ભારતની અગ્રણી ટેલિકોમ કંપનીઓમાંની એક, ભારતી એરટેલે (Bharti Airtel) મંગળવારે સ્પેસએક્સ (SpaceX) સાથેની તેની ભાગીદારીની જાહેરાત કરી છે. જેના હેઠળ તે સ્પેસએક્સના સેટેલાઇટ ઇન્ટરનેટ ડિવિઝન સ્ટારલિંક (Starlink) દ્વારા ભારતમાં તેના ગ્રાહકોને હાઇ-સ્પીડ ઇન્ટરનેટ સેવાઓ પૂરી પાડશે.
ભારતી એરટેલના મેનેજિંગ ડિરેક્ટર અને વાઇસ પ્રેસિડેન્ટ ગોપાલ વિટ્ટલે જણાવ્યું હતું કે, “ભારતમાં એરટેલ દ્વારા ગ્રાહકોને સ્ટારલિંક ઓફર કરવા માટે સ્પેસએક્સ સાથે સહયોગ કરવો એ એક મોટા સીમાચિહ્નરૂપ છે, જે અદ્યતન સેટેલાઇટ કનેક્ટિવિટી પ્રત્યેની અમારી પ્રતિબદ્ધતાને મજબૂત બનાવે છે.”
એરટેલ દ્વારા જારી કરાયેલી એક પ્રેસ રિલીઝમાં કહેવામાં આવ્યું છે કે કનેક્ટિવિટી વધારવા ઉપરાંત, આ ભાગીદારી ચકાસશે કે સ્ટારલિંકની સેટેલાઇટ ટેકનોલોજી એરટેલના હાલના નેટવર્કને કેવી રીતે સુધારી શકે છે, જ્યારે સ્પેસએક્સને ભારતમાં એરટેલના ગ્રાઉન્ડ ઇન્ફ્રાસ્ટ્રક્ચરનો ઉપયોગ કરવા સક્ષમ બનાવશે. આ સહયોગ દેશભરમાં અદ્યતન કનેક્ટિવિટી સોલ્યુશન્સ પહોંચાડવાની તેની લાંબા ગાળાની વ્યૂહરચના સાથે સુસંગત છે, એમ નિવેદનમાં જણાવાયું છે.
એરટેલ પહેલાથી જ સેટેલાઇટ બ્રોડબેન્ડ માટે યુટેલસેટ વનવેબ (Eutelsat OneWeb) સાથે કામ કરી રહી છે, અને સ્ટારલિંકને તેના પોર્ટફોલિયોમાં એકીકૃત કરવાથી મર્યાદિત અથવા ઇન્ટરનેટ ઍક્સેસ વિનાના વિસ્તારોમાં કવરેજનો વિસ્તાર થશે. આનાથી દૂરના વિસ્તારોમાં વ્યવસાયો અને સમુદાયોને હાઇ-સ્પીડ બ્રોડબેન્ડની વધુ સારી ઍક્સેસ મળશે, જેનાથી વિકાસ માટે નવી તકો ઊભી થશે.
