કેન્દ્રીય માર્ગ અને પરિવહન મંત્રી નીતિન ગડકરીએ ફાસ્ટેગને લઈને અગત્યની ઘોષણા કરી છે. તેમણે જણાવ્યું કે હવે સરકાર ફાસ્ટેગ માટે એક વાર્ષિક પાસ ઇસ્યુ કરશે. જેનો એક વર્ષનો શુલ્ક ₹3,000 હશે. કેન્દ્રીય મંત્રીએ X પર આ ઘોષણા કરી.
તેમણે જણાવ્યું કે, સુગમ હાઇવે યાતાયાત તરફ એક પરિવર્તનકારી પહેલના ભાગરૂપે અમે 15 ઑગસ્ટ, 2025થી ફાસ્ટેગ-બેઝ્ડ વાર્ષિક પાસ લાવી રહ્યા છીએ, જેનો શુલ્ક ₹3000 હશે. તેની વૈધતા ઇસ્યુ થયાના એક વર્ષ સુધી કે 200 ટ્રીપ સુધી (બેમાંથી જે પહેલાં આવે) હશે. તેમણે સ્પષ્ટતા કરી કે આ પાસ માત્ર કાર, જીપ અને વાન જેવાં નોન-કમર્શિયલ વાહનો માટે જ હશે.
Important Announcement 📢
— Nitin Gadkari (@nitin_gadkari) June 18, 2025
🔹In a transformative step towards hassle-free highway travel, we are introducing a FASTag-based Annual Pass priced at ₹3,000, effective from 15th August 2025. Valid for one year from the date of activation or up to 200 trips—whichever comes…
તેમણે ઉમેર્યું કે, આ એન્યુઅલ પાસ દેશભરના નેશનલ હાઇવે પર કામ કરશે. તેના એક્ટિવેશન અને રિન્યુઅલ માટે એક અલગ લિંક રાજમાર્ગ યાત્રા એપ અને NHAI તેમજ મંત્રાલયની વેબસાઈટ ઉપર પણ બહુ જલ્દીથી ઉપલબ્ધ કરાવવામાં આવશે.
નીતિન ગડકરીએ જણાવ્યું કે, આ નીતિ 60 કિલોમીટરની સીમામાં આવેલાં ટોલ પ્લાઝા મામલે જોવા મળતી સમસ્યાઓના સમાધાનના ભાગરૂપે લાવવામાં આવી છે અને તેનાથી સિંગલ અને એફોર્ડેબલ ટ્રાન્ઝેક્શન થકી ટોલ પેમેન્ટ સરળ બનશે. તેનાથી પ્રતીક્ષા સમયમાં પણ ઘટાડો થશે અને ભીડ પણ ઘટાડીને લાખો વાહનચાલકો માટે હાઇવે યાત્રા સુગમ અને સરળ બનશે.
