં સ્થાનિક દુકાનદારો અને વેપારીઓ સાથે ચર્ચા કરવામાં આવશે, જેથી તેમના હિતોનું ધ્યાન રાખી શકાય. સરકારનો ઉદ્દેશ્ય મંદિરની આસપાસના વિસ્તારને શાંત અને પવિત્ર રાખવાનો છે, જે ભક્તો માટે આધ્યાત્મિક અનુભવને વધુ ઉન્નત બનાવશે.
કાયદા મંત્રી પૃથ્વીરાજ હરિચંદને 9 જૂને જણાવ્યું હતું કે, 12મી સદીના મંદિરના 2 કિમીના વિસ્તારમાં દારૂની દુકાનો અને બાર પર પ્રતિબંધ મૂકવામાં આવશે, જ્યારે ગ્રાન્ડ રોડ પર માંસ અને માછલી પીરસતી ખાણીપીણીની દુકાનોને સ્થાનાંતરિત કરવા માટે કહેવામાં આવશે.
આ નિર્ણય, હજુ આયોજનના તબક્કામાં છે, તે પ્રતિબંધિત ક્ષેત્રમાં બે લાઇસન્સ પ્રાપ્ત દારૂની દુકાનો અને બે બારને અસર કરશે. જગન્નાથ અને ગુંડીચા મંદિરો વચ્ચેના 3 કિમીના પટ પર 70 થી વધુ વિક્રેતાઓ અને રેસ્ટોરન્ટ્સને ખસેડવાની જરૂર પડશે.
અધિકારીઓએ જણાવ્યું હતું કે નિયમો તબક્કાવાર રીતે લાગુ કરવામાં આવશે. તેમના જણાવ્યા અનુસાર “દરેક લોકો માટે સુગમ બદલાવ સુનિશ્ચિત કરવા માટે નવા નિયમો તબક્કાવાર રીતે લાગુ કરવામાં આવશે. અંતિમ નિર્ણય લેતા પહેલાં દુકાનદારોને વિશ્વાસમાં લેવામાં આવશે.”
