અયોધ્યામાં (Ayodhya) શ્રી રામ જન્મભૂમિ મંદિરનું (Shri Ram Janmabhoomi)બાંધકામ 96% પૂર્ણ થયું છે, અને જૂન 2025 સુધીમાં પૂર્ણ થવાની અપેક્ષા છે. મંદિરના નિર્માણ પાછળ અત્યાર સુધીમાં ₹2150 કરોડનો ખર્ચ થયો છે. શ્રી રામ જન્મભૂમિ તીર્થ ક્ષેત્ર ટ્રસ્ટની (Teerth Kshetra Trust) તાજેતરની બેઠકમાં, મહામંત્રી ચંપત રાયે માહિતી આપી હતી કે છેલ્લા પાંચ વર્ષમાં, ટ્રસ્ટે વિવિધ કરના રૂપમાં સરકારને ₹396 કરોડ ચૂકવ્યા છે. આમાં, GST તરીકે ₹272 કરોડ, TDS તરીકે ₹39 કરોડ, મજૂર સેસ તરીકે ₹14 કરોડ, ESI તરીકે ₹7.4 કરોડ, વીમા તરીકે ₹4 કરોડ, નકશા માટે અયોધ્યા વિકાસ સત્તામંડળને ₹5 કરોડ, જમીન ખરીદી પર સ્ટેમ્પ ડ્યુટી તરીકે ₹29 કરોડ, વીજળી બિલ તરીકે ₹10 કરોડ અને વિવિધ રાજ્યોને રોયલ્ટી તરીકે ₹14.9 કરોડ આપવામાં આવ્યા છે.
અત્યાર સુધીમાં, મંદિરના નિર્માણ માટે ₹2150 કરોડ ખર્ચ કરવામાં આવ્યા છે, જે સંપૂર્ણપણે સમાજના સહયોગથી પ્રાપ્ત થયા છે. ટ્રસ્ટે સરકાર પાસેથી કોઈ આર્થિક સહાય લીધી નથી. યુપી સ્ટેટ કન્સ્ટ્રક્શન કોર્પોરેશનને ₹200 કરોડ ચૂકવવામાં આવ્યા છે, જેના દ્વારા 70 એકર વિસ્તારમાં રામ કથા મ્યુઝિયમ, રેસ્ટ હાઉસ અને ત્રણ ભવ્ય પ્રવેશદ્વાર બનાવવામાં આવી રહ્યા છે. ટ્રસ્ટ દ્વારા એક ERP સિસ્ટમ પણ વિકસાવવામાં આવી છે, જેનાથી તમામ ખર્ચાઓ ડિજિટલ પ્લેટફોર્મ પર પારદર્શક રીતે નોંધી શકાય છે.
રામ નવમીના દિવસે થશે પ્રભુનું સૂર્ય તિલક
આગામી રામ નવમીના દિવસે બપોરે 12:04 વાગ્યે સૂર્ય તિલક થશે, જેમાં સૂર્યના કિરણો રામલલાના કપાળ પર પડશે. અયોધ્યામાં 50 સ્થળોએ લગાવવામાં આવેલી મોટી સ્ક્રીનો દ્વારા ભક્તો આ ઐતિહાસિક ક્ષણને જોઈ શકશે. આ પ્રસંગે વાલ્મીકિ રામાયણ અને રામચરિત માનસનું નવહન પારાયણ કરવામાં આવશે, દુર્ગા પૂજા અને યજ્ઞની સાથે એક લાખ મંત્રો પણ અર્પણ કરવામાં આવશે.
ભક્તોએ વહાવ્યું દાનનું ઘોડાપૂર
મંદિર નિર્માણ કાર્ય ઝડપી ગતિએ ચાલુ છે, મુખ્ય મંદિરનું કામ 96% પૂર્ણ થઈ ગયું છે. સપ્ત મંદિરનું બાંધકામ પણ 96% પૂર્ણ થયું છે, જ્યારે પારકોટા (મંદિરનું કમ્પાઉન્ડ વોલ) 60% પૂર્ણ થયું છે. શબરી, નિષાદ અને ઋષિઓના મંદિરો મે 2025 સુધીમાં પૂર્ણ થશે, જ્યારે શેષાવતાર મંદિર ઓગસ્ટ 2025 સુધીમાં પૂર્ણ થશે. આ સમયગાળા દરમિયાન, ભક્તોનું યોગદાન પણ મહત્વપૂર્ણ રહ્યું છે. ભક્તોએ અત્યાર સુધીમાં 944 કિલો ચાંદીનું દાન કર્યું છે, જેની શુદ્ધતા 92% જોવા મળી છે. આ ચાંદીને 20-20 કિલોની ઇંટોમાં રૂપાંતરિત કરવામાં આવી છે. મંદિરમાં ભગવાનના આભૂષણો, મુગટ, પૂજા અને પ્રસાદ વિશેની માહિતી ટ્રસ્ટની સત્તાવાર વેબસાઇટ પર શેર કરવામાં આવશે.
