છત્તીસગઢમાં ₹ 2,161 કરોડના કથિત દારૂ કૌભાંડની તપાસમાં એન્ફોર્સમેન્ટ ડિરેક્ટોરેટે (ED) મોટી કાર્યવાહી કરી છે. EDએ ભૂતપૂર્વ આબકારી મંત્રી કવાસી લખમાના રાયપુર સ્થિત આવાસ, સુકમામાં કોંગ્રેસ ભવન અને સુકમામાં તેમના પુત્ર હરીશ કવાસીનું ઘર પણ જપ્ત કર્યું છે.
અહેવાલો અનુસાર, તપાસ એજન્સીએ દારૂ કૌભાંડ કેસમાં કુલ ₹ 6.15 કરોડની સંપત્તિ જપ્ત કરી છે. આ કૌભાંડ 2019થી 2022 દરમિયાન તત્કાલીન મુખ્યમંત્રી ભૂપેશ બઘેલના કાર્યકાળ દરમિયાન થયું હતું. કવાસી લખમા અને તેમનો પુત્ર હરીશ આ કેસમાં જેલમાં છે. EDનું કહેવું છે કે દારૂ કૌભાંડ સંબંધિત ગેરકાયદેસર વ્યવહારોના પુરાવાના આધારે આ કાર્યવાહી કરવામાં આવી છે.
બીજી તરફ, કોંગ્રેસના મીડિયા પ્રભારી સુશીલ આનંદ શુક્લાએ તેને રાજકીય બદલો ગણાવ્યો છે. તેમણે કહ્યું કે, આ કાર્યવાહી કોંગ્રેસને બદનામ કરવાનું કાવતરું છે. આ મામલો છત્તીસગઢના રાજકારણમાં હલચલ મચાવી રહ્યો છે અને આગામી દિવસોમાં તેના પરનો વિવાદ વધી શકે છે.
